រាជធានីភ្នំពេញ ៖ ប្រទេសកម្ពុជាបានប្រកាន់គោលនយោបាយ «ចិនតែមួយ» ព្រោះចិននិងកម្ពុជា មានទំនាក់ទំនងមិត្តភាពការទូតជាមួយគ្នាដ៏យូរលង់មកហើយ ។ មរតកនេះត្រូវបានថ្នាក់ដឹកនាំនៃប្រទេសទាំងពីរបន្តលើកស្ទួយ
រាជធានីភ្នំពេញ ៖ ប្រទេសកម្ពុជាបានប្រកាន់គោលនយោបាយ «ចិនតែមួយ» ព្រោះចិននិងកម្ពុជា មានទំនាក់ទំនងមិត្តភាពការទូតជាមួយគ្នាដ៏យូរលង់មកហើយ ។ មរតកនេះត្រូវបានថ្នាក់ដឹកនាំនៃប្រទេសទាំងពីរបន្តលើកស្ទួយដល់ចំណុចកំពូល ដែលបានក្លាយជាដៃគូយុទ្ធសាស្ត្រគ្រប់ជ្រុងជ្រោយ មានកិច្ចសហប្រតិបត្តិការលើគ្រប់វិស័យ និងបានសហការគាំទ្រគ្នាទាំងនៅក្នុងតំបន់ និងលើពិភពលោក។ ទន្ទឹមនឹងនេះ កម្ពុជាក៏បានស្នើឲ្យចិនជំរុញភ្ញៀវទេសចរ និងវិនិយោគិនមកទស្សនា និងវិនិយោគនៅកម្ពុជាបន្ថែមទៀតផងដែរ ដើម្បីជំរុញកំណើនសេដ្ឋកិច្ចរបស់កម្ពុជា ។ នេះបើតាមការលើកឡើងរបស់មន្ត្រីជាន់ខ្ពស់កម្ពុជា ។
ថ្លែងនៅក្នុងជំនួបជាមួយគណៈប្រតិភូសភាប្រជាជនខេត្តយូណាន ប្រទេសចិន ដែលដឹកនាំដោយលោក ចាង ប៉ាយរូ អនុប្រធានប្រតិបត្តិនៃគណៈកម្មាធិការអចិន្ត្រៃយ៍នៃសភាប្រជាជនខេត្តយូណា នៅឯរដ្ឋសភាជាតិ កាលពីថ្ងៃទី១៩ឧសភា លោកបណ្ឌិត ងួន ញ៉ិល អនុប្រធានទី២ រដ្ឋសភាជាតិ បានស្នើឲ្យចិនជំរុញអ្នកទេសចរនិងអ្នកវិនិយោគមកកម្ពុជា ឲ្យបានច្រើនថែមទៀត ។
លោកបណ្ឌិតមានប្រសាសន៍ថា ៖ « ចិនបានជួយជំនួយឥតសំណងដើម្បីអភិវឌ្ឍន៍កម្ពុជាលើគ្រប់វិស័យ ដែលជាការផ្តល់ជំនួយដោយគ្មានលក្ខខណ្ឌ និងបានធ្វើឲ្យសេដ្ឋកិច្ចកម្ពុជាមានការរីកចម្រើនយ៉ាងឆាប់រហ័ស » ។
ជាការឆ្លើយតប លោក ចាង ប៉ាយរូ បានលើកឡើងថា ៖ « ដំណើរទស្សនកិច្ចរបស់គណៈប្រតិបត្តិលើកនេះ គឺដើម្បីជំរុញកិច្ចសហប្រតិបត្តិការលើវិស័យទេសចរណ៍ កសិកម្ម និងពាណិជ្ជកម្មរវាងប្រទេសទាំងពីរ » ។
លោក ចាង ប៉ាយរូ បានបញ្ជាក់ថា ៖ «កម្ពុជា-ចិន មានកិច្ចសហការជាមួយគ្នាយ៉ាងល្អ និងជាដៃគូយុទ្ធសាស្ត្រគ្រប់ជ្រុងជ្រោយ និងមានកិច្ចសហការលើគ្រប់វិស័យ ។ ក្រោមកិច្ចខិតខំប្រឹងប្រែង និងកិច្ចសហការល្អ កម្ពុជាបានគាំទ្រ នូវខ្សែក្រវាត់មួយផ្លូវមួយ ដែលជាយុទ្ធសាស្ត្រអភិវឌ្ឍន៍យូរអង្វែង ។ រដ្ឋាភិបាលចិនបានជំរុញអ្នកវិនិយោគទុន និងអ្នកទេសចរយ៉ាងច្រើនមកកម្ពុជា ដោយសារកម្ពុជាមានតំបន់ប្រវត្តិសាស្ត្រនិងប្រាសាទបុរាណជាច្រើន »។
សូមបញ្ជាក់ថា បន្ទាប់ពីចប់នូវជំនួបសវនាការជាមួយលោក ងួន ញ៉ិល រួចមក គណៈប្រតិភូបានចូលជួបសំណេះសំណាលជាមួយលោក ឈាង វុន ប្រធានគណៈកម្មការទី៥ នៃរដ្ឋសភាផងដែរនៅឯវិមានរដ្ឋសភា ដើម្បីពិភាក្សាពង្រឹងកិច្ចសហការគ្នារវាងស្ថាប័នសភាកម្ពុជា និងចិន ៕
ចែករំលែកព័តមាននេះ