ផ្អែកលើការរៀបរាប់របស់ពួកអ្នកនៅរស់រានមានជីវិត ទីភ្នាក់ងារ អ.ស.ប ខាងជនភៀសខ្លួនរាយការណ៍កាលពីថ្ងៃទី២៩ ឧសភា ថា ជនអន្តោប្រវេសន៍រហូតដល់៧០០នាក់ អាចត្រូវស្លាប់រយៈពេលមួយសប្តាហ៍កន្លងមកនេះ ដោយសារការលិចនាវាដែលពួកគេជិះក្នុងដែនទឹកលីប៊ី ។
លោក FEDERICO FOSSI អ្នកនាំពាក្យរបស់ស្នងការជាន់ខ្ពស់ អ.ស.ប ខាងជនភៀសខ្លួន HCR ថ្លែងទៅកាន់ AFP ថា សភាពការណ៍ពិតជាច្របូកច្របល់ យើងក៏ពុំប្រាកដលើតួលេខនេះដែរ ក៏ប៉ុន្តែយើងគិតថាមនុស្សដល់ទៅ៧០០នាក់ លង់ទឹកសមុទ្រស្លាប់ដោយសារការលិចនាវាពួកអន្តោប្រវេសន៍ជិះ៣គ្រឿងក្នុងសប្តាហ៍នោះ ។
ជនអន្តោប្រវេសន៍ប្រមាណជា៥០០នាក់ត្រូវបាត់ខ្លួនចាប់តាំងពីការលិចកាលពីព្រឹកថ្ងៃទី២៦ ឧសភា ក្នុងដែនទឹកលីប៊ី នូវនាវានេសាទមួយដែលពួកគេជិះណែនណាន់តាន់តាប់ ។ យោងតាមពួកអ្នកនៅរស់រានមានជីវិតថា កុមារយ៉ាងតិច៤០នាក់ ក្នុងនោះមានកូនង៉ែតទាំងឡាយផង ស្ថិតក្នុងចំណោមអ្នកស្លាប់ ។ ចំណែកជនអន្តោប្រវេសន៍១០០នាក់ទៀតបាត់ខ្លួនចាប់តាំងពីការលិចនាវាមួយគ្រឿងទៀតនាថ្ងៃទី២៥ ឧសភា ។ កងម៉ារីនអុីតាលីរាយការណ៍កាលពីយប់ថ្ងៃទី២៧ ឧសភា ពីការស្រង់សាកសពមនុស្សបាន៤៥នាក់ ។
លោកស្រី CARLOTTA SAMI អ្នកនាំពាក្យម្នាក់របស់ HCR តាម TWITTER អះអាងថា យើងពុំមានតួលេខច្បាស់ប្រាកដឡើយ ហើយក៏ពុំស្គាល់អត្តសញ្ញាណពួកគេដែរ ក៏ប៉ុន្តែពួកអ្នកនៅរស់រានមានជីវិតនិយាយថា មនុស្សជាង៥០០នាក់ស្លាប់ ក្នុងការលិចនាវាកាលពីថ្ងៃទី២៦ ឧសភា ។ ចំណែកលោកស្រី GIOVANNA DI BENEDETTO នៃអង្គការ SAVE THE CHILDREN នៅស៊ីរីគូសបញ្ជាក់ថា គេពុំអាចត្រួតពិនិត្យតួលេខនេះ ក៏ប៉ុន្តែពួកអ្នកនៅរស់រានមានជីវិតគូសបញ្ជាក់ថា មនុស្សដល់ទៅប្រមាណ១.១០០នាក់ បានជិះនាវានេសាទ២គ្រឿង និងកាណូតកៅស៊ូមួយគ្រឿងចេញពីលីប៊ីមក ។ លោកស្រីបន្តថា នាវានេសាទទីមួយដែលដឹកមនុស្សប្រមាណជា៥០០នាក់ បានសណ្តោងនាវាទី២ ដែលមានមនុស្សជិះប្រមាណជា៥០០នាក់ដែរ ។ ក៏ប៉ុន្តែនាវាទី២បានចាប់ផ្តើមលិច ដោយមនុស្សមួយចំនួនប៉ុនប៉ងហែលមកកាន់នាវាទីមួយ ហើយមនុស្សឯទៀតៗខំតោងខ្សែកាបដែលភ្ជាប់នាវាទាំង២ ។ យោងតាមពួកអ្នកនៅរស់រានមានជីវិតថា កាពីតែននាវាទីមួយ ជាជនជាតិអារ៉ាប៊ី សាអ៊ូឌីត ម្នាក់ ពេលនោះបានកាត់ផ្តាច់ខ្សែកាប ។ នាវាទី២ក៏លិចយ៉ាងរហ័ស ។
ចាប់តាំងពីព្រឹកថ្ងៃទី២៣ ឧសភា មក មានសារប្រកាសអាសន្ននានាតាមវិទ្យុទាក់ទងមកកាន់កងនាវា ដែលប្រចាំការក្នុងដែនទឹកលីប៊ី រួចជនអន្តោប្រវេសន៍ដល់ទៅជាង១២.០០០នាក់ ត្រូវបានសង្គ្រោះរយៈពេលតែ៥ថ្ងៃមុនចុងសប្តាហ៍កន្លងទៅនេះ ៕
ចែករំលែកព័តមាននេះ