រាជធានីភ្នំពេញ ៖ ក្រៅពីការប្រកួតអន្តរជាតិនៅរសៀលថ្ងៃសៅរ៍នេះ នៅលើសង្វៀនទូរទស្សន៍អាស៊ីអាគ្នេយ៍ក៏មានការប្រកួតចំនួន៤គូរវាងកីឡាករកម្ពុជា និងកីឡាករបរទេសផងដែរនៅថ្ងៃអាទិត្យទី២៩ ឧសភា ខានស្អែក។
រាជធានីភ្នំពេញ ៖ ក្រៅពីការប្រកួតអន្តរជាតិនៅរសៀលថ្ងៃសៅរ៍នេះ នៅលើសង្វៀនទូរទស្សន៍អាស៊ីអាគ្នេយ៍ក៏មានការប្រកួតចំនួន៤គូរវាងកីឡាករកម្ពុជា និងកីឡាករបរទេសផងដែរនៅថ្ងៃអាទិត្យទី២៩ ឧសភា ខានស្អែក។ កីឡាករទាំង៨នឹងបង្ហាញខ្លួន៤រូបនៅក្នុងការប្រកួតពេលព្រឹក និង៤រូបនៅក្នុងការប្រកួតពេលរសៀលដោយក្នុងមួយព្រឹត្តិការណ៍ៗគឺមានកីឡាករខ្មែរ២រូប និងបរទេស២រូប ខណៈដែលពេលល្ងាចក្នុងថ្ងៃដដែលក៏មានការប្រកួតបាល់ទាត់រវាងក្រុមកម្ពុជា និងទីម័រខាងកើត។
សម្រាប់ព្រឹតិ្តការណ៍ «Ganzburg Top Fighter» ដែលចាប់ផ្ដើមពីម៉ោង៨ព្រឹក កីឡាករ កីឡាករ យុគ យក្សផ្លែ មកពីក្លិបអប់រំកាយនិងកីឡាខេត្តបាត់ដំបង ប៉ះគ្នាជាមួយកីឡាករថៃឈ្មោះផា យ៉ាណន់ និងកីឡាករសុខ សុវណ្ណ មកពីសមាគមកីឡាក្រសួងការពារជាតិ ប៉ះគ្នាជាមួយកីឡាករថៃឈ្មោះអានុ វ៉ាត់ ។ សំអាងលើប្រវត្តិប្រកួតបាន១៤៣លើក ឈ្នះ១២៤លើក ចាញ់១៤លើក និងស្មើ៥លើក កីឡាករយុគ យក្សផ្លែ ហាក់មានទុនច្រើនក្នុងការសង្ឃឹមឈ្នះលើគូប្រកួតជាកីឡាករថៃដែលទើបតែប្រកួតបាន៩៣លើក ឈ្នះ៧៦លើក និងចាញ់១៧លើក ។
យ៉ាងណាមិញ មន្ត្រីជាអ្នកដឹកនាំកីឡាករថៃឲ្យមកប្រកួតក៏មានជំនឿចិត្តទៅលើកីឡាកររបស់ខ្លួនដូចគ្នា ដោយអះអាងថា គេប្រកួតបានតិចជាងមែន ប៉ុន្តែសមត្ថភាពគេខ្លាំងហើយកម្រិតវាយលុកក៏ល្អ។ មិនខុសគ្នាដែរកីឡាករ សុខ សុវណ្ណ ដែលធ្លាប់ប្រកួត៧០លើក ឈ្នះ៥៦លើក ចាញ់១២លើក និងស្មើ២លើក ក៏មានជំនឿចិត្តថានឹងទទួលជ័យជម្នះផងដែរ បើទោះជាកីឡាករថៃជាគូប្រកួតរបស់ខ្លួនធ្លាប់ប្រកួតបានដល់១០៦លើក ឈ្នះ៨៥លើក ចាញ់១៧លើក និងស្មើ៤លើក ដែលមានន័យថាកីឡាករថៃមានបទពិសោធន៍ឡើងរេញបានច្រើនជាងដាច់ឆ្ងាយ ។ គូនេះអ្នកឃ្លាំមើលទុកចិត្តកីឡាករថៃ ប៉ុន្តែលោកធន់ សុភា ជាគ្រូបង្វឹកបានយល់ឃើញថា កីឡាករសុខ សុវណ្ណ ជាកូនសិស្សរបស់លោកនឹងអាចទៅរួចសម្រាប់ការប្រកួតព្រឹកខានស្អែក ។ ទោះបីយ៉ាងណាចំពោះលទ្ធផលជាក់ស្ដែងគឺមានតែការប្រកួតត្រូវបានបញ្ចប់ប៉ុណ្ណោះទើបអាចកាត់ក្ដីបាន ។
សម្រាប់សមាសភាព៤រូបផ្សេងទៀតនៅថ្ងៃអាទិត្យនោះដែរ គឺកីឡាករ មាស ច័ន្ទមាន មកពីសមាគមកីឡាប្រដាល់ក្រសួងការពារជាតិ ត្រូវប្រកួតជាមួយកីឡាករអង់គ្លេសឈ្មោះគីរ៉ន ចេសសូប និងកីឡាករកម្ពុជាឈ្មោះ ផង់ សុភាព មកពីក្លិបរាជសីហ៍ខេត្តរតនគីរី ត្រូវប្រកួតជាមួយកីឡាករថៃឈ្មោះផាយ៉ាក់ ណយ។ ការប្រកួតរបស់កីឡាករទាំង៤មិនគ្រាន់តែជាការប្រកួតចាញ់ឈ្នះ ដើម្បីស្ទាបស្ទង់សមត្ថភាពនោះទេ ប៉ុន្តែក៏ការប្រកួតដណ្ដើមពិន្ទុសម្រាប់បោះជំហានទៅរកការដណ្ដើមចំណាត់ថ្នាក់ជើងឯកផងដែរ។ អ្នកទាំង៤នឹងប៉ះគ្នានៅក្នុងព្រឹត្តិការណ៍ប្រដាល់ជើងឯកអន្តរជាតិស្រាបៀរកម្ពុជាលើកទី២ក្នុងជុំទី២ ចាប់ពីម៉ោង២រសៀលទៅ បន្ទាប់ពីព្រឹត្តិការណ៍នេះត្រូវបានដំណើរការបានមួយជុំម្នាក់រួចទៅហើយសម្រាប់កីឡាករកម្ពុជា និងបរទេសទាំង៨ ។
កីឡាករមាស ច័ន្ទមាន គឺជាម្ចាស់ខ្សែក្រវាត់ក្នុងព្រឹត្តិការណ៍មួយរួចហើយរបស់ទូរទស្សន៍អាស៊ីអាគ្នេយ៍ ប៉ុន្តែក្នុងជុំទី១គេរក៣ពិន្ទុមិនបាននោះទេ ទើបក្នុងជុំនេះត្រូវការឈ្នះដាច់ខាត ។ ឆ្លងកាត់ការប្រកួតបាន១០៩លើក ឈ្នះ៨៥លើក និងចាញ់២៤លើក មាស ច័ន្ទមាន សង្ឃឹមឈ្នះច្រើន ខណៈដែលកីឡាករអង់គ្លេសទើបតែប្រកួតបាន៣៦លើក ឈ្នះ៣០លើក និងចាញ់៦លើក ។ សម្រាប់ការប្រកួតដណ្ដើមពិន្ទុមួយគូទៀត ផង់ សុភាព ធ្លាប់ប្រកួតបាន៧០លើក ឈ្នះ៥៧លើក ចាញ់១១លើក និងស្មើ២លើក ក្នុងពេលដែលកីឡាករថៃ ធ្លាប់ប្រកួត៨០លើក ឈ្នះ៦៨លើក ចាញ់១១លើក និងស្មើ១លើកដែលមានសមត្ថភាពមិនធម្មតា ។ ការប្រកួតជុំមុន កីឡាករផង់ សុភាពមាន៣ពិន្ទុ មាស ច័ន្ទមាន១ពិន្ទុ កីឡាករថៃមាន៣ពិន្ទុ និងកីឡាករអង់គ្លេសមាន១ពិន្ទុ ៕
ចែករំលែកព័តមាននេះ