រាជធានីភ្នំពេញ ៖ បុរសម្នាក់កំពុងបណ្តើរម៉ូតូសុខៗ ក៏មានជនមួយក្រុមដើរមកក្បែរសុំលុយ១៥.០០០រៀល តែបុរសនោះមិនព្រម ត្រូវជនមួយក្រុមវាយបែកក្បាល និងធាក់ធ្លាក់ប្រឡាយទឹកស្អុយ បង្កឱ្យមានការភ្ញាក់ផ្អើលកាលពីវេលាម៉ោង១១និង៥០នាទីយប់ថ្ងៃទី២៧ ឧសភា ២០១៦ នៅតាមបណ្តោយផ្លូវអូរដឹមកប់ស្រូវកែវផ្លូវជាតិ មុខការ៉ាស់សាំងតេលា ភូមិព្រៃស្វាយ សង្កាត់ចោមចៅ ខណ្ឌពោធិ៍សែនជ័យ។
ជនរងគ្រោះមានឈ្មោះ លី នឿន ភេទប្រុស អាយុ៣២ឆ្នាំ មុខរបរកម្មករលើកកាតុងនៅក្រុមហ៊ុនផែស្ងួតតេងឡាយ ស្នាក់នៅភូមិព្រៃបឹង សង្កាត់កន្ទោក ខណ្ឌពោធិ៍សែនជ័យ មានស្រុកកំណើតស្រុកមោងឬស្សី ខេត្តបាត់ដំបង បានឲ្យដឹងទាំងខ្លួនស្រវឹង និងរបួសបែក ក្បាលថា មុនពេលកើតហេតុ រូបគាត់បានជួបជុំអ្នកធ្វើការជាមួយគ្នានៅកន្លែងធ្វើការមានគ្នា ៥ទៅ៦នាក់ ផឹកស្រាថ្នាំអស់មួយលីត្រ គាត់ក៏បានសុំចេញមកមុន ព្រោះស្រវឹងហើយ ខ្លាចទៅផ្ទះអត់រួច ខណៈពេលជិះម៉ូតូមួយគ្រឿងម៉ាកវីវ៉ា ពណ៌ខ្មៅ ពាក់ស្លាកលេខភ្នំពេញ1W-7438 លុះជិតមកដល់កន្លែងកើតហេតុ ម៉ូតូរបស់គាត់បានរលត់អត់ឆេះ ហើយគាត់បានបណ្តើរម៉ូតូទាំងស្រវឹងទ្រេតទ្រោត ស្រាប់តែលេចមុខជនមួយក្រុមមានគ្នា៤ទៅ៥នាក់ បានដើរមកជិតគាត់ ហើយបានសុំលុយចំនួន១៥.០០០រៀល តែគាត់ប្រាប់ថា គ្មានលុយទេ ធ្វើឱ្យជនបង្កព្រួតគ្នាវាយគាត់រហូតបែកក្បាលហូរឈាមស្រោចមុខ ពេលនោះគាត់ភ័យពេកបានរត់ចោលម៉ូតូ ក៏ត្រូវជនមួយក្រុមនោះបានដេញតាម និងថែមទាំងធាក់គាត់ និងម៉ូតូធ្លាក់ប្រឡាយទឹកស្អុយទៀតផង ទើបក្រុមជនបង្កបាននាំគ្នារត់បាត់ស្រមោល។
ក្រោយពេលកើតហេតុ ប្រជាពលរដ្ឋបានទូរស័ព្ទប្តឹងសមត្ថកិច្ចជួយអន្តរាគមន៍ បន្ទាប់មកសមត្ថកិច្ចមូលដ្ឋាន បានទៅដល់ និងបានសួរនាំ តែដោយឃើញជនរងគ្រោះធ្ងន់ បានហៅរថយន្តសង្គ្រោះមកដឹកទៅព្យាបាល តែគាត់មិនព្រមឡើងរថយន្តទេ ព្រោះគ្មានលុយព្យាបាល បន្ទាប់មកគាត់ក៏បានបណ្តើរម៉ូតូទាំងខ្លួនរបួសហូរឈាមពេញខ្លួនទៅផ្ទះដោយខ្លួនឯង រង់ចាំថ្ងៃក្រោយចាំមកដាក់ពាក្យបណ្តឹង៕
ចែករំលែកព័តមាននេះ