ព្រឹតិ្តការណ៍ប្រកួតប្រជែងបវរកញ្ញាហុងកុងប្រចាំឆ្នាំបានក្លាយជាទីពេញចិត្តសម្រាប់ទូរទស្សន៍ TVB ដើម្បីស្វែងរកបេក្ខនារីដែលមានទេពកោសល្យ ថ្មីៗ ។ ស្ថិតក្នុងកិច្ចប្រឹងប្រែងដើម្បីបង្កើនចំនួនអ្នកទស្សនា និងដើម្បីលើកកម្ពស់តារាសម្តែងជំនាន់ថ្មី ទូរទស្សន៍ហុងកុង TVB បានសម្រេចចិត្តបន្ថែមបេក្ខនារីចូលរួមប្រកួតក្នុងព្រឹត្តិការណ៍បវរកញ្ញាហុងកុងក្នុងឆ្នាំ២០១៦ ពី២០នាក់ទៅ៥០នាក់ ។
ដើម្បីទាក់ទាញបេក្ខនារីកាន់តែច្រើនថែមទៀតក្រុមហ៊ុននឹងជ្រើសរើសយកបេក្ខភាពមានសក្កានុពលពីក្រៅប្រទេស ។ ពោលគឺអ្នកតំណាងទូរទស្សន៍ TVB មួយចំនួននឹងធ្វើដំណើរទៅកាន់ប្រទេសកាណាដើម្បីស្វែងរកបេក្ខនារីនៅខែមិថុនា ។ លើសពីនេះទៅទៀតបេក្ខនារីប្រចាំឆ្នាំ២០១៦ នឹងធ្វើដំណើទៅកាន់ទីតាំងទេសចរណ៍ ល្បីៗសម្រាប់ការថតរឿងរាប់ទាំងប្រទេសជប៉ុន និងប្រទេសកូរ៉េខាងត្បូងផងដែរ។ តារា ល្បីៗច្រើនរូបរបស់ប្រទេសទាំងពីរនេះនឹងត្រូវទីភ្នាក់ងារទូរទស្សន៍អញ្ជើញឱ្យចូលរួមក្នុងដំណើការកាត់សេចក្តីទៀតផង ។
អតីតបវរកញ្ញាហុងកុង ២០១៣ ចំណាត់ថ្នាក់ទី២ និងបច្ចុប្បន្នជាតារាសម្តែងឱ្យ TVB នាង Sisley Choi និយាយថា «នាងខ្ញុំគាំទ្រចំពោះគម្រោងថ្មីនេះ ។ វាគឺជារឿងដ៏ល្អមួយ។ កាលពីមុនមានតែបេក្ខនារីចំនួន២០នាក់ប៉ុណ្ណោះចូលរួមក្នុងព្រឹត្តិការណ៍បវរកញ្ញាហុងកុង តែពេលនេះចំនួនចូលរួមនឹងកើនដល់៥០នាក់ពោលគឺនឹងមានវត្តមានបេក្ខនារី ស្អាតៗក្នុង និងក្រៅប្រទេសចូលរួមធ្វើឱ្យកម្មវិធីកាន់តែអស្ចារ្យ និងមានអត្ថន័យបំផុតសម្រាប់បេក្ខនារីដែលឈ្នះ ព្រមទាំងគ្រងមកុដក្នុងនាមជាបវរកញ្ញាស្អាតទាំងសម្រស់ និងមានគុណភាព» ។
នាង Moon Lau អតីតបវរកញ្ញាហុងកុងជាប់ចំណាត់ថ្នាក់ទី៣ បានសម្តែងការយល់ឃើញស្រដៀងនាង Sisley Choi ថា «មានបេក្ខនារីច្រើនជារឿងល្អ ។ វានឹងផ្តល់ឱ្យទស្សនិកជននូវជម្រើសច្រើនក្នុងការបោះឆ្នោត។ ពួកនាងរីករាយនឹងទស្សនាការសម្តែងជាច្រើនទម្រង់» ។
ការប្រកួតបវរកញ្ញាហុងកុងបង្កើតឡើងកាលពីឆ្នាំ១៩៧៣ ដែលជាការរៀបចំកម្មវិធីដោយទូរទស្សន៍ហុងកុងឈានមុខគេ TVB។ គិតមកដល់ពេលបច្ចុប្បន្ននេះកម្មវិធីមានរយៈពេល៤៣ឆ្នាំហើយ ដោយមានការប្រារព្ធធ្វើឡើងជារៀងរាល់ឆ្នាំបន្ទាប់ពីបង្កើតឡើង ៕
ចែករំលែកព័តមាននេះ