ខេត្តកំពត ៖ នៅព្រឹកថ្ងៃទី២៧ ខែឧសភា ឆ្នាំ២០១៦នេះ នៅក្នុងសាលប្រជុំស្នងការដ្ឋាននគរបាលខេត្តបានប្រារព្ធពីធីប្រកាសតែងតាំងសម្រួលភារកិច្ច និងបំពាក់ឋានន្តរសក្តិជូនមន្ត្រីនគរបាលនៃស្នងការដ្ឋាននគរបាលខេត្ត។ ពិធីនេះប្រព្រឹត្តទៅក្រោមអធិបតីភាពឯកឧត្តមនាយឧត្តមសេនីយឯក ដូង សារឿន អនុប្រធាននាយកដ្ឋានបុគ្គលិក តំណាងដ៍ខ្ពង់ខ្ពស់ ឯកឧត្តមនាយឧត្តម សេនីយ ឯក នេត សាវឿន អគ្គស្នងការនគរបាលជាតិ ឯកឧត្តម ស៊ុក សារ៉ាដ អភិបាលរងខេត្ត និងលោកឧត្តមសេនីយត្រី ម៉ៅ ចន្ទ័មធុរិទ្ឋ ស្នងការខេត្តកំពត។ វត្តមានចូលរួមជាកិត្តិយសថ្នាក់ដឹកនាំតាមមន្ទីរស្ថាបន័នានា និងថ្នាក់ដឹកនាំកងកម្លាំងប្រដាប់អាវុធនៅក្នុងខេត្តបានចូលរួមយ៉ាងច្រើនកុះករក្នុងពិធីនេះផងដែរ។
ក្នុងពីធីប្រកាសនាពេលនេះមានមន្ត្រីនគរបាលចំនួន៦៣រូប ដែលត្រូវបំពាក់ឋានន្តរសក្តិ តែងតាំងមុខតំណែង និងសម្រួលភារកិច្ចផងដែរ។ ក្នុងនោះមានបំពាក់ឋានន្តរសក្តិថ្នាក់វរៈសេនីយទោ៣រូប ថ្នាក់វរៈសេនីយត្រី៤១រូប ថ្នាក់អនុសេនីយឯក២រូប។ តែងតាំងមុខតំណែងចំនួន១១រូប ផ្ទេរសម្រួលភារកិច្ចចំនួន៦រូប។ ក្នុងការតែងតាំងនិងសម្រួលភារកិច្ចនេះដែរ លោកវរៈសេនីយត្រី តាន់ សារ៉ាវុទ្ឋ អនុប្រធានការិយាលយ័សរុបនៃស្នងការដ្ឋាននគរបាលខេត្ត ត្រូវបានតែងតាំងជាអធិការនគរបាលស្រុកដងទង់ ជំនួសលោកវរៈសេនីយទោ ទូច ឌន អធិការនគរបាលស្រុកដងទង់ដែលឡើងមកទទួលតំណែងថ្មីជានាយការិយាល័យប្រឆាំងបទល្មើសគ្រឿងញៀននៃស្នងការដ្ឋានខេត្ត។
ឯកឧត្តម ស៊ុក សារ៉ាដ អភិបាលរងខេត្តបានវាយតម្លៃខ្ពស់ចំពោះកិច្ចខិតខំប្រឹងប្រែងរបស់កងកម្លាំងគ្រប់ប្រភេទ ដែលជានិច្ចកាលបានរួមសហការណ៍ល្អជាមួយអាជ្ញាធរគ្រប់ថ្នាក់ដើម្បីចូលរួមសុខទុក្ខជាមួយប្រជាពលរដ្ឋនៅទូទាំងខេត្តដូចជាការចុះចែកទឹកជូនប្រជាពលរដ្ឋដែលជួបគ្រោះរាំងស្ងួតនាពេលកន្លងមក។ ជាពិសេសកម្លាំងនគរបាលខេត្តមិនត្រឹមតែចុះយុទ្ឋនាការចែកទឹកជូនប្រជាពលរដ្ឋប៉ុណ្ណោះទេ ថែមទាំងការចុះល្បាតទាំងយប់ទាំងថ្ងៃក្តាប់និងបង្ក្រាបរាល់បទល្មើសផ្សេងៗដែលកើតមានឡើងនៅគ្រប់មូលដ្ឋានទូទាំងខេត្តដោយសហការណ៍បានល្អជាមួយអាជ្ញាធរ និងសមត្ថកិច្ចនៅតាមមូលដ្ឋានផងដែរ។
ឆ្លៀតក្នុងឱកាសនេះដែរ ឯកឧត្តមឧត្តមសេនីយឯក ដូង សារឿន អនុប្រធាននាយកដ្ឋានបុគ្គលិក តំណាងដ៍ខ្ពង់ខ្ពស់នាយឧត្តមសេនីយ នេត សាវឿនអគ្គស្នងការនគរបាលជាតិបានថ្លែងមតិសំណេះសំណាលដល់មន្ត្រីនគរបាលដែលទើបនឹងបំពាក់ឋានន្តរសក្តិសម្រួល និងតែងតាំងភារកិច្ចថ្មី សូមឲ្យគោរពនូវវិនយ័បទបញ្ជាផ្ទៃក្នុងឲ្យបានល្អ គោរពការចាត់តាំងបញ្ជាពីថ្នាក់ដឹកនាំអង្គភាពឲ្យបានម៉ឺងម៉ាត់បំផុត ត្រូវទទួលខុសត្រូវខ្ពស់ចំពោះតួនាទី និងភារកិច្ចរបស់ខ្លួន ចេះសាមគ្គីភាពរវាងកងកម្លាំងដូចគ្នា ក៏ដូចជាការរួមសុខរួមទុក្ខជាមួយប្រជាពលរដ្ឋដែលមានទុក្ខលំបាកដោយប្រការណាមួយផងដែរ។
ជាមួយគ្នានេះ ឯកឧត្តមក៏បានពាំនាំការសាកសួរសុខទុក្ខពីសំណាក់ថ្នាក់ដឹកនាំអគ្គស្នងការនគរបាលជាតិក៏ដូចជាសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃចំពោះមន្ត្រីនគរបាលទាំងអស់នៅទូទាំងខេត្តកំពតនេះផងដែរ។ ឯកឧត្តមបានថ្លែងអំណរគុណចំពោះអាជ្ញាធរខេត្តដែលបានសហការណ៍ល្អជាមួយកម្លាំងនគរបាលខេត្តនាពេលកន្លងមក ក៏ដូចជាបច្ចុប្បន្ននេះដែរ ធ្វើឲ្យរាល់សភាពការបទល្មើសនានាមានការថយចុះគួរឲ្យកត់សម្គាល់ និងទទួលបានជោគជ័យជាផ្លែផ្កាផងដែរ៕
ចែករំលែកព័តមាននេះ