រាជធានីភ្នំពេញ ៖ នៅថ្ងៃចុងសប្ដាហ៍នេះ ព្រឹត្តិការណ៍កីឡាធំ២ ត្រូវគេកត់សម្គាល់ថា នឹងទទួលបានការចាប់អារម្មណ៍ខ្លាំងពីសំណាក់អ្នកទស្សនាដូចគ្នា ដោយថ្ងៃសៅរ៍ទី២៨ ឧសភា ខានស្អែក កីឡាករកម្ពុជា អ៊ុំ ចំរើន
រាជធានីភ្នំពេញ ៖ នៅថ្ងៃចុងសប្ដាហ៍នេះ ព្រឹត្តិការណ៍កីឡាធំ២ ត្រូវគេកត់សម្គាល់ថា នឹងទទួលបានការចាប់អារម្មណ៍ខ្លាំងពីសំណាក់អ្នកទស្សនាដូចគ្នា ដោយថ្ងៃសៅរ៍ទី២៨ ឧសភា ខានស្អែក កីឡាករកម្ពុជា អ៊ុំ ចំរើន និងកីឡាករមកពីបាងកកគឺ Super Chhai នឹងត្រូវប៉ះគ្នាដណ្ដើមពានជើងឯកនៅសង្វៀនទូរទស្សន៍ប៉ុស្ដិ៍លេខ៥ ។ ដោយឡែកនៅល្ងាចថ្ងៃអាទិត្យទី២៩ ឧសភា នៅពហុកីឡដ្ឋានជាតិអូឡាំពិកឯណោះវិញ ក៏មានការប្រកួតបាល់ទាត់ដ៏កក្រើករវាងក្រុមកម្ពុជា និងក្រុមប្រទេសទីម័រខាងកើត ដែលត្រូវគេជឿជាក់ថា នឹងមានអ្នកចាំទស្សនាកុះករផងដែរ ។
សម្រាប់ព្រឹត្តិការណ៍ទី១ គឺជាការប្រកួតដណ្ដើមជើងឯកដែលត្រូវគេប៉ាន់ស្មានថា នឹងទាក់ទាញអ្នកស្នេហាកីឡាប្រដាល់មិនតិចនោះទេ នៅលើសង្វៀនទូរទស្សន៍ប៉ុស្ដិ៍លេខ៥ត្រើយខាងកើតជ្រោយចង្វា ។ កីឡាករ អ៊ុំ ចំរើន ដែលជាជើងខ្លាំងរបស់កម្ពុជា នឹងប៉ះប្រកួតជាមួយកីឡាករ Super Chhai ដែលជាជើងខ្លាំងតំណាងឱ្យថៃ ។ អ្នកទាំងពីរឈានឡើងវគ្គចុងក្រោយនៅថ្ងៃខានស្អែកនេះ បន្ទាប់ពីឈ្នះជើងខ្លាំងរៀងខ្លួននៅវគ្គពាក់កណ្ដាលផ្ដាច់ព្រ័ត្រ និងក្នុងវគ្គជម្រុះក្នុងពូលកន្លងមក ។ ការប្រកួតនេះ នឹងចាប់ផ្ដើមឡើងនៅម៉ោង៥ល្ងាច គឺមុនមួយថ្ងៃការប្រកួតបាល់ទាត់ដ៏សំខាន់របស់ក្រុមកម្ពុជានៅស្ដាតអូឡាំពិកដែលត្រូវប្រព្រឹត្តឡើង។ អ៊ីចឹងហើយ ទើបការប្រដាល់ក្នុងវគ្គដណ្ដើមជើងឯកមួយនេះ ក៏នឹងធ្វើឱ្យមានអ្នកទស្សនាកកកុញមិនខុសគ្នាផងដែរ ដោយសារតែមនុស្សកាន់តែច្រើនចង់ដឹងថា ជើងខ្លាំងទាំងពីរសញ្ជាតិអ្នកណាក្លាយជាម្ចាស់ពានរបស់ទូរទស្សន៍ប៉ុស្ដិ៍លេខ៥ ។
ការប្រកួតសម្រាប់ព្រឹត្តិការណ៍នេះ កើតឡើង៣លើកមកហើយ ដោយលើកទី១កីឡាករថៃកាន់ពាន លើកទី២កីឡាករកម្ពុជាជាអ្នកកាន់ពាន និងលើកទី៣នេះ ស្ថិតក្នុងការប្រទាញប្រទង់រវាងកីឡាករកម្ពុជា និងថៃ ដែលសុទ្ធតែមានឱកាសធ្វើជាម្ចាស់ជើងឯកដូចគ្នា ។
លោក សេង កដិកា អ្នករៀបចំការប្រកួតប្រចាំនៅប៉ុស្ដិ៍លេខ៥បានអះអាងថា ផ្អែកតាមការប្រកួត កីឡាករ អ៊ុំ ចំរើន និងSuper Chhaiនឹងធ្វើឱ្យកក្រើកសង្វៀនទូរទស្សន៍ប៉ុស្ដិ៍លេខ៥ ដោយលោករំពឹងយ៉ាងច្រើនថា ការប្រកួតចុងក្រោយរវាងកីឡាករទាំងពីរនឹងមានអ្នកទស្សនាកកកុញមិនអន់ជាងការប្រកួតបាល់ទាត់រវាងក្រុមកម្ពុជា និងទីម័រខាងកើតនៅថ្ងៃអាទិត្យនោះទេ ដោយសារតែការប្រកួតរបស់ខ្លួនមិនត្រូវជាន់ថ្ងៃជាមួយការប្រកួតបាល់ទាត់ ជាការប្រកួតដោយសេរីមិនមានការទិញសំបុត្រ និងជាការប្រកួតរវាងកីឡាករល្បីឈ្មោះនៅក្នុងពិភពប្រដាល់កម្ពុជា និងថៃ ដែលអ្នកណាក៏ចង់តាមដាន ។ លោកថា សម្រាប់អ្នកស្នេហាវិស័យប្រដាល់នឹងបង្ហាញខ្លួនកកកុញសម្រាប់ការប្រកួតមួយនេះនៅសាលកីឡាTiffy Arena ជ្រោយចង្វា ជាពិសេសសម្រាប់អ្នកគាំទ្រកីឡាករ អ៊ុំ ចំរើន និងSuper Chhai ដែលចង់ដឹងថាអ្នកណានឹងបានកាន់ពានជើងឯក ។
លោកថា ក្នុងវគ្គប្រកួតពូល កីឡាករទាំងពីរធ្លាប់បានប៉ះគ្នាម្ដងហើយ ដោយក្នុងពេលនោះ កីឡាករកម្ពុជាបានឈ្នះពិន្ទុកីឡាករSuper Chhai ប៉ុន្តែមិនទាន់ប្រាកដថា ការប្រកួតដែលនឹងត្រូវធ្វើឡើងនៅថ្ងៃខានស្អែក នឹងមានលទ្ធផលដដែល ឬត្រូវកែប្រែនោះឡើយ ។ លោកថា កីឡាករម្ខាងៗសុទ្ធតែបានត្រៀមទុករៀងខ្លួន ដោយសារតែកីឡាករ អ៊ុំ ចំរើន ក៏ចង់បានពានជើងឯក ហើយកីឡាករថៃ Super Chhai ក៏ចង់បានពានជើងឯកដូចគ្នា ។
សម្រាប់ព្រឹត្តិការណ៍សំខាន់ទី២ដែលនឹងកើតឡើងនៅចុងសប្ដាហ៍នេះដូចគ្នា គឺមានការដឹងឮស្ទើរពេញផ្ទៃប្រទេសតែម្ដង ដោយមានអ្នកស្នេហាវិស័យកីឡាបាល់ទាត់ចាប់អារម្មណ៍យ៉ាងខ្លាំង ។ នោះគឺការប្រកួតបាល់ទាត់រវាងក្រុមជម្រើសជាតិឈុតធំកម្ពុជា និងទីម័រខាងកើតនៅល្ងាចថ្ងៃអាទិត្យទី២៩ ឧសភា នេះ ។ ការប្រកួតរបស់ក្រុមនេះ ត្រូវគេរំពឹងថា នឹងមានអ្នកទស្សនាច្រើនជាង៥ម៉ឺននាក់ ដោយខាងសហព័ន្ធបាល់ទាត់ក៏ត្រៀមសំបុត្ររហូតដល់រាប់ម៉ឺនសន្លឹក ដើម្បីដាក់លក់ផងដែរ ។ បើទោះជាការប្រកួតចាញ់ឈ្នះគ្រាន់តែដើម្បីមិត្តភាព ក៏អ្នកស្នេហាវិស័យបាល់ទាត់ស្ទើរមិនសល់ម្នាក់នោះទេ ដែលចង់ទៅទស្សនាការប្រកួតដើម្បីដឹងថាកីឡាកររបស់ក្រុមកម្ពុជា និងកីឡាកររបស់ក្រុមទីម័រខាងកើត តើក្រុមណានឹងឈ្នះ ។
ការប្រកួតដែលនឹងចាប់ផ្ដើមនៅល្ងាចថ្ងៃអាទិត្យនេះ ត្រូវគេអះអាងថា មានជនបរទេសបានកក់ទិញសំបុត្រមកទស្សនាយ៉ាងច្រើន ក្នុងនោះជនជាតិនៅក្នុងតំបន់អាស៊ានក៏ច្រើនណាស់ដែរ ដើម្បីគាំទ្រដល់ក្រុមទាំងពីរ ។ នៅក្នុងព្រឹត្តិការណ៍នោះ ក៏មានការរាំបទញីកែងជើង ដែលបកស្រាយដោយផ្ទាល់ពីសំណាក់អ្នកនាងពេជ្រ សោភា និងលោក
ដេវីតផងដែរ ទើបធ្វើឱ្យគេចាប់អារម្មណ៍ថា នោះជាព្រឹត្តិការណ៍ធំដែលកាន់តែកន្ត្រាក់អារម្មណ៍អ្នកស្នេហាវិស័យបាល់ទាត់ឱ្យចង់ទស្សនា ។ មានការប្រកាសថា កីឡាករកម្ពុជានឹងទទួលបានការលើកទឹកចិត្តពិសេស បើអាចយកឈ្នះលើក្រុមទីម័រខាងកើតបាន ហើយតាមទម្រង់លេងរបស់ក្រុមទីម័រ បើទោះជាមានការរីកចម្រើន ក៏មិនប្រាកដថានឹងមានលទ្ធផលល្អត្រឡប់ទៅវិញនោះដែរ ដោយសារតែការប៉ះគ្នាលើកមុនកម្ពុជាធ្លាប់លត់ក្រុមនេះ៣-២ម្ដងហើយ ៕
ចែករំលែកព័តមាននេះ