កាសែតវ៉ាស៊ីនតោនប៉ុស្តិ៍អះអាងកាលពីថ្ងៃទី២៧ ឧសភា ថា ម្តាយមីងម្នាក់របស់មេដឹកនាំកូរ៉េខាងជើង លោកគីម ជុងអ៊ុន កំពុងរស់នៅដោយលាក់ឈ្មោះនៅទីក្រុងញូវយ៉ក ដែលនៅទីនោះលោកស្រីគ្រប់គ្រងសហគ្រាសបោសសម្អាតមួយ
កាសែតវ៉ាស៊ីនតោនប៉ុស្តិ៍អះអាងកាលពីថ្ងៃទី២៧ ឧសភា ថា ម្តាយមីងម្នាក់របស់មេដឹកនាំកូរ៉េខាងជើង លោកគីម ជុងអ៊ុន កំពុងរស់នៅដោយលាក់ឈ្មោះនៅទីក្រុងញូវយ៉ក ដែលនៅទីនោះលោកស្រីគ្រប់គ្រងសហគ្រាសបោសសម្អាតមួយ បន្ទាប់ពីរត់គេចខ្លួនកាលពីឆ្នាំ១៩៩៨មក ។
លោកស្រី KO YONG SUK ដែលរស់នៅជាមួយស្វាមី លោក RI GANG និងកូន៣នាក់ដែលក្លែងឈ្មោះគឺជាប្អូនស្រីរបស់លោកស្រី KO YONG-HUI ជាភរិយាម្នាក់ ក្នុងចំណោមភរិយារបស់លោកគីម ជុងអីុល ហើយត្រូវជាម្តាយរបស់លោកគីម ជុងអ៊ុន ។ ប្តីប្រពន្ធនេះ ដែលស្និទ្ធនឹងរដ្ឋអំណាចកុំមុយនីស្តកូរ៉េខាងជើង ធ្លាប់ត្រូវបញ្ជូនមកកាន់ប្រទេសស្វ៊ីសគ្រប់គ្រងលើបណ្តាសមាជិកគ្រួសារ ពេលមកបំពេញការសិក្សាក្នុងប្រទេសនេះ ។
យោងតាមលោកស្រី KO YONG-SUK ថា លោកគីម ជុងអ៊ុន កើតក្នុងឆ្នាំ១៩៨៤ ពុំមែនក្នុងឆ្នាំ១៩៨២ ឬ១៩៨៣ ដូចគេនិយាយឡើយ បានន័យថា លោកគីម ជុងអ៊ុន ពេលឡើងស្នងតំណែងពីឪពុកលោកគីម ជុងអីុល ជាមេដឹកនាំកូរ៉េខាងជើងមានអាយុត្រឹមតែ២៧ឆ្នាំប៉ុណ្ណោះ ។
លោកស្រីរៀបរាប់ទៀតថា កូនប្រុសលោកស្រីកើតឆ្នាំជាមួយគ្នានឹងលោកគីម ជុងអ៊ុន ហើយកាលនៅពីតូច អ្នកទាំង២រត់លេងជាមួយគ្នា ។ លោកគីម ជុងអ៊ុន និងកូនប្រុសគាត់លេងតែជាមួយគ្នាចាប់តាំងពីក្រោយ ពួកគេកើតមក រួចគឺរូបលោកស្រីជាអ្នកលួងពួកគេឱ្យដេក ។
លោកស្រី KO YONG SUK រៀបរាប់ប្រាប់កាសែតវ៉ាស៊ីនតោនប៉ុស្តិ៍ទៀតថា តាំងពីតូចមកលោកគីម ជុងអ៊ុន ចូលចិត្តលេងបាល់បោះបំផុត ទោះបីជាពេលដេកក៏ឱបបាល់បោះដែរ ។
លោកគីម ជុងអ៊ុន ល្បីជាអ្នកគាំទ្រីកីឡាករបាល់បោះអាេមរិក លោក MICHAEL JORDAN ដែលលោកគីម ជុងអ៊ុន ធ្លាប់ទទួលរូបគេជាច្រើនលើកនៅទីក្រុងព្យុងយ៉ាង ៕
ចែករំលែកព័តមាននេះ