ខេត្តព្រះសីហនុ ៖ អាកាសធាតុនៅក្នុងស្រុកព្រៃនប់ក៏ដូចជាស្រុក-ក្រុងក្នុងខេត្តព្រះសីហនុ នៅតែបន្តអួអាប់មានភ្លៀងធ្លាក់ជោកជាំជួនខ្លាំង ជួនរលឹមទាំងយប់ ទាំងថ្ងៃ តែទោះបីយ៉ាងណា ក៏មិនសូវមានផ្គរឬរន្ទះ និងទឹកជន់លិចនោះឡើយ ។
សូមបញ្ជាក់ថា នៅខេត្តព្រះសីហនុជាពិសេសស្រុកព្រៃនប់ ដែលជាស្រុកធំជាងគេក្នុងខេត្តមានរហូត១៤ឃុំនោះ ក្នុងរយៈពេលប្រមាណជាជាង២ខែកន្លងមកនេះបានជួបការខ្វះទឹកប្រើប្រាស់ធ្វើឱ្យអាជ្ញាធរខេត្ត-ស្រុកគ្រប់ស្ថាប័នដុតដៃដុតជើង ចំណាយប្រាក់រាប់ម៉ឺនដូល្លារក្នុងការទិញទឹកប្រើប្រាស់ ទឹកបរិសុទ្ធ និងទិញសម្ភារសម្រាប់ដាក់ទឹកជូនប្រជាពលរដ្ឋ។ មិនតែប៉ុណ្ណោះ ស្រះជាច្រើនកន្លែងត្រូវបានអាជ្ញាធរមានវិធានការជីកស្តារឡើងវិញ ។
ផលលំបាកកង្វះទឹកនៅក្នុងតំបន់ខាងលើត្រូវបានរសាត់បាត់ត្រឹមពាក់កណ្តាលខែឧសភានេះ ដោយមានភ្លៀងធ្លាក់មកជាបន្តបន្ទាប់ ហើយថ្ងៃទី១៩ ឧសភា មានភ្លៀងរលឹមជាប់រហូតមកទល់ព្រឹកថ្ងៃទី២៧ ឧសភា នៅបន្តភ្លៀងរលឹម ហើយចំណែកទឹកស្អាតប្រើប្រាស់ ដែលអ្នកស្រុកហៅថា ទឹកគូប ក៏ចាប់ផ្តើមដំណើរការធម្មតាវិញដែរ ៕
ចែករំលែកព័តមាននេះ