ខេត្តប៉ៃលិន ៖ ការនិយាយបង្អាប់លេងរបស់មិត្តភក្តិរួមថ្នាក់ជាមួយគ្នា ធ្វើឱ្យក្មេងប្រុសម្នាក់គិតខ្លី រហូតឈានដល់បោះបង់ការសិក្សាទាំងនៅវ័យក្មេង ខណៈរូបគេរស់នៅក្នុងគ្រួសារដែលមានជីវភាពក្រីក្រ ។
ខេត្តប៉ៃលិន ៖ ការនិយាយបង្អាប់លេងរបស់មិត្តភក្តិរួមថ្នាក់ជាមួយគ្នា ធ្វើឱ្យក្មេងប្រុសម្នាក់គិតខ្លី រហូតឈានដល់បោះបង់ការសិក្សាទាំងនៅវ័យក្មេង ខណៈរូបគេរស់នៅក្នុងគ្រួសារដែលមានជីវភាពក្រីក្រ ។ ហើយជារៀងរាល់ថ្ងៃតែងតែដើរពីផ្ទះទៅសាលារៀន ចម្ងាយជាង២គីឡូម៉ែត្រ លុះទៅដល់សាលាចូលថ្នាក់រៀនក្រោយគេ ត្រូវមិត្តភក្តិបង្អាប់ចុះឡើងៗ ក៏សម្រេចចិត្តបោះបង់ការសិក្សាត្រឹមថ្នាក់ទី៥តែម្តង ។
ក្មេងប្រុសដែលខ្មាសគេឈប់រៀនត្រឹមត្រឹមសាលាបឋមថ្នាក់ទី៥មានឈ្មោះ គឹម ម៉ៅ អាយុ១៥ឆ្នាំ មានបងប្អូន៤នាក់ រូបគេជាកូនច្បង មានឪពុកឈ្មោះ អូន អាយុ៤២ឆ្នាំ និងម្តាយឈ្មោះ ដា អាយុ៣៥ឆ្នាំ ជាអ្នកដើរទិញអេតចាយ ដោយបានលែងលះគ្នាអស់រយៈពេលជាច្រើនឆ្នាំមកហើយ រស់នៅភូមិអូរតាពុកលើ សង្កាត់ប៉ៃលិន ក្រុងប៉ៃលិន ។ បើតាមការរៀបរាប់របស់ក្មេងប្រុសខាងលើបានឱ្យដឹងថា រូបគេបានឈប់រៀនអស់រយៈពេលប្រហែល៥ទៅ៦ខែកន្លងមកហើយ ព្រោះតែមិត្តភក្តិបង្អាប់ថា រូបគេដើរទៅរៀនយឺតដោយសារតែអង្គុយសំងំជក់គ្រឿងញៀន ។
ប្រភពដដែលបន្តទៀតថា ជារៀងរាល់ព្រឹករូបគេតែងតែធ្វើដំណើរដោយថ្មើរជើង ព្រោះគ្មានកង់ជិះទៅរៀននឹងគេ ហើយពេលទៅដល់ថ្នាក់ម្តងៗមិត្តភក្តិនាំគ្នាស្រែកហ៊ោថា ជនញៀនថ្នាំ លុះក្រោយមកដោយទ្រាំនឹងសម្តីពួកគេមិនបានក៏សម្រេចចិត្តឈប់រៀនតែម្តងទៅ ។ ក្មេងប្រុសខាងលើបញ្ជាក់ទៀតថា រូបគេកំព្រាឪពុកតាំងពីតូចមកម្លេះ ដោយឪពុកម្តាយលែងលះគ្នាអស់រយៈពេលជាច្រើនឆ្នាំមកហើយ ដោយរាល់ថ្ងៃរូបគេរស់នៅជាមួយម្តាយមីង រីឯប្អូនប្រុសចំនួន៣នាក់ទៀតរស់នៅជាមួយម្តាយ ដើរទិញអេតចាយលក់យកមកទិញអង្ករចិញ្ចឹមជីវិត ។ ដូច្នេះហើយធ្វើឱ្យការរៀនសូត្ររបស់គេមានការលំបាក ទ្រាំដើរទៅរៀនតាំងពីថ្នាក់ទី១រហូតដល់ថ្នាក់ទី៥នៅសាលាបឋមសិក្សាប៉ាហ៊ី រហូតដល់ពេលក្រោយមក រូបគេមិនសូវមានអាហារហូបគ្រប់គ្រាន់ ទើបធ្វើឱ្យរូបរាងស្គមស្គាំង ដូចជាមនុស្សញៀនថ្នាំ លុះមិត្តភក្តិ និងតាយាយចេះតែបង្អាប់ចុះឡើងៗ រូបគេមានអារម្មណ៍ខ្មាសអៀន ក៏បោះបង់ការសិក្សាទាំងចិត្តនៅនឹកអាល័យលោកគ្រូអ្នកគ្រូ និងមិត្តភក្តិដទៃទៀត ។
ជាពិសេសអ្វីដែលរូបគេត្រូវប៉ងធ្វើការងារនៅក្នុងសង្គមក៏បាត់សូន្យដែរ ដោយពេលនេះរូបគេទៅជួយធ្វើការងារនៅផ្ទះ លោកតាបង្កើតរបស់ខ្លួន ជួយជញ្ជូនសាច់គោចេញពីស្តង់យកទៅលក់នៅទីផ្សាររាល់ព្រឹកផងដែរ ។ ទោះបីជាយ៉ាងណាក៏ដោយ ការបង្អាប់បន្តុះធ្វើឱ្យជនរងគ្រោះមានការខ្លាចរអា និងអៀនខ្លួន ដូច្នេះសូមកុំឱ្យធ្វើដូច្នេះដល់អ្នកដទៃទៀត យកល្អគួរតែលើកទឹកចិត្ត និងកោតសរសើរចំពោះក្មេងនោះ ដែលបានខិតខំតស៊ូរៀនសូត្រទើបប្រសើរជាង ៕
ចែករំលែកព័តមាននេះ