ដីព្រៃរបស់រដ្ឋប្រមាណជាង១០០ហិកតា ដែលស្ថិតនៅចំណុច (អូរពី) ភ្នំគីង្គក់ ស្ថិតក្នុងភូមិរួតចំប៉ី សង្កាត់អូរស្មាច់ ក្រុងសំរោង ខេត្តឧត្តរមានជ័យ បច្ចុប្បន្នត្រូវគេដឹងថា
ខេត្តឧត្តរមានជ័យ ៖ ដីព្រៃរបស់រដ្ឋប្រមាណជាង១០០ហិកតា ដែលស្ថិតនៅចំណុច (អូរពី) ភ្នំគីង្គក់ ស្ថិតក្នុងភូមិរួតចំប៉ី សង្កាត់អូរស្មាច់ ក្រុងសំរោង ខេត្តឧត្តរមានជ័យ បច្ចុប្បន្នត្រូវគេដឹងថា អតីតសមាជិកក្រុមប្រឹក្សាសង្កាត់អូរស្មាច់ និងបក្សពួកកា.ប់ទន្ទ្រានយកដីបោះបង្គោលព្រំចែកគ្នាលក់ជាបន្ដបន្ទាប់ រហូតកើតមានជម្លោះប្តឹងប្តល់ពលរដ្ឋទៅតុលាការ ។
ទាក់ទិនទៅនឹងការទន្ទ្រានចូលកាន់កា.ប់ដីរបស់រដ្ឋខាងលើនេះ ប្រជាពលរដ្ឋអ្នករស់នៅភូមិរួតចំប៉ី សង្កាត់អូរស្មាច់ ក្រុងសំរោង បានអះអាងឲ្យដឹងថា ដីនៅតំបន់នោះ គឺគាត់បានមកកា.ប់គាស់ និងអាស្រ័យផលដាំដំណាំចេកតាំងពីឆ្នាំ២០០២មកម្ល៉េះ ។ ស្រាប់តែមកដល់ពេលនេះលេចលឺថា ដីនៅតំបន់នោះមានតំម្លៃក៏ឃើញមានឈ្មោះ ពៅ ជាយោធាភូមិភាគទី៤ និងឈ្មោះនិត សុវណ្ណារ៉ា អតីតសមាជិកក្រុមប្រឹក្សាសង្កាត់អូរស្មាច់ យកត្រាក់ទ័រមកឈូកឆាយ កា.ប់ទន្ទ្រានដីព្រៃ និងបោះបង្គោលព្រំរបងរំលោ.ភមកលើដីរបស់ពួកគាត់តែម្តង ។
ប្រជាពលរដ្ឋនិយាយបន្តថា ក្រុមពួកខាងលើនេះ តែងតែដើរទន្ទ្រានកា.ប់ដីព្រៃម្ដុំចំណុច (អូរពី) ភ្នំគីង្គក់ ស្ថិតក្នុងសង្កាត់អូរស្មាច់ ក្រុងសំរោងនោះ លក់ជាបន្ដបន្ទាប់ ពុំមានអាជ្ញាធរ និងមន្ដ្រីជំនាញពាក់ព័ន្ធណាមួយទៅហាមឃាត់នោះទេ។
បញ្ហានេះប្រជាពលរដ្ឋសំណូមពរទៅអាជ្ញាធរខេត្ត លោកប៉ែន កុសល្យ អភិបាល នៃគណៈអភិបាលខេត្តឧត្តរមានជ័យ និងមន្ត្រីជំនាញពាក់ព័ន្ធ សូមមេត្តាចុះស្រាវជ្រាវស៊ើបអង្កេតលើក្រុមបក្សពួកជនខិលខូចនោះ កុំឲ្យដើរកា.ប់ទន្ទ្រានយកដីបែបអនាធិបតេយ្យតាមតែទំនើងចិត្តដូច្នេះទៀត ។
ពាក់ព័ន្ធការទន្ទ្រានដីរដ្ឋខាងលើនេះដែរ លោក និត សុវណ្ណារ៉ា អតីតក្រុមប្រឹក្សាសង្កាត់អូរស្មាច់ បានអះអាងដែរថា ដីនៅតំបន់ខាងលើនោះ គឺជាដីរបស់ខ្លួនដែលមានការទទួលស្គាល់ពី អតីតលោកចៅសង្កាត់ចាស់ ផេម សំអាត ។
ទាក់ទិននឹងបញ្ហារនេះ លោក អ៊ុក ប៊ុនហេង ចៅសង្កាត់អូរស្មាច់បច្ចុប្បន្ន បានបញ្ជាក់ឲ្យដឹងថា ភាគីជម្លោះដីធ្លីនៅតំបន់អូរពីរ ភ្នំគីង្គក់នោះ ខាងអាជ្ញាធរសង្កាត់ធ្លាប់បានចុះទៅធ្វើការហាមឃាត់ជាច្រើនលើកកន្លងមកហើយ ប៉ុន្តែពលរដ្ឋនឹងយោធា រួមទាំងអតីតសមាជិកក្រុមប្រឹក្សា សង្កាត់ នៅតែចូលទៅកា.ប់ទន្ទ្រានបោះបង្គោលរបង ហ៊ុមព័ទ្ធ ដីនៅតំបន់នោះដដែល រហូត ដល់មានជម្លោះប្រកែកគ្នាជាមួយប្រជាពលរដ្ឋ ឈានដល់ការប្តឹងប្តល់គ្នាទៅដល់តុលាការផងដែរ ។
លោកចៅសង្កាត់អូរស្មាច់ អ៊ុក ប៊ុនហេង ឲ្យដឹងផងដែរថា ករណីនេះ ក្នុងនាមជាអាជ្ញាធរសង្កាត់ លោកបានដាក់របាយការណ៍ជូនដល់អាជ្ញាធរក្រុង និងមន្ទីរកសិកម្ម រុក្ខាប្រមាញ់ និងនេសាទខេត្តរួចហើយ ក្នុងនោះលោកចៅសង្កាត់អះអាងថា ដីនៅតំបន់អូរពីរ ភ្នំគីង្គក់នោះ គឺជាដីរបស់រដ្ឋជាង១០០ហិកតា ជាប្រភេទដីចំណីអូរបឹង ជ្រោះភ្នំ និងដីសហគមន៍ផងដែរ មិនមានអាជ្ញាធរណាម្នាក់ មានសិទ្ធិចេញប័ណ្ណកម្មសិទ្ធិដីធ្លីបាននោះទេ ។
គួរបញ្ជាក់ផងដែរថា បុគ្គលដែលហ៊ានចេញប្លង់ដីនៅតំបន់ខាងលើនេះ គឺលោកនិត សុវណ្ណារ៉ា អតីតនៅមានតួនាទីជាមេភូមិ និងចៅសង្កាត់រងទី១ ក្នុងជំនាន់លោកផេម សំអាត នៅជាចៅសង្កាត់ បច្ចុប្បន្នចូលនិវត្តន៍ ដែលចេញប្លង់ឲ្យបក្សពួក និងគ្រួសាររបស់ខ្លួន និត ម៉ារ៉ាឌី មានដីទំហំ៥០២៤០ម៉ែត្រក្រឡា) ក្នុងនោះមានឈ្មោះ សេង សុគន្ធា មានទំហំទទឹង១០០ម៉ែត្រ និង បណ្ដោយ៥០០ម៉ែត្រ ដែលមានចុះទទួលស្គាល់ដោយលោក និត សុវណ្ណារ៉ា នេះតែម្ដង និងមានឈ្មោះ និត សុវណ្ណារ៉ា ខ្លួនឯងមិនដាក់ បណ្ដោយទទឹងទេ ដាក់តែទំហំសរុប ១៣៣២៥០ ម៉ែត្រក្រឡាទៅលើដីរដ្ឋ ដែលអ្នកផ្សេងគេធ្វើអត់បាន តែក្រុមគាត់នោះ ធ្វើបានប្លង់គូសដោយដៃ គ្មានការទទួលស្គាល់ពីមន្ទីរជំនាញឡើយ។
ព័ត៌មានពិស្តានឹងមានផ្សាយជូននៅលើកាសែតកោះសន្តិភាព ៕
ចែករំលែកព័តមាននេះ