វីតាល់ ផ្អែកលើ មូលនិធិ ២៥៛ បានពាំនាំឈើច្រត់ និងថវិកា១លានរៀល ព្រមទាំងអំណោយទឹកពិសា វីតាល់ ជូនដល់លោកយាយ មាស គឹមហេង អាយុ៨៥ឆ្នាំ ដែលជួបគ្រោះថា្នក់ចរាចរណ៍ដាច់ជើងមួយជំហៀង ហើយគ្មានលុយព្យាបាលជំងឺ និងគ្មានសាច់ញាតិ សូម្បីតែម្នាក់ បាននិងកំពុងសម្រាកនៅមន្ទីរពេទ្យរុស្សីតែលតោលម្នាក់ឯង ហើយពឹងលើអ្នកជិតខាងក្បែរគ្រែឧបត្ថម្ភអាហារប្រចាំថ្ងៃ។
បន្ទាប់ពីបានចុះទៅសួរសុខទុក្ខលោកយាយ គឹមហេង កាលពីថ្ងៃទី២១ ឧសភា វីតាល់បានយល់កាន់តែច្បាស់ពីស្ថានភាពជំងឺ និងភាពលំបាករបស់លោកយាយកំសត់ ដែលបានរស់នៅម្នាក់ឯងជាង៤០ឆ្នាំមកហើយ។ លោកយាយក៏កាន់តែធ្លាក់ខ្លួនអភ័ព្វ បន្ទាប់ពីជួបគ្រោះថ្នាក់អកុសលពិការដាច់ជើងមួយជំហៀងទាំងខ្លួនក្រីក្រ ចាស់ជរា ទុរគត។
លោកយាយ គឹមហេង មានប្រសាសន៍ទាំងទឹកភ្នែកថា លោកយាយមានអាយុ៨៥ឆ្នាំទៅហើយ សព្វថ្ងៃរស់នៅក្នុងវត្តព្រះធាតុ ស្រុកកណ្តាលស្ទឹង ខេត្តកណ្តាល។ លោកយាយ រស់នៅដោយផ្អែកជីវិតនៅនឹងវត្តអស់រយៈពេលជាង៤០ឆ្នាំហើយ បន្ទាប់បាត់បង់ប្តី និងកូនទាំងអស់កាលពីជំនាន់ ប៉ុល ពត។
លោកយាយបន្តថា លោកយាយជួបគ្រោះថា្នក់ចរាចរណ៍នៅពេលដែលលោកយាយ ធ្វើដំណើរតាមរ៉ឺម៉កម៉ូតូទៅធ្វើបុណ្យនៅខេត្តកំពង់ស្ពឺ បន្ទាប់ពីជួបគ្រោះថ្នាក់ លោកយាយបានសន្លប់ធំ ហើយត្រូវបានគេបញ្ជូនមកពេទ្យ ដោយអត់មានលុយក្នុងខ្លួនសោះ។ លោកយាយត្រូវបានក្រុមគ្រូពេទ្យជួយព្យាបាល និងវះកាត់ជើងលោកយាយចេញ ហើយមកទល់នឹងពេលនេះ លោកយាយរាងធូរស្បើយច្រើន ប៉ុន្តែលោកយាយគេងពេទ្យម្នាក់ឯងរហូត មិនមានញាតិមិត្តបងប្អូនណាមកសួរសុខទុក្ខទេ។ រាល់ថ្ងៃលោកយាយរស់នៅមន្ទីពេទ្យដោយពឹងលើបងប្អូនអ្នកជំងឺដែលនៅក្បែរគ្រែ គេជួយមើលថែ និងផ្តល់អាហារសម្រាប់បរិភោគបន្តិចបន្តួច។
អ្នកជំងឺដែលស្ថិតនៅជិតគ្រែលោកយាយ គឹមហេង ពិតជាសាទរ ក្រុមហ៊ុន វីតាល់ណាស់ចំពោះការមកសួរសុខទុក្ខ និងផ្តល់ការឧបត្ថម្ភដល់លោកយាយហេង ព្រោះម្នាក់ៗគឺសុទ្ធតែអាណិត និងចង់ឲ្យមានការជួយទំនុកបម្រុងលោកយាយអំឡុងពេលដែលលោកយាយកំពុងស្ថិតនៅក្នុងស្ថានភាពដ៏ពិបាក។
លោក អ៊ុំ វណ្ណៈ មន្ត្រីទំនាក់ទំនងរបស់ក្រុមហ៊ុន វីតាល់ បានមានប្រសាសន៍ថា ប្រជាពលរដ្ឋខ្មែរទូទៅ ជាពិសេសអតិថិជន វីតាល់ ប្រាកដជាបានដឹងពីមូលនិធិ វីតាល់ ដែលក្រុមហ៊ុនយកចិត្តទុកដាក់បំផុត ចំពោះការងារសង្គម វីតាល់ គឺសកម្មណាស់ចំពោះការងារសង្គម ព្រោះនេះគឺជាផ្នែកមួយនៃទស្សនៈវិស័យរបស់ក្រុមហ៊ុន។ ការឧបត្ថម្ភគ្រប់រូបភាពនៃអំពើមនុស្សធម៌ ដើម្បីជាសក្ខីភាពនៃការចូលរួមគាំទ្រវីតាល់បង្កើនឲ្យមូលនិធិ ២៥៛ វីតាល់កាន់តែរីកធំ។ ទាំងថ្នាក់ដឹកនាំ និងអគ្គនាយិកា វីតាល់តែងតែមានទឹកចិត្តសន្តោសប្រណី និងយកចិត្តទុកដាក់ចំពោះជនចាស់ជរាដែលគ្មានទីពឹង។ ជាក់ស្តែងដូចជាលោកយាយ ហេង ដែលមានអាយុ៨៥ឆ្នាំទៅហើយ ក៏ជាប់មានរឿងអកុសលជាប់រហូត។ បើទោះជាការឧបត្ថម្ភលើកនេះ មិនមានច្រើនលើសលប់ ប៉ុន្តែយ៉ាងហោចណាស់ក៏អាចជួយសម្រួលដល់ស្ថានភាពលោកយាយបានមួយគ្រាធំដែរ។ វីតាល់ ក៏សូមអំពាវនាវដល់សប្បុរសជនដទៃទៀត សូមបន្តឧបត្ថម្ភដល់លោកយាយផង ជឿថា ការចូលរួមរបស់អ្នកទាំងអស់អស់គ្នា គឺបានបុណ្យច្រើនណាស់។
គួររំលឹកផងដែរថា ដើម្បីឆ្លើយតបនឹងការគាំទ្រយ៉ាងខ្លាំងរបស់ប្រជាពលរដ្ឋខ្មែរ ក៏ដូចជាអតិថិជន វីតាល់ ដែលតែងតែគាំទ្រផលិតផលវីតាល់យ៉ាងពេញទំហឹងក្នុងប៉ុន្មានឆ្នាំចុងក្រោយនេះ វីតាល់ ប្តេជ្ញាថា នឹងយកកញ្ចប់ថវិកាសប្បុរសធម៌ ដែលបានចូលរួមពីអតិថិជនទាំងអស់ទៅធ្វើកម្មវិធីសប្បុរសធម៌ជាច្រើនបន្ថែមទៀត ដើម្បីឧទ្ទិសកុសលផលបុណ្យ ជូនត្រឡប់ទៅអតិថិជនទាំងអស់វិញ។ ដូច្នេះហើយ គ្រាន់តែជាអតិថិជនវីតាល់ អ្នកគឺបានចូលរួមធ្វើបុណ្យកុសល និងចូលរួមចំណែកនៃការជួយ និងអភិវឌ្ឍសង្គមបានជាច្រើន «វីតាល់មោទនភាពផលិតផលជាតិ»។
ចែករំលែកព័តមាននេះ