អាស៊ានបានក្លាយជាតំបន់សេដ្ឋកិច្ចធំបំផុតទី៧ក្នុងសកលលោក
រាជធានីភ្នំពេញ ៖ ថ្លែងក្នុងពិធីបើកកិច្ចប្រជុំ អគ្គនាយកគយអាស៊ានលើកទី២៥ ដែលប្រារព្ធធ្វើនៅសណ្ឋាគារសូហ្វីតែល ភ្នំពេញ ភូគីត្រា កាលពីថ្ងៃទី២៥ឧសភា លោកទេសរដ្ឋមន្ត្រី
រាជធានីភ្នំពេញ ៖ ថ្លែងក្នុងពិធីបើកកិច្ចប្រជុំ អគ្គនាយកគយអាស៊ានលើកទី២៥ ដែលប្រារព្ធធ្វើនៅសណ្ឋាគារសូហ្វីតែល ភ្នំពេញ ភូគីត្រា កាលពីថ្ងៃទី២៥ឧសភា លោកទេសរដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានលើកឡើងពីជោគជ័យរបស់ប្រទេសអាស៊ាន ក្នុងការជំរុញកំណើនទំហំពាណិជ្ជកម្ម និងការលើកកម្ពស់ឧត្តមភាពប្រកួតប្រជែងសេដ្ឋកិច្ចក្នុងតំបន់ និងពិភពលោក ។
ក្នុងនោះ លោកទេសរដ្ឋមន្ត្រី បានគូសបញ្ជាក់ថា ៖ « ចាប់តាំងពីការបង្កើតសមាគមអាស៊ាននៅឆ្នាំ១៩៦៧ រហូតដល់ការបង្កើតជាសហគមន៍សេដ្ឋកិច្ចអាស៊ាននាឆ្នាំ២០១៥ ប្រទេសអាស៊ានបានប្រែក្លាយខ្លួនជាតំបន់សេដ្ឋកិច្ចដែលមានឧត្តមភាពប្រកួតប្រជែងខ្ពស់ ជាមួយនឹងកំណើនផលិតផលក្នុងស្រុក (GDP) ពី១.៣០០ប៊ីលានដុល្លារអាមេរិកក្នុងឆ្នាំ២០០៧ ទៅដល់២.៦០០ប៊ីលានដុល្លារអាមេរិកក្នុងឆ្នាំ២០១៤ ដែលក្លាយជាតំបន់សេដ្ឋកិច្ចធំបំផុតទី៧ក្នុងសកលលោក » ។
ជាមួយគ្នានេះ លោកបណ្ឌិតបានបន្តថា ៖ « កម្ពុជាបានចូលរួមយ៉ាងសកម្មក្នុងភាពជោគជ័យរបស់អាស៊ាននេះ ។ ជាក់ស្តែង បើយោងតាមការព្យាករនាពេលថ្មីនេះរបស់ធនាគារអភិវឌ្ឍន៍អាស៊ីប្រចាំឆ្នាំ២០១៦ ជាមួយនឹងកំណើនសេដ្ឋកិច្ចខ្ពស់រយៈពេល៥ឆ្នាំជាបន្តបន្ទាប់ ប្រទេសកម្ពុជានឹងក្លាយជាខ្លាសេដ្ឋកិច្ចថ្មីរបស់អាស៊ី » ។
លើសពីនេះ លោកបណ្ឌិត អូន ព័ន្ធមុនីរ័ត្ន ក៏បានលើកឡើងពីសមិទ្ធផលដែលរដ្ឋបាលគយអាស៊ានបានរួមចំណែកក្នុងការបង្កើតសហគមន៍សេដ្ឋកិច្ចអាស៊ាន តាមរយៈការលើកកម្ពស់កិច្ចសម្រួលពាណិជ្ជកម្ម និងបានលើកទឹកចិត្តឲ្យអគ្គនាយកគយអាស៊ានទាំងអស់បន្តខិតខំអនុវត្តផែនការអភិវឌ្ឍគយ និងការងារសមាហរណកម្មគយអាស៊ាន ដើម្បីឈានសម្រេចគោលដៅរបស់ប្រមុខរដ្ឋាភិបាលអាស៊ាន ដែលបានកំណត់ក្នុង «ទស្សនៈសហគមន៍អាស៊ាន២០២៥» ។
គួរបញ្ជាក់ថា អគ្គនាយកដ្ឋានគយ និងរដ្ឋាករកម្ពុជា នៃក្រសួងសេដ្ឋកិច្ចនិងហិរញ្ញវត្ថុបានរៀបចំកិច្ចប្រជុំអគ្គនាយកគយអាស៊ានលើកទី២៥ ដែលប្រព្រឹត្តទៅចាប់ពីថ្ងៃទី២៥ ដល់ថ្ងៃទី២៧ ឧសភា នៅសណ្ឋាគារសូហ្វីតែល ភ្នំពេញ ភូគីត្រា ។ គោលបំណងចម្បងនៃកិច្ចប្រជុំនេះ គឺដើម្បីពិនិត្យនិងពិភាក្សាលើវឌ្ឍនភាពនៃការអនុវត្តផែនការយុទ្ធសាស្ត្រអភិវឌ្ឍន៍គយ និងការងារសមាហរណកម្មគយអាស៊ានរបស់ក្រុមការងារកិច្ចសម្រួលពាណិជ្ជកម្ម និងនីតិវិធីគយ, ក្រុមការងារអនុវត្តច្បាប់គយ និងអនុលោមភាព និងក្រុមការងារកសាងសមត្ថភាពចំណេះដឹងគយ ។
កិច្ចប្រជុំនេះបានប្រារព្ធបើកក្រោមអធិបតីភាពលោកបណ្ឌិត អូន ព័ន្ធមុនីរ័ត្ន ទេសរដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដោយមានការអញ្ជើញចូលរួមពីអគ្គនាយកគយអាស៊ាន ទាំង១០ប្រទេស, ក្រុមប្រឹក្សាពាណិជ្ជកម្ម អាស៊ាន-អាមេរិក, ក្រុមប្រឹក្សាពាណិជ្ជកម្ម អាស៊ាន-អឺរ៉ុប, បញ្ញើរហ័សអាស៊ី-ប៉ាស៊ីហ្វិក និងសភាពាណិជ្ជកម្មកម្ពុជា៕
ចែករំលែកព័តមាននេះ