រាជធានីភ្នំពេញ ៖ ចៅក្រមសាលាដំបូងរាជធានី នៅព្រឹកថ្ងៃទី២៧ ឧសភា បានលើកយកសំណុំរឿងវាយអ្នកតំណាងរាស្ត្រគណបក្សសង្គ្រោះជាតិ ចំនួនពីររូបនៅក្បែរវិមានរដ្ឋសភាកាលពីថ្ងៃទី២៦ ខែតុលា ឆ្នាំ២០១៥ កន្លងទៅ មកប្រកាលសាលក្រមជាផ្លូវការ ។
លោកចៅក្រម ហេង សុខណា បានសម្រេចផ្តន្ទាទោសលើជនជាប់ចោទវាយតំណាងរាស្ត្រឈ្មោះ ចាយ សារិទ្ធ ឈ្មោះ ម៉ៅ ហឿន និងឈ្មោះ ស៊ុត វណ្ណនី ក្នុងម្នាក់ៗ ជាប់ពន្ធនាគារចំនួន៤ឆ្នាំ ប៉ុន្តែអនុវត្តត្រឹមតែ១ឆ្នាំ ចំណែក៣ឆ្នាំទៀតត្រូវបានព្យួរ ។ ជាមួយគ្នានេះក៏ត្រូវពិន័យក្នុងម្នាក់ៗ ចំនួន៦លានរៀល ។ ជនជាប់ចោទទាំង៣រូបខាងលើនេះ តុលាការបានតម្រូវឲ្យសងសំណងជម្ងឺចិត្តទៅឲ្យជនរងគ្រោះឈ្មោះ គង់ សភា ចំនួន៤០លានរៀល និងឈ្មោះ ញ៉យ ចំរើន ចំនួន៤០លានរៀលដូចគ្នាដែរ ។
តុលាការបញ្ជាក់ថា ជនជាប់ចោទទាំង៣នាក់ ត្រូវបានសម្រេចលើកលែងការចោទប្រកាន់ ពីបទធ្វើឲ្យខូចខាតដោយចេតនាមានស្ថានទម្ងន់ ផងដែរ ។
គួរកត់សម្គាល់ថា កាលពីព្រឹកថ្ងៃទី១០ ឧសភា និងថ្ងៃទី២៨ មេសា ចៅក្រម ហេង សុខណា បានបើកសវនាការជំនុំជម្រះក្នុងសំណុំរឿងហិង្សា ដោយចេតនាមានស្ថានទម្ងន់ទោស និងបទធ្វើឱ្យខូចខាតដោយចេតនាមានស្ថានទម្ងន់ទោស តាមមាត្រា២១៨និង៤១១នៃក្រមព្រហ្មទណ្ឌ ប្រព្រឹត្តកាលពីថ្ងៃទី២៦ ខែតុលា ឆ្នាំ២០១៥ នៅក្បែររដ្ឋសភា ។
មេធាវីការពារជនរងគ្រោះលោក ជួង ជួងី ឲ្យដឹងថាកូនក្តី លោក ញ៉យ ចំរើននិងលោក គង់ សភា បានទាមទារសំណងជំងឺចិត្តពីជនជាប់ចោទទាំងបីនាក់ ក្នុងម្នាក់ៗ ១០០លានរៀល និងសូមឲ្យតុលាការផ្តន្ទាទោសទៅតាមផ្លូវច្បាប់ ។ ការផ្តន្ទាទោសខាងលើនេះ គឺតុលាការបានសម្រេចផ្អែកទៅលើបទចោទហិង្សាដោយចេតនាមានស្ថានទម្ងន់ទោស តាមមាត្រា២១៧និង២០១៨នៃក្រមព្រហ្មទណ្ឌកម្ពុជា ។ រីឯបទធ្វើឲ្យខូចខាតដោយចេតនាមានស្ថានទម្ងន់ទោស តាមមាត្រា៤១០,៤១១ នៃក្រមព្រហ្មទណ្ឌត្រូវបានតុលាការអោយជនជាប់ចោទទាំងបី រួចផុតពីបទចោទប្រកាន់ ។
គេចាំបានថា កាលពីថ្ងៃជំនុំជម្រះ ជនជាប់ចោទទាំងបីនាក់ បានឆ្លើយសារភាពថា ពួកគេពិតជាបានវាយតំណាងរាស្ត ្រគណបក្សសង្គ្រោះជាតិពិតប្រាកដមែន ដោយហេតុថា អ្នកតំណាងរាស្ត្រ ទាំងពីររូបនោះ បានស្រែកជេរទៅលើពួកគេថា ពួកអាយ៉ងយួន ទើបធ្វើឲ្យពួកគេខឹងសម្បា ហើយក៏ឈានដល់ការប្រើអំពើហិង្សាតែម្តង ។ ជនជាប់ចោទទាំងបីនាក់បានបន្តថា ពួកគេសូមបដិសេធទាំងស្រុងនូវបទចោទធ្វើឲ្យខូចខាតដោយចេតនា មានស្ថានទម្ងន់ទោសតាមមាត្រា៤១០,៤១១នៃក្រមព្រហ្មទណ្ឌ ដោយសំអាងហេតុថា ពួកគេមិនបានវាយបំផ្លាញរថយន្តជនរងគ្រោះនោះឡើយ ។
ជនជាប់ចោទទាំង៣នាក់ បានចេញមកបង្ហាញខ្លួន នៅចំពោះមុខគណៈកម្មការស្រាវជ្រាវស៊ើបអង្កេត ករណីបង្ករបួសស្នាម លើអ្នកតំណាងរាស្ត្ររបស់ក្រសួងមហាផ្ទៃ កាលពីវេលាម៉ោង០៤ និង៣០នាទី រសៀលថ្ងៃទី០៣ ខែវិច្ឆិកា ឆ្នាំ២០១៥ កន្លងទៅ បន្ទាប់ពីការអំពាវនាវជាសាធារណៈរបស់សម្តេចតេជោ ហ៊ុន សែន ក្រោយពេលដែលពួកគេ បានធ្វើសកម្មភាពហិង្សា លើអ្នកតំណាងរាស្ត្រគណបក្សសង្គ្រោះជាតិ លោក គង់ សុភា និង លោក ញ៉យ ចំរើន បណ្ដាលឱ្យរងរបួសធ្ងន់ធ្ងរ និងសន្លប់ នៅក្បែរវិមានរដ្ឋសភា កាលពីវេលាថ្ងៃត្រង់ថ្ងៃទី២៦ តុលា ឆ្នាំ២០១៥ ។
លោក គង់ សភា អ្នកតំណាងរាស្ត្រដែលរងរបួសដោយការវាយដំបានសរសេរនៅក្នុងបណ្តាញហ្វេសប៊ុករបស់លោកថា នៅព្រឹកមិញនេះ តុលាការរាជធានីភ្នំពេញ មិនបានផ្តល់ភាពយុត្តិធម៌ដល់យើងខ្ញុំជាអ្នកតំណាងរាស្ត្រ ដែលរងគ្រោះដោយការព្រួតវាយដំកាលពីថ្ងៃ២៦ ខែតុលា ឆ្នាំ២០១៥ ទេ ។
លោកបានលើកឡើងថា បើធ្វើការប្រៀបធៀបបទល្មើសដែលជនដៃដល់វាយមកលើពួកលោក គឺមានក្រុមមនុស្សជាច្រើន ហើយស្ថានភាពពេលនោះ អាចប្រឈមនឹងការបាត់បង់ជិវិត តែពេលនេះតុលាកាបានផ្តន្ទាទោសជនដៃដល់៤ឆ្នាំ តែអនុវត្តទោស១ឆ្នាំប៉ុណ្ណោះ។ ចំណែកលោក មាជ សុវណ្ណរ៉ា គ្រាន់តែបញ្ចេញមតិ ត្រូវបានកាត់ទោសឲ្យជាប់ឃុំរហូតដល់ទៅ២០ឆ្នាំ តើនេះឬតុលាការយុត្តិធម៌ ?
ចែករំលែកព័តមាននេះ