កូឡាឡាំពួរ ៖ ដោយមានការប្ដេជ្ញាចិត្តក្នុងការលើកស្ទួយយុវជន ក្នុងតំបន់អាស៊ាន ស៊ីអាយអឹមប៊ី គ្រុប បានប្រកាសផ្ដល់អាហារូបករណ៍ពេញលេញចំនួន២០កន្លែងដល់និស្សិត ដែលអាចជ្រើសរើសសាកលវិទ្យាល័យ
កូឡាឡាំពួរ ៖ ដោយមានការប្ដេជ្ញាចិត្តក្នុងការលើកស្ទួយយុវជន ក្នុងតំបន់អាស៊ាន ស៊ីអាយអឹមប៊ី គ្រុប បានប្រកាសផ្ដល់អាហារូបករណ៍ពេញលេញចំនួន២០កន្លែងដល់និស្សិត ដែលអាចជ្រើសរើសសាកលវិទ្យាល័យល្បីឈ្មោះណាមួយសម្រាប់ការសិក្សាថ្នាក់បរិញ្ញាបត្រ ។ អាហារូបករណ៍តំបន់អាស៊ានរបស់ស៊ីអាយអឹមប៊ី ផ្ដល់ឱកាសដល់សិស្ស និស្សិត ដែលមានបំណងចូលរៀនថ្នាក់បរិញ្ញាបត្រ និងកំពុងសិក្សាថ្នាក់បរិញ្ញាបត្រ នៅតាមបណ្ដាប្រទេសក្នុងតំបន់ រួមមាន ប្រទេសកម្ពុជា ម៉ាឡេស៊ី ឥណ្ឌូនេស៊ី សិង្ហបុរី និងថៃ ។
តាមសេចក្តីប្រកាសរបស់ស៊ីអាយអឹមប៊ី ថា លក្ខណសម្បត្តិពិសេសនៃអាហារូបករណ៍នេះ គឺការផ្ដល់ឱ្យនិស្សិតទទួលបានអាហារូបករណ៍ មានឱកាសក្នុងការចូលរួមកម្មវិធីបំប៉ននានា ដែលមិនត្រឹមតែជួយពួកគេក្នុងការសិក្សាប៉ុណ្ណោះទេ តែថែមទាំងអាចត្រៀមខ្លួនបានយ៉ាងល្អក្នុងការចាប់យកឱកាសការងារជាមួយស៊ីអាយអឹមប៊ី ផងដែរ ។
ទាំងនេះ បានបង្កើតនូវប្រព័ន្ធសិក្សាល្អប្រសើរ សម្រាប់និស្សិតទទួលបានអាហារូបករណ៍ ដោយមានការយកចិត្តទុកដាក់ និងតម្រង់ទិសដោយបុគ្គលិកធនាគារ ស៊ីអាយអឹមប៊ី ផ្ទាល់ សម្រាប់ការសិក្សា និងការបណ្ដុះបណ្ដាល ដែលជាឱកាសភ្ជាប់ទំនាក់ទំនងជាមួយគណៈគ្រប់គ្រងជាន់ខ្ពស់ និងការចូលរួមក្នុងកម្មវិធីតំបន់អាស៊ាននានារបស់ស៊ីអាយអឹមប៊ី ។
លោក Tengku Dato Sri Zafrul Aziz នាយកប្រតិបត្តិស៊ីអាយអឹមប៊ីគ្រុប បានមានប្រសាសន៍ថា កម្មវិធីអាហារូបករណ៍នេះ បានបង្ហាញអំពីការប្ដេជ្ញាចិត្តរបស់យើង ក្នុងការដើរតួនាទីកាន់តែសកម្មសម្រាប់បណ្ដុះបណ្ដាលអនាគតអ្នកដឹកនាំ ដែលនឹងជួយគាំទ្រដល់ការរីកចម្រើនរបស់អាស៊ាន ស្របតាមចក្ខុវិស័យរបស់ស៊ីអាយអឹមប៊ីគ្រុប ។
គោលដៅចម្បងរបស់យើង គឺផ្ដល់នូវកម្មវិធីអភិវឌ្ឍន៍រួមមួយ ដើម្បីជួយជំរុញនិស្សិត អាហារូបករណ៍ឱ្យមានជំនាញវិជ្ជាជីវៈច្បាស់លាស់ ដែលមិនមែនត្រឹមតែមានភាពវៃឆ្លាតប៉ុណ្ណោះទេ តែថែមទាំងទទួលបានជំនាញចាំបាច់ក្នុងការសម្រេចជោគជ័យក្នុងបរិយាកាសប្រកួតប្រជែងខ្ពស់ផងដែរ ។ អត្ថប្រយោជន៍ដ៏សំខាន់សម្រាប់និស្សិត គឺឱកាសទទួលបានការងារក្នុងចំណោមប្រទេសទាំង១៧ ដែលមានសាខារបស់ស៊ីអាយអឹមប៊ីគ្រុប ។
គួរបញ្ជាក់ថា បេក្ខជនដែលបានជ្រើសរើសនឹងទទួលបានអាហារូបករណ៍ពេញលេញ រួមមានថ្លៃសិក្សា និងថ្លៃចំណាយផ្សេងៗ ព្រមទាំងផ្ដល់កន្លែងស្នាក់នៅ និងដំណើរកម្សាន្តមកស្រុកកំណើត ។ ទទួលបានបុគ្គលិកធនាគារស៊ីអាយអឹមប៊ីម្នាក់ ជាអ្នកជួយជ្រោមជ្រែងលើការសិក្សា និងបណ្ដុះបណ្ដាលជំនាញវិជ្ជាជីវៈ, ឱកាសស្វែងយល់នូវវប្បធម៌នៅក្នុងស៊ីអាយអឹមប៊ីគ្រុប រួមមានឱកាសភ្ជាប់ទំនាក់ទំនងជាមួយគណៈគ្រប់គ្រងជាន់ខ្ពស់របស់ស៊ីអាយអឹមប៊ី, ការចូលរួមក្នុងកម្មវិធីអភិវឌ្ឍន៍សហគមន៍របស់ស៊ីអាយអឹមប៊ី ដូចជាកិច្ចប្រជុំអ្នកដឹកនាំវ័យក្មេងតំបន់អាស៊ាន របស់ស៊ីអាយអឹមប៊ី និងកម្មវិធីប្រឡងជួញដូរមូលបត្រ ស៊ីអាយអឹមប៊ី ប្រចាំតំបន់អាស៊ាន, ការចូលរួមក្នុងកម្មវិធីទំនួលខុសត្រូវសង្គមរបស់ស៊ីអាយអឹមប៊ី, ឱកាសសិក្សាស្រាវជ្រាវ និងហ្វឹកហាត់ការងារ, វគ្គសិក្សានៃការអភិវឌ្ឍន៍ភាពជាអ្នកដឹកនាំ និងប្រសិទ្ធភាពបុគ្គល, ឱកាសការងារជាមួយស៊ីអាយអិមប៊ីគ្រុប តាមរយៈកម្មវិធីភាពជាបុគ្គលិកធនាគារ ។ ការទទួលពាក្យចាប់ផ្ដើមពីថ្ងៃទី២៤ ឧសភា ២០១៦ និងឈប់ទទួលពាក្យ ថ្ងៃទី១២ មិថុនា ២០១៦ ហើយអ្នកដាក់ពាក្យអាចចូលទៅកាន់គេហទំព័រ www.cimb.com/aseanscholarship ឬតាមរយៈអ៊ីម៉េល cimbaseanscholarship@cimb.com សម្រាប់ព័ត៌មានបន្ថែម ៕
ចែករំលែកព័តមាននេះ