កិច្ចប្រជុំអគ្គនាយកគយអាស៊ានលើកទី២៥ (នាថ្ងៃទី២៥-២៧ ខែឧសភា ឆ្នាំ២០១៦) ដែលបានដឹកនាំដោយលោកបណ្ឌិត គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា ដោយមានការចូលរួមពីអគ្គនាយកគយអាស៊ានទាំងដប់ប្រទេស, រដ្ឋបាលគយចិន, រដ្ឋបាលគយជប៉ុន, រដ្ឋបាលគយកូរ៉េ, ក្រុមប្រឹក្សាពាណិជ្ជកម្មអាស៊ាន-អាមេរិក, ក្រុមប្រឹក្សាពាណិជ្ជកម្មអាស៊ាន-អឺរ៉ុប, បញ្ញើរហ័សអាស៊ី-ប៉ាស៊ីហ្វិក, ការិយាល័យតំបន់អាស៊ី-ប៉ាស៊ីហ្វិកទទួលបន្ទុកកសាងសមត្ថភាពរបស់អង្គការគយពិភពលោក សភាពាណិជ្ជកម្មកម្ពុជា និងមន្ត្រីលេខាធិការដ្ឋានអាស៊ាន នៅសណ្ឋាគារ Sofitel Phnom Penh Phokeethra រាជធានីភ្នំពេញ បានបញ្ចប់ដោយរលូន និងជោគជ័យតាមការគ្រោងទុក។
ជាលទ្ធផល កិច្ចប្រជុំអគ្គនាយកគយអាស៊ានលើកទី២៥ នេះ បានសម្រេច និងឯកភាពលើការងារមួយចំនួនដូចខាងក្រោម ៖
១-ពិនិត្យវឌ្ឍនភាពការងារនៃការអនុវត្តផែនការយុទ្ធសាស្ត្រអភិវឌ្ឍគយ ២០១៦-២០២០ ដែលអនុវត្តដោយក្រុមការងារកិច្ចសម្រួលពាណិជ្ជកម្ម និងនីតិវិធីគយ, ក្រុមការងារអនុវត្តច្បាប់គយ និងអនុលោមភាព និងក្រុមការងារកសាងសមត្ថភាពចំណេះដឹងគយ
២-អនុម័តលើផែនការគោលដៅទូលំទូលាយរបស់រដ្ឋបាលគយអាស៊ានឆ្នាំ២០១៦-២០២៥
៣-អនុម័តលើគម្រោងក្រុមការងារគ្រប់គ្រងមជ្ឈមណ្ឌល ប្រព័ន្ធឆ្លងកាត់គយអាស៊ាន
៤-ពន្លឿនការអនុម័តតារាងនាមវលីពន្ធគយអាស៊ានឆ្នាំ២០១៧ ដែលមាន៩៧ជំពូក នាពេលដ៏ខ្លីសមស្របខាងមុខ
៥-ជំរុញឲ្យប្រទេសជាសមាជិកអាស៊ានពន្លឿននីតិវិធីផ្ទៃក្នុងរបស់ខ្លួនក្នុងការរៀបចំ និងចុះហត្ថលេខាដោយរដ្ឋមន្ត្រីហិរញ្ញវត្ថុអាស៊ាន លើពិធីសារទី២ ស្តីពីការកំណត់មាត់ច្រកព្រំដែនឆ្លងកាត់
៦-ជំរុញឲ្យប្រទេសជាសមាជិកអាស៊ានពន្លឿននីតិវិធីផ្ទៃក្នុងរបស់ខ្លួន ក្នុងការផ្តល់សច្ចាប័នលើពិធីសារទី៧ ស្តីពីប្រព័ន្ធដឹកជញ្ជូនឆ្លងកាត់
៧-ជ្រើសរើសរដ្ឋបាលគយកម្ពុជាធ្វើជាប្រធានដឹកនាំកិច្ចប្រជុំគណៈកម្មាធិការសម្របសម្រួលគយអាស៊ានលើកទី២៥ និងលើកទី២៦ សម្រាប់ឆ្នាំ២០១៦-២០១៧។
ទន្ទឹមនេះ កិច្ចប្រជុំអគ្គនាយកគយអាស៊ាន ក៏បានប្រជុំពិគ្រោះយោបល់ជាមួយគណៈប្រតិភូរដ្ឋបាលគយចិន ជប៉ុន កូរ៉េ និងការិយាល័យតំបន់អាស៊ី-ប៉ាស៊ីហ្វិកទទួលបន្ទុកកសាងសមត្ថភាពរបស់អង្គការគយពិភពលោក ដើម្បីពិនិត្យវឌ្ឍនភាពនៃកិច្ចសហប្រតិបត្តិការ និងពិភាក្សាយុទ្ធសាស្ត្រក្នុងការលើកកម្ពស់កម្រិតកិច្ចសហប្រតិបត្តិការពាក់ព័ន្ធនឹងការងារគយ ហើយបានពិគ្រោះយោបល់ជាមួយតំណាងវិស័យឯកជនសំខាន់ៗចំនួនបីរួមមាន ១-ក្រុមប្រឹក្សាពាណិជ្ជកម្មអាស៊ាន-អាមេរិក ២-ក្រុមប្រឹក្សាពាណិជ្ជកម្មអាស៊ាន-អឺរ៉ុប និង៣-បញ្ញើរហ័សអាស៊ី-ប៉ាស៊ីហ្វិក ក្នុងគោលបំណងពង្រឹងទំនាក់ទំនង និងកិច្ចសហការរវាងរដ្ឋបាលគយ និងវិស័យឯកជន ដើម្បីលើកកម្ពស់កិច្ចសម្រួលពាណិជ្ជកម្ម។
ឆ្លៀតឱកាសក្នុងកិច្ចប្រជុំអគ្គនាយកគយអាស៊ានលើកទី២៥ នេះ គណៈប្រតិភូនៃអគ្គនាយកដ្ឋានគយ និងរដ្ឋាករកម្ពុជា ដឹកនាំដោយលោកបណ្ឌិត គុណ ញឹម មានប្រារព្ធកិច្ចប្រជុំទ្វេភាគីរវាងរដ្ឋបាលគយកម្ពុជា និងរដ្ឋបាលគយចំនួន៥ រួមមាន ១-រដ្ឋបាលគយចិន ២-រដ្ឋបាលគយកូរ៉េ ៣-រដ្ឋបាលគយថៃ ៤-រដ្ឋបាលគយវៀតណាម និង៥-រដ្ឋបាលគយឡាវ ដើម្បីពង្រឹងកិច្ចសហប្រតិបត្តិការផ្លាស់ប្តូរព័ត៌មាន និងជួយគ្នាទៅវិញទៅមកក្នុងកិច្ចការគយ។ លើសពីនេះ អគ្គនាយកដ្ឋានគយ និងរដ្ឋាករកម្ពុជា ក៏បានប្រជុំទ្វេភាគីជាមួយសមាគមវិស័យឯកជនសំខាន់ៗចំនួន៣ខាងលើ ក្នុងគោលបំណងពង្រឹងទំនាក់ទំនង និងកិច្ចសហការរវាងរដ្ឋបាលគយកម្ពុជា-វិស័យឯកជន ពិភាក្សាលើបញ្ហា និងសំណូមពរ ព្រមទាំងពិនិត្យរកដំណោះស្រាយ ដើម្បីកែលម្អបរិយាកាសវិនិយោគ និងលើកកម្ពស់កិច្ចសម្រួលពាណិជ្ជកម្មនៅកម្ពុជា។
កិច្ចប្រជុំបានបញ្ចប់ប្រកបដោយជោគជ័យ ក្នុងបិរយាកាសសហប្រតិ្តបត្តិការ និងមិត្តភាពស្និទ្ធស្នាល។ កិច្ចប្រជុំអគ្គនាយកគយអាស៊ានលើកទី២៦ នឹងប្រព្រឹត្តទៅប្រទេសឥណ្ឌូនេស៊ី នាឆ្នាំ២០១៧។
ចែករំលែកព័តមាននេះ