ប្រទេសវៀតណាម ៖ ការផ្ទេរប្រាក់មកកាន់ទីក្រុងហូជីមិញ ក្នុងរយៈពេល៤ខែដំបូង នេះមានចំនួន១,៣ប៊ីលានដុល្លារ ពោលគឺវាបានកើនឡើង២១១លានដុល្លារ បើធៀបនឹងខែមុន ។
អគ្គនាយករងនៃធនាគារជាតិវៀតណាម (SBV) ប្រចាំទីក្រុងហូជីមិញ លោក Nguyen Hoang បានមានប្រសាសន៍ថា ៖ « ចំនួនទឹកប្រាក់បានកើនឡើង២% បើធៀបនឹងរយៈពេលដូចគ្នាកាលពីឆ្នាំមុន » ។
ធនាគារជាតិប្រចាំសាខាទីក្រុងហូជីមិញបានបង្ហាញថា ចលនាមូលធនប្រាក់ដុល្លារ ដោយធនាគារពាណិជ្ជរបស់រដ្ឋ នៅក្នុងរយៈពេល៤ខែដំបូងបានធ្លាក់ចុះ១១,២%នៅដើមឆ្នាំនេះ ដោយសារតែគោលនយោបាយអត្រាការប្រាក់សូន្យ និងអត្រាប្តូរប្រាក់មានស្ថិរភាព ។
អ្នកជំនាញបានព្យាករថា ៖ « ការផ្ទេរប្រាក់មកកាន់ទីក្រុងហូជីមិញនៅឆ្នាំនេះ នឹងបន្តមានសុទិដ្ឋិនិយម ដែលមានចំនួនប្រមាណ៥,៥ប៊ីលានដុល្លារ ដែលនេះគួរតែអរគុណដល់កំណើនសេដ្ឋកិច្ចរបស់ទីក្រុង » ។
ទីក្រុងហូជីមិញ គឺជាទីតាំងនាំមុខគេរបស់ជាតិ ក្នុងការផ្ទេរប្រាក់ពីក្រៅប្រទេស ។ កាលពីឆ្នាំ២០១៤ ការផ្ទេរប្រាក់មានចំនួន៥,២ប៊ីលានដុល្លារ ហើយច្រើនជាង៧០,៨%នៃការផ្ទេប្រាក់ គឺបានមកពីវិស័យផលិតកម្ម និងជំនួញ ខណៈដែល២១,៦%បានមកពីវិស័យអចលនទ្រព្យ និង៧%ទៀតបានពីការផ្ទេរប្រាក់ជាឯក្កតៈបុគ្គល ។
ការផ្ទេរប្រាក់មកប្រទេសវៀតណាមនៅឆ្នាំនេះ មានការកើនឡើងបន្តិច បើធៀបនឹងឆ្នាំមុន ដោយសារតែគោលនយោបាយលើកទឹកចិត្តរបស់រដ្ឋាភិបាលលើការលើកស្ទួយការវិនិយោគបរទេសនៅលើទឹកដីវៀតណាម ក៏ដូចជាទីផ្សារអចលនទ្រព្យក្នុងស្រុកមានដំណើរការល្អផងដែរ ។
យោងតាមធនាគារពិភពលោកបានឲ្យដឹងថា ប្រទេសវៀតណាមបានទទួលការផ្ទេរប្រាក់ពីប្រទេស ចំនួន១២,៣ប៊ីលានដុល្លារនៅឆ្នាំ២០១៥ ។ វៀតណាម គឺជាប្រទេសដែលទទួលការផ្ទេរប្រាក់ធំជាងគេក្នុងលេខរៀងទី១១ នៅលើពិភពលោក និងលេខរៀងទី៣ ប្រចាំតំបន់អាស៊ីប៉ាស៊ីហ្វិក បន្ទាប់ពីប្រទេសចិន និងហ្វ៊ីលីពីន ៕
ចែករំលែកព័តមាននេះ