រាជធានីភ្នំពេញ ៖ តាំង សីហា មកពីក្លិបកងពលតូចលេខ៧០ បានណាត់ជួប ញ៉ែ សិដ្ឋ មកពីក្លិបអេភូថងកីឡាសាកកណ្ដាប់ដៃគ្នា រីឯ សុខ ទូ មកពីក្លិបឃ្លាំងមឿងកីឡា ជួបប្រកួតជាមួយឡុង ជិន មកពីក្លិបខ្លារខិនមានរិទ្ធ
រាជធានីភ្នំពេញ ៖ តាំង សីហា មកពីក្លិបកងពលតូចលេខ៧០ បានណាត់ជួប ញ៉ែ សិដ្ឋ មកពីក្លិបអេភូថងកីឡាសាកកណ្ដាប់ដៃគ្នា រីឯ សុខ ទូ មកពីក្លិបឃ្លាំងមឿងកីឡា ជួបប្រកួតជាមួយឡុង ជិន មកពីក្លិបខ្លារខិនមានរិទ្ធនៅលើសង្វៀនស៊ីអិនស៊ីថ្ងៃអាទិត្យទី២០ ឧសភា ខានស្អែកនេះ ។
តាំង សីហា និងញ៉ែ សិដ្ឋ សុទ្ធតែជាអ្នកប្រដាល់ជើងថ្មីដូចគ្នា និងមិនធ្លាប់ជួបគ្នានៅលើសង្វៀនពីមុនមកឡើយ ។ សម្រាប់ការប្រកួតលើកនេះ អត់មានអ្នកណាហ៊ានវាយតម្លៃ ថាអ្នកណាខ្លាំងជាងអ្នកណាទេ ។ ប៉ុន្តែបើតាមដឹងពេជ្រ សីហា គឺជាអ្នកប្រដាល់មួយរូបដែលមានចិត្តសឿងគ្រាន់បើ ម្យ៉ាងវិញទៀតល្បិចប្រយុទ្ធនៅលើសង្វៀនរបស់គេល្អគួរសម ។ ស្នៀតកែង និងជង្គង់អាចប្រើការបានគ្រាន់តែកម្លាំងរបស់គេរាងខ្សោយបន្តិច ប៉ុន្តែបើប្រៀបធៀបជាមួយញ៉ែ សិដ្ឋ មិនដូចគ្នានោះទេ។ ញ៉ែ សិដ្ឋ ចិត្តតូចខ្លាំងណាស់ ល្បិចប្រយុទ្ធក៏នៅស្ទើរដែរ មិនតែប៉ុណ្ណោះរាល់ការទាត់និងម៉ាត់ចេញក៏មិនសូវជារហ័សរហួនទៀត ។ គូនេះសម្រាប់អ្នកដែលធ្លាប់តាមដានការប្រកួតគេមានជំនឿចិត្តលើតាំង សីហា ច្រើនជាង ។
ចំណែកការជួបគ្នារវាងឡុង ជិន និងសុខ ទូ វិញក៏មិនអាចទាយទុកមុនបានដូចគ្នា ។ គូនេះមិនធ្លាប់ជួបប្រកួតគ្នាពីមុនមកប៉ុន្តែអ្នកប្រដាល់ជើងថ្មីទាំង២រូបនេះ មានល្បិចប្រយុទ្ធមិនលើសគ្នាទេ ។ ឡុង ជិន មានផ្លែកែងល្អ ចលនាវាយចេញរហ័សរហួនគ្រាន់បើប៉ុន្តែគេមិនហ៊ានមើលស្រាលលើសុខ ទូ ឡើយ។ សុខ ទូ ល្បិចប្រយុទ្ធរបស់គេមិនចាញ់អ្នកប្រដាល់ជើងចាស់ប៉ុន្មាន ទាំងស្នៀតកែង និងជង្គង់ អាចប្រើការបានយ៉ាងល្អបំផុត ប៉ុន្តែមានចរិតមួយមិនចេះមើលស្រាលលើគូប្រកួត ។ ដូច្នេះសម្រាប់ការ ប្រកួតលើកនេះ ទាំង ឡុង ជិន និង សុខ ទូ សុទ្ធតែមិនអាចមានការធ្វេសប្រហែសដូចគ្នា ។
ប៊ុន សុធា មកពីសមាគមកីឡាប្រដាល់ក្រសួងការពារជាតិ ជួបប្រកួតជាមួយ សាង សីមកពីក្លិបឃ្លាំងមឿងកីឡា ។ គង់ វិរៈ មកពីក្លិបសុភានូមានជ័យ ជួបប្រកួតជាមួយ ម៉ន
វីវ៉ា មកពីក្លិបការិយាល័យទី៥កងទ័ពជើងគោក។ ជា ចាន់ស្រេង មកពីក្លិបកងពលតូចអន្តរាគមន៍លេខ៨ភ្នំទ្រព្យ ប្រកួតជាមួយឡៅ រតនា មកពីក្លិបកងទ័ពឆត្រយោង៩១១ ៕
ចែករំលែកព័តមាននេះ