រាជធានីភ្នំពេញ ៖ ជាថ្មីម្តងទៀតសម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានលើកសរសើរកម្មវិធី The Voice ក្នុងរដូវកាលទី២ និងបានលើកទឹកចិត្តដល់យុវជនឱ្យចូលរួមបញ្ចេញទេពកោសល្យប្រកួតប្រជែងនៅក្នុងវិស័យសិល្បៈក្នុងកម្រិតខ្នាតអន្តរជាតិនេះ ។
ការថ្លែងកោតសរសើរនេះមិនមែនជាលើកទីមួយទេ កន្លងសម្តេចតេជោហ៊ុន សែន បានសរសើរកម្មវិធី Cambodia Idol ដែលរៀបចំដោយស្ថានីយទូរទស្សន៍ហង្សមាសដែរ ហើយចាត់ទុកថា កម្មវីធីទាំងនោះជាកម្មវិធីដ៏ល្អ និងមានលក្ខណៈលំដាប់ពិភពលោក ។
តាមរយៈហ្វេសប៊ុករបស់ខ្លួន សម្តេចតេជោ ហ៊ុន សែន បានសរសេរថា «ខ្ញុំសូមកោតសរសើរដល់យុវជន យុវតីដែលបានចូលរួមប្រកួតប្រជែងបញ្ចេញសមត្ថភាព នៅក្នុងកម្មវិធីខ្នាតអន្តរជាតិមួយចំនួន ដែលបានរៀបចំដោយទូរទស្សន៍ហង្សមាស និងរស្មីហង្សមាស ដូចជា The Voice, Cambodia Idol និង «ខ្ញុំជាយុវជនគំរូកម្ពុជា» ជាដើមដែលរៀបចំដោយហ្វេសប៊ុកខ្ញុំផ្ទាល់តែម្តង ។ កម្មវិធីទាំងនេះបានផ្តល់នូវការគាំទ្រ និងលើកទឹកចិត្តដល់យុវជនខ្មែរទូទាំងប្រទេសឱ្យមានឱកាសបញ្ចេញស្នាដៃ និងសមត្ថភាពដើម្បីចូលរួមប្រកួតប្រជែងនៅក្នុងវិស័យសិល្បៈក្នុងកម្រិតខ្នាតអន្តរជាតិ ។ ទាំងអស់នេះគឺដោយសារប្រទេសជាតិយើងមានសុខសន្តិភាព ទើបយើងទាំងអស់គ្នាមានឱកាស ចូលរួមផលិតកម្មវិធី និងចូលរួមប្រកួតប្រជែងនៅក្នុងកម្មវិធីទូរទស្សន៍បែបនេះបាន ។
ខ្ញុំផ្ទាល់នៅតែបន្តការគាំទ្រ និងលើកទឹកចិត្តយុវជនយុវតីឱ្យចូលរួមឱ្យបានច្រើននៅក្នុងការប្រកួតប្រជែងសមត្ថភាព ចំណេះដឹង និងជំនាញនៅក្នុងកម្មវិធីដ៏ ល្អៗទាំងនេះ ។ សូមអរគុណនាយកក្រុមហ៊ុនទូរទស្សន៍ហង្សមាស និងរស្មីហង្សមាស ផលិតករ ចៅក្រមគណៈកម្មការ Coach ទាំងបួនមានក្មួយ ណុប បាយ៉ារិទ្ឋ ក្មួយឱក សុគន្ឋកញ្ញា ក្មួយឆន សុវណ្ណរាជ និងក្មួយពេជ្រ សោភា» ។
សម្ដេចតេជោហ៊ុន សែន បញ្ជាក់ថា ដើម្បីផ្តល់ការគាំទ្រ និងលើកទឹកចិត្តដល់យុវជនក៏ដូចជាផ្តល់ការកម្សាន្ដ នឹងមានការផ្សាយសាឡើងវិញកម្មវិធីដ៏មានប្រជាប្រិយភាពទាំងពីរនេះនៅលើទំព័រហ្វេសប៊ុករបស់សម្ដេចផ្ទាល់នៅពេលផ្សាយជាបន្តបន្ទាប់ខាងមុខនេះ ។
ទំព័រហ្វេសប៊ុករបស់សម្ដេចតេជោក៏នឹងចាក់ផ្សាយផងដែរបទចម្រៀងដែលរៀបចំដោយក្រសួងទេសចរណ៍ ។ សិល្បៈដែលថតដោយទូរទស្សន៍អាស៊ីអាគ្នេយ៍នៃទិវាវប្បធម៌៣មីនា ដែលរៀបចំដោយក្រសួងវប្បធម៌ និងវិចិត្រសិល្បៈ។ ការប្រឡងចម្រៀងប្រពៃណី ល្ខោនបាសាក់ យីកេ មហោរី កំណាព្យដោយទូរទស្សន៍បាយ័ន ។ បទចម្រៀងទាក់ទងដល់ការអភិវឌ្ឍ និងសកម្មភាពមនុស្សធម៌របស់កាកបាទក្រហមកម្ពុជា ។
សម្ដេចតេជោហ៊ុន សែន នឹងផ្សាយបទចម្រៀងដែលផលិតដោយទូរទស្សន៍ ឬផលិតកម្មផ្សេងទៀតផងដែរ ក្នុងករណីទទួលបានការអនុញ្ញាត ។ ទោះជាយ៉ាងណាក្ដីសម្ដេចតេជោហ៊ុន សែន មិនចាត់ទុកទំព័រហ្វេសប៊ុករបស់សម្ដេចនេះជំនួសឱ្យវិទ្យុ និងទូរទស្សន៍ណាមួយទេ តែការចាក់ផ្សាយបទចម្រៀង ឬសិល្បៈអាចជួយដល់ជនរួមជាតិ ពិសេសយុវជនទាំងក្នុង និងក្រៅប្រទេសដែលមិនមានពេលមើលទូរទស្សន៍ ហើយជាអ្នកនិយមហ្វេសប៊ុកផងដែរបានទស្សនាកម្សាន្ដ ៕
ចែករំលែកព័តមាននេះ