ការផ្លាស់ប្តូរអ្នកទោសគ្នាធ្វើឡើងតាមរយៈផ្លូវអាកាស ដែលពួកអ្នកទោសប្តូរគ្នាចាកចេញតាមយន្តហោះស្ទើរដំណាលគ្នាកាលពីព្រឹកថ្ងៃទី២៥ ឧសភា ។
យន្តហោះ២គ្រឿង មួយគ្រឿងដឹកស្ត្រីអ្នកបើកយន្តហោះអ៊ុយក្រែន នាង NADEJDA SAVTCHENKO ដែលជាប់ឃុំឃាំងនៅរុស្ស៊ី រួចយន្តហោះមួយគ្រឿងទៀតដឹកលោក EVGUENI EROFEIEV និងលោក ALEXANDRE ALEXANDROV អ្នកទោសរុស្ស៊ី២នាក់ ដែលចាប់ខ្លួននៅអ៊ុយក្រែន ។ យន្តហោះទាំង២នេះហោះបញ្ច្រាសគ្នាកាត់ពីលើព្រំដែននៃប្រទេសទាំង២ ។
អ្នកទោសរុស្ស៊ី២នាក់ដែលដោះដូរគ្នាបានជិះយន្តហោះធុន ANTONOV 148 មួយគ្រឿងទៅចុះនៅព្រលានយន្តហោះ VNOUKOVO ក្រុងមូស្គូ ។
ក្នុងពេលជាមួយគ្នានេះ ក្បួនរថយន្តប្រធានាធិបតីអ៊ុយក្រែនលោកប៉េត្រូ ប៉ូរ៉ូ ឆេនកូ បានបើកឆ្ពោះមកកាន់ព្រលានយន្តហោះ BORISPOL ក្រុងគៀវ ដើម្បីទទួលស្ត្រីអ្នកបើកយន្តហោះ ដែលជិះយន្តហោះប្រធានាធិបតីមួយគ្រឿង ដោយនាងក្លាយបន្ទាប់ពីជាប់ឃុំឃាំងរយៈពេល៧០៦ថ្ងៃ នៅក្នុងពន្ធនាគាររុស្ស៊ីជាវីរនារីមួយរូបរបស់ប្រទេស ។
ការដោះដូរគ្នានេះក្លាយជាការពិត បន្ទាប់ពីប្រធានាធិបតីរុស្ស៊ី លោកវ្ល៉ាឌីមៀរ ពូទីន និងសមភាគីអ៊ុយក្រែនបានប្រកាសលើកលែងទោសពួកអ្នកទោសទៅវិញទៅមក ។ ក្រោយការចរចាគ្នារយៈពេលជាច្រើនសប្តាហ៍ កិច្ចព្រមព្រៀងត្រូវបានចុះហត្ថលេខាក្នុងឱកាសនៃការពិភាក្សាគ្នាតាមទូរស័ព្ទកាលពីថ្ងៃទី២៤ ឧសភា រវាងប្រធានាធិបតីរុស្ស៊ី អ៊ុយក្រែន បារាំង និងអាល្លឺម៉ង់ ដែលសុទ្ធជាអ្នកជួយជ្រោមជ្រែងឱ្យមានកិច្ចព្រមព្រៀងសន្តិភាពនៅអ៊ុយក្រែនហៅកិច្ចព្រមព្រៀងទីក្រុងមីនស្ក៍ ៕
ចែករំលែកព័តមាននេះ