រាជធានីភ្នំពេញ ៖ បន្ទាប់ពីការប្រកួតដ៏ស្វិតស្វាញអស់រយៈពេលបួនខែមកនេះ អ្នកគាំទ្របាល់ទះនៅទូទាំងប្រទេសកម្ពុជា មានអារម្មណ៍រំភើបជាខ្លាំង ដោយការប្រកួតនេះបានឈានដល់វគ្គផ្ដាច់ព្រ័ត្រហើយ
រាជធានីភ្នំពេញ ៖ បន្ទាប់ពីការប្រកួតដ៏ស្វិតស្វាញអស់រយៈពេលបួនខែមកនេះ អ្នកគាំទ្របាល់ទះនៅទូទាំងប្រទេសកម្ពុជា មានអារម្មណ៍រំភើបជាខ្លាំង ដោយការប្រកួតនេះបានឈានដល់វគ្គផ្ដាច់ព្រ័ត្រហើយ សម្រាប់កម្មវិធីប្រកួតជើងឯកបាល់ទះថ្នាក់ជាតិរបស់ស្រាបៀរលីអូ ឆ្នាំ២០១៦ និងតម្រូវឱ្យក្រុមនីមួយៗខិតខំហ្វឹកហាត់បន្ថែមទៀតដើម្បីដណ្ដើមយកជ័យលាភីពានរង្វាន់ប្រចាំឆ្នាំនេះ ។
នៅក្នុងសន្និសីទសារព័ត៌មានមួយកាលពីថ្ងៃទី២៤ ឧសភា ២០១៦ នៅសណ្ឋាគារណាហ្កាវើលកន្លងមកនេះ កញ្ញា កាន់ជីត ផែវផាន់ឈូ ប្រធានគ្រប់គ្រងយុទ្ធសាស្ត្រទីផ្សារប្រចាំតំបន់របស់ក្រុមហ៊ុនស្រាបៀរលីអូ បានឱ្យដឹងថា ការប្រកួតបាល់ទះឆ្នាំនេះកាន់តែមានភាពអធឹកអធមជាងពេលមុនៗ ។ ចាប់តាំងពីឆ្នាំ២០១២មក យើងទទួលបានការសហការចូលរួមរបស់ក្រុមកីឡាករក៏ដូចជាអ្នកទស្សនាគាំទ្រយ៉ាងច្រើនកុះករទូទាំងខេត្តនិងរាជធានីមានដូចជា រាជធានីភ្នំពេញ ខេត្តព្រះសីហនុ កំពង់ចាម បាត់ដំបង និងសៀមរាប ។
កញ្ញាបន្តថា យើងរីករាយយ៉ាងខ្លាំងចំពោះការមានចំណែកជួយជំរុញវិស័យកីឡាបាល់ទះកម្ពុជា ឱ្យមានកម្រិតស្តង់ដារលំដាប់ថ្នាក់ជាតិក៏ដូចជាជួយដល់យុវវ័យឱ្យងាកមកលេងកីឡាដែលធ្វើឱ្យមានកាយសម្បទារឹងមាំនិងនាំមកនូវមិត្តភាព សាមគ្គីភាព ជាពិសេសសូមថ្លែងអំណរគុណដល់សហព័ន្ធកីឡាបាល់ទះកម្ពុជា ដែលនៅតែបន្តជួយគាំទ្រ និងអនុញ្ញាតឱ្យស្រាបៀរលីអូជាចំណែកមួយដើម្បីលើកស្ទួយវិស័យបាល់ទះក្នុងសង្គមជាតិកម្ពុជា តាមរយៈព្រឹត្តិការណ៍ប្រកួតបាល់ទះថ្នាក់ជាតិឆ្នាំទី៥នេះផងដែរ ។
លោក បឹង គឹមតោ អគ្គលេខាធិការសហព័ន្ធកីឡាបាល់ទះកម្ពុជា បានឱ្យដឹងថា កម្មវិធីប្រកួតជើងឯកបាល់ទះថ្នាក់ជាតិរបស់ស្រាបៀរលីអូឆ្នាំ២០១៦ បានចាប់ផ្តើមវគ្គប្រកួតជម្រុះនៅថ្ងៃទី២៣ ខែកុម្ភៈ នៅរាជធានីភ្នំពេញ និងបញ្ចប់នៅថ្ងៃទី២២ ខែឧសភា នៅខេត្តសៀមរាប ដោយបានជ្រើសរើសក្រុមខ្លាំងចំនួន១០មកពីតំបន់ផ្សេងគ្នា រួមមានរាជធានីភ្នំពេញ ខេត្តព្រះសីហនុ បាត់ដំបង កំពង់ចាម និងខេត្តសៀមរាប ដើម្បីដណ្តើមជើងឯករបស់ Division B ចាប់ពីថ្ងៃទី៥ដល់ថ្ងៃទី១២ ខែមិថុនា ឆ្នាំ២០១៦ ។
ដោយឡែកក្នុងក្របខ័ណ្ឌ Division A មាន៨ក្រុម ក្នុងនោះ៦ក្រុមគឺជាក្រុមដែលលេងល្អបំផុត កាលពីឆ្នាំ២០១៥ និង២ក្រុមទៀតមកពី ក្របខ័ណ្ឌ Division B ដែលនឹងធ្វើការប្រកួត ចាប់ពីថ្ងៃទី១៤ដល់១៩ ខែមិថុនា ឆ្នាំ២០១៦ ។
លោកបន្តថា ការចាប់ឆ្នោតចែកពូលប្រកួត នៅក្នុងក្របខ័ណ្ឌ Division B នឹងប្រព្រឹត្តទៅ នាថ្ងៃទី៥ ខែមិថុនា នៅពហុកីឡដ្ឋានជាតិ ខណៈការចាប់ឆ្នោតចែកពូលក្នុងក្របខ័ណ្ឌ Division A ធ្វើឡើងនាថ្ងៃនេះតែម្តង ដោយចែកចេញជា២ពូល គឺពូល A និងពូល B ក្នុងនោះពូល A មានក្រុម Division B ក្រុមកងពលធំអន្តរាគមន៍លេខ៣, ក្រុមសាខាខេត្តកំពង់ចាម និងក្រុមបញ្ជាការដ្ឋានអង្គរក្ស។ ដោយឡែកពូលB មានក្រុមក្រសួងមហាផ្ទៃ ក្រុមវិសាខា ក្រុមលេខ២ ក្នុងDivision B និងក្រុមស្នងការដ្ឋាននគរបាលខេត្តបាត់ដំបង ។
គួរបញ្ជាក់ថា ក្នុងកម្មវិធីប្រកួតបាល់ទះថ្នាក់ជាតិពានរង្វាន់ស្រាបៀរលីអូនេះ រង្វាន់សរុបទាំងអស់នៃកម្មវិធីប្រកួតជើងឯកបាល់ទះថ្នាក់ជាតិរបស់ស្រាបៀរលីអូ ឆ្នាំ២០១៦នេះគឺ២ម៉ឺន២ពាន់ដុល្លារអាមេរិក ។ សម្រាប់វគ្គផ្ដាច់ព្រ័ត្រទាំង Division A និង Division B នឹងមានការផ្សាយបន្តផ្ទាល់តាមកញ្ចក់ទូរទស្សន៍ MyTV ផងដែរ ៕
ចែករំលែកព័តមាននេះ