នៅពេលដែលកម្ពុជា ជិតឈានចូលការបោះឆ្នោតម្តងៗ ការបារម្ភអំពីស្ថិរភាពនយោបាយ ក៏កើតមានឡើង ។ វិនិយោគបរទេសនៅតែមិនប្រាកដថា តើប្រជាធិបតេយ្យកម្ពុជាចាស់ទុំគ្រប់គ្រាន់នឹងឱ្យពួកគេជឿជាក់ថា នឹងមិនមានអ្វីអាក្រក់កើតឡើង ក្រោយការបោះឆ្នោត ឬយ៉ាងណា?
ជាមួយនឹងការបារម្ភរៀងរាល់ប្រាំឆ្នាំម្តង វិនិយោគិនធំៗមួយចំនួនមានភាពស្ទាក់ស្ទើរនៅក្នុងការវិនិយោគទ្រង់ទ្រាយធំនៅកម្ពុជាដោយភ័យខ្លាចថា ហេតុការណ៍អាក្រក់កើតឡើងក្រោយការបោះឆ្នោតនឹងធ្វើឱ្យការវិនិយោគរបស់ពួកគេខាតបង់ ។
ការវិនិយោគកាន់តែធំនឹងធ្វើឱ្យពួកគេកាន់តែប្រយ័ត្នប្រយែងខ្លាំង ។ ពួកវិនិយោគិនមិនចង់វេចខ្ចល់ត្រឡប់ទៅវិញ បន្ទាប់ពីការវិនិយោគរាប់រយ ឬរាប់ពាន់លានដុល្លារនៅកម្ពុជាឡើយ ។
ដើម្បីអនាគតសេដ្ឋកិច្ចកម្ពុជា កាន់តែរឹងមាំ និងដើម្បីបង្កើតការងារកាន់តែច្រើន សម្រាប់យុវជន និងយុវតីកម្ពុជា អ្នកនយោបាយគ្រប់និន្នាការ ត្រូវធានាឱ្យប្រាកដថា ការបោះឆ្នោតនឹងមិននាំដល់អស្ថិរភាពនយោបាយឡើយ ។ វាគ្រាន់តែជាយន្តការដ៏សំខាន់មួយ នៅក្នុងដំណើរការប្រជាធិបតេយ្យរបស់ប្រទេសកម្ពុជាប៉ុណ្ណោះ ។
បើសិនជាអ្នកនយោបាយកម្ពុជាទាំងអស់ អាចផ្តល់ការធានាដ៏ច្បាស់លាស់បែបនេះ វិនិយោគិនបរទេសនឹងមានការស្ងប់ចិត្តហើយពួកគេអាចនឹងឈានដល់ការវិនិយោគទ្រង់ទ្រាយធំៗ នៅកម្ពុជាដែលនឹងធ្វើឱ្យសេដ្ឋកិច្ចកម្ពុជាកាន់តែរឹងមាំ និងផ្តល់ការងារធ្វើកាន់តែច្រើនដល់ប្រជាជនកម្ពុជា ពិសេសយុវជន និងយុវតី ។
ផ្ទុយទៅវិញ បើសិនជាអ្នកនយោបាយមិនអាចផ្តល់ការធានាដ៏ច្បាស់លាស់បែបនេះ ដល់វិនិយោគិនបរទេស ពួកគេនឹងមិនហ៊ានបោះទុនទ្រង់ទ្រាយធំ សម្រាប់ការវិនិយោគនៅកម្ពុជាឡើយ ។
ដូច្នេះ វាចាំបាច់ណាស់ដែលថា ស្ថិរភាពនយោបាយនឹងមិនត្រូវប៉ះពាល់ ដោយសារការបោះឆ្នោតឡើយ ៕
ចែករំលែកព័តមាននេះ