ខេត្តកំពង់ឆ្នាំង ៖ យោងតាមសំណើររបស់ប្រជាពលរដ្ឋក្នុងក្រុងកំពង់ឆ្នាំង ចំនួន៣គ្រួសារដែលបានប្តឹងស្នើសុំឱ្យអាជ្ញាធរអគ្គិសនីកម្ពុជា មកពិនិត្យមើលកុងទ័ររបស់ពួកគាត់ដែលសង្ស័យថា ដើរលឿនខុសប្រក្រតី
ខេត្តកំពង់ឆ្នាំង ៖ យោងតាមសំណើររបស់ប្រជាពលរដ្ឋក្នុងក្រុងកំពង់ឆ្នាំង ចំនួន៣គ្រួសារដែលបានប្តឹងស្នើសុំឱ្យអាជ្ញាធរអគ្គិសនីកម្ពុជា មកពិនិត្យមើលកុងទ័ររបស់ពួកគាត់ដែលសង្ស័យថា ដើរលឿនខុសប្រក្រតី ទើបនៅរសៀលថ្ងៃទី២៥ ឧសភា ២០១៦ អាជ្ញាធរអគ្គិសនីបានចុះមកប្រជុំដោះស្រាយ និងពិនិត្យវាស់កុងទ័ររបស់ពួកគាត់ ដើម្បីបញ្ចប់ភាពមន្ទិលសង្ស័យដែលចោទក្រុមហ៊ុនអគ្គិសនីថា ធ្វើឱ្យកុងទ័រដើរលឿន។ ពិធីដោះស្រាយវិវាទនេះ បានធ្វើឡើងនៅសាលាក្រុងកំពង់ឆ្នាំង ដោយមានការអញ្ជើញចូលរួមពីអាជ្ញាធរក្រុង ចៅសង្កាត់ទាំង៤ ក្នុងក្រុង រួមទាំងអ្នកសារព័ត៌មានជាច្រើនរូបទៀត ។
លោក ហាក់ សិរណៈ ជាប្រជាពលរដ្ឋបានលើកឡើងថា កន្លងមកកុងទ័ររបស់លោកបានដើរលឿនខុសប្រក្រតី ហើយលោកបាន Comment ទៅសម្តេចឱ្យជួយ ព្រោះសម្តេចធ្លាប់បានប្រាប់តាមហ្វេសប៊ុករបស់សម្តេចថា បើប្រជាពលរដ្ឋណាមានកង្វល់ សូម Comment ទៅសម្តេច ។ ប៉ុន្តែពេលគាត់ Comment ស្រាប់តែក្រុមហ៊ុនអគ្គិសនីបានផ្តាច់ភ្លើងរបស់លោក ។ បញ្ហាមួយទៀត លោកឆ្ងល់ថា តើភ្លើងអគ្គិសនីដាច់ភ្លឺៗ ភ្លឹបភ្លែតៗ តើកុងទ័រដើរលឿនដែរឬទេ0x017d7 មួយទៀត តើភ្លើងពេលយប់បានឡើងពី២២០ ទៅ២៤០ តើកុងទ័រដើរលឿនដែរឬទេ0x017d7 ចំណែកធុងដាក់កុងទ័រ សុំឱ្យដូរដាក់មានកញ្ចក់សម្រាប់ម្ចាស់ប្រើប្រាស់បានមើលផង។ ចំណែកលោក លី សុភា បាននិយាយថា លោកចង់ដឹងកុងទ័ររបស់លោកមានការប្រែប្រួលខ្លាំងម្ល៉េះ ឡើងពី១៦០គីឡូដល់ ៥០០គីឡូ ស្នើសុំឱ្យជួយពិនិត្យផង។
លោក យឹម ពិសិដ្ឋ នាយកបញ្ញត្តិកម្មសេវាផ្គត់ផ្គង់នៃអាជ្ញាធរអគ្គិសនី បានថ្លែងថា កន្លងមក អាជ្ញាធរអគ្គិសនីបានជូនដំណឹងឱ្យអាជ្ញាធរមូលដ្ឋានជម្រាបជូនប្រពលរដ្ឋឱ្យពួកគាត់ដែលមានការសង្ស័យថា កុងទ័រភ្លើងដើរលឿនខុសប្រក្រតី ចុះឈ្មោះមកអាជ្ញាធរ នឹងចុះមកពិនិត្យកុងទ័រជូនដោយមិនគិតថ្លៃទេ តែមកដល់ពេលនេះ មានប្រជាពលរដ្ឋតែ៣គ្រួសារប៉ុណ្ណោះ ដែលបានស្នើសុំឱ្យអាជ្ញាធរអគ្គិសនីចុះមកពិនិត្យកុងទ័រ ។ ទោះយ៉ាងនេះក្តី អាជ្ញាធរអគ្គិសនីនៅតែស្នើសុំឱ្យប្រជាពលរដ្ឋ បើមានបញ្ហាសង្ស័យលើកុងទរ័ ចុះឈ្មោះដាក់ពាក្យសុំមកអាជ្ញាធរអគ្គិសនី និងមកពិនិត្យជូន។ ចំណែករឿងភ្លើងដាច់ភ្លឺៗ គឺមិនបណ្តាលឱ្យកុងដើរលឿនទេ តែរឿងកម្លាំងភ្លើងឡើងពី២២០ទៅ២៤០វ៉ុល គឺសូមប្រាប់ថា កុងទ័រពិតជាដើរលឿនមែន តែវាស្ថិតក្នុងកំរិតច្បាប់អាជ្ញាធរអគ្គិសនីកំណត់ឱ្យ ដែលស្ថិតក្នុងគម្លាតពី២០៧វ៉ុលទៅ២៥៣វ៉ុល ។
ក្រោយពីការប្រជុំជជែកគ្នាមក អាជ្ញាធរអគ្គិសនីបានឱ្យដោះកុងទ័ររបស់ម្ចាស់ទាំង៣ មាន ១-ឈ្មោះ ហាក់ សិរណៈ ២-ឈ្មោះ ឆាយ លាភា និង៣-ឈ្មោះ លី សុភា ដើម្បីយកមកវាស់ថ្លឹង រកខុសត្រូវ ។ ក្រោយពេលធ្វើការវាស់របស់អាជ្ញាធរអគ្គិសនី បានដឹងថា កុងទ័ររបស់ម្ចាស់ទាំង៣ គឺត្រឹមត្រូវគ្មានការដើរលឿននោះទេ ។
ចែករំលែកព័តមាននេះ