រាជធានីភ្នំពេញ ៖ ពលរដ្ឋជាច្រើននៅក្នុងភូមិពោតូច ឃុំកំពង់ហ្លួង ស្រុកពញ្ញាឮ ខេត្តកណ្តាល ដែលមានរបរឆ្លាក់ស្ពាន់ និងប្រាក់ បានផ្អាកសកម្មភាពសិល្បកម្មរបស់ខ្លួន ដោយសារគ្មានអ្នកបញ្ជាទិញ…
រាជធានីភ្នំពេញ ៖ ពលរដ្ឋជាច្រើននៅក្នុងភូមិពោតូច ឃុំកំពង់ហ្លួង ស្រុកពញ្ញាឮ ខេត្តកណ្តាល ដែលមានរបរឆ្លាក់ស្ពាន់ និងប្រាក់ បានផ្អាកសកម្មភាពសិល្បកម្មរបស់ខ្លួន ដោយសារគ្មានអ្នកបញ្ជាទិញ នៅកំលុងពេលជំងឺកូវីដ ១៩ រាតត្បាត ។ ទោះជាគ្មានសំឡេងតេក តុកៗ ឆ្លាក់ស្ពាន់ និងប្រាក់ តែស្នាដៃអ្នកស្រុកនៅតែដាក់លក់តាមផ្ទះជាធម្មតា ដែលបង្ហាញថា ភូមិនេះជាភូមិដែលមានប្រពៃណីឆ្លាក់ប្រាក់ និងស្ពាន់តាំងពីដូនតាមក ។
អ្នកស្រី ផល ដែលចេះឆ្លាក់ប្រាក់ និងស្ពាន់ តាំងតពីឪពុកម្តាយ និយាយថា ដោយសារតែជំងឺកូវីដ ១៩ រាតត្បាតនោះ បានធ្វើឱ្យអ្នកលក់ដូរវត្ថុអានុស្សាវរីយ៍ធ្វើពីប្រាក់ ឬ ស្ពាន់ នៅក្នុងឃុំកំពង់ហ្លួង ស្រុកពញ្ញាឮនេះ ស្ទើរតែដាច់បាយទៅហើយ ព្រោះតែមិនមានភ្ញៀវកុម្ម៉ង់ ឬ ទិញវត្ថុអានុស្សាវរីយ៍ទាំងអស់នេះ ។ អ្នកស្រីពោលថា មិនដឹងជាដល់ពេលណានោះទេ ទើបមានទីផ្សារឡើងវិញ ទោះបីពេកនេះស្ថានភាពកូវីដ ១៩ បានធូរស្រាលហើយក្តី ។
នៅក្នុងទូកញ្ចក់តាមផ្ទះអ្នកស្រុក គេឃើញមានដាក់បង្ហាញស្នាដៃដែលអ្នកស្រុកបានផលិត មានពណ៌ក្រហមដូចមាស ឬ ពណ៌ស ដូចជារូបផ្លែឈើ សត្វ និងរបស់ប្រើប្រាស់ជាច្រើនទៀត មានតូច មានធំ ចម្រុះគ្នារង់ចាំអ្នកទិញ ។
ក្រសួងពាណិជ្ជកម្ម បានកំពុងជំរុញរៀបចំមជ្ឈមណ្ឌលអភិវឌ្ឍន៍វិស័យចម្លាក់ប្រាក់-ស្ពាន់ កម្ពុជា ។ លោក រាជ រ៉ា រដ្ឋលេខាធិការក្រសួងពាណិជ្ជកម្ម កាលពីពេលថ្មីៗនេះបានដឹកនាំកិច្ចប្រជុំមន្ត្រីពាក់ព័ន្ធ នៃសមាគមសហព័ន្ធចម្លាក់ប្រាក់-ស្ពាន់ កម្ពុជា ដើម្បីជំរុញទីផ្សារសិល្បៈខ្មែរមួយប្រភេទនេះ ។ លោកបានលើកឡើងថា មជ្ឈមណ្ឌលនេះចូលរួមដើរតួយ៉ាងសំខាន់ក្នុងការជំរុញអភិវឌ្ឍន៍ និងបង្កើតបរិយាកាសពាណិជ្ជកម្មលើវិស័យចម្លាក់ប្រាក់-ស្ពាន់ ទាក់ទាញវិស័យទេសចរណ៍ អភិរក្សវប្បធម៌ប្រវត្តិសាស្ត្រ និងអត្តសញ្ញាណកេរដំណែលនៃផលិតផល និងភូមិសាស្ត្រ បង្កើនឱកាសពាណិជ្ជកម្ម និងពង្រីកទីផ្សារបន្ថែមក្នុងវិស័យចម្លាក់ប្រាក់-ស្ពាន់កម្ពុជា ។
តាមមន្ត្រីក្រសួងពាណិជ្ជកម្មនឹងសម្របសម្រួលការចុះបញ្ជីសមាគមសហព័ន្ធចម្លាក់ប្រាក់-ស្ពាន់ កម្ពុជា ចងក្រងសៀវភៅបន្ទុកពាក់ព័ន្ធនឹងវិស័យចម្លាក់ប្រាក់-ស្ពាន់ ព្រមទាំងការស្វែងរកទីផ្សារសម្រាប់ផលិតផលចម្លាក់ប្រាក់-ស្ពាន់ ។
លោក រាជ រ៉ា បានបញ្ជាក់ជាថ្មីថា ក្រសួងពាណិជ្ជកម្មនៅតែបន្តគាំទ្រយ៉ាងពេញទំហឹងចំពោះការងារលើកកម្ពស់កេរ្តិ៍ឈ្មោះ និងថែរក្សាអត្តសញ្ញាណខ្មែរ ដោយបច្ចុប្បន្នក្រសួងកំពុងបន្តចរចាបើកទីផ្សារបន្ថែម និងបានស្នើឱ្យមានការចូលរួមឱ្យបានសកម្មពីវិស័យឯកជនពាក់ព័ន្ធ សំដៅជំរុញការលក់ផលិតផលខ្មែរទាំងនៅទីផ្សារក្នុងស្រុក និងបរទេស ៕
ចែករំលែកព័តមាននេះ