រាជធានីភ្នំពេញ ៖ បុរស២នាក់បានស្លាប់ជាបន្តបន្ទាប់គ្នា ដោយសារជួបគ្រោះថ្នាក់ពេលជិះម៉ូតូជែងរថយន្តខណៈកំពុងមានភ្លៀងធ្លាក់ ហើយជ្រុលទៅបុកម៉ូតូមួយគ្រឿងទៀតដែលធ្វើដំណើរបញ្ច្រាសទិសគ្នាបណ្តាលឱ្យដួលអូសប្រមាណ៥០ម៉ែត្រនិងហើយត្រូវម៉ូតូកិនពីលើបន្ថែមទៀត ។ គ្រោះថ្នាក់នេះបានកើតឡើងកាលពីវេលាម៉ោង១០និង១០នាទី យប់ថ្ងៃទី២៤ ខែឧសភា នៅលើផ្លូវជាតិលេខ៤ មុខយានដ្ឋាន ទូច សុភាព ស្ថិតក្នុងភូមិអូដឹម សង្កាត់ចោមចៅ ខណ្ឌពោធិ៍សែនជ័យ ដែលបុរសម្នាក់បានស្លាប់ភ្លាមៗ និងម្នាក់ទៀតស្លាប់ក្រោយពេលកើតហេតុប្រមាណ១ម៉ោង ដោយសារតែអត់មានរថយន្តទៅដឹកយកទៅសង្គ្រោះទាន់ពេល ។
ជនរងគ្រោះដែលស្លាប់ទាំង២នាក់ ម្នាក់ឈ្មោះ រិទ្ធ គឹមជៀង អាយុ២៧ឆ្នាំ ជាកម្មកររោងចក្រ ស្នាក់នៅផ្ទះជួលក្នុងភូមិព្រៃបឹង សង្កាត់កន្ទោក ខណ្ឌពោធិ៍សែនជ័យ មានស្រុកកំណើតនៅខេត្តកំពង់ធំ និងម្នាក់ទៀតឈ្មោះ អៀង ឈុនណាត អាយុ១៩ឆ្នាំ ជាកម្មកររោងចក្រដែរ និងស្នាក់នៅផ្ទះជួលជាមួយគ្នា មានស្រុកកំណើតនៅឃុំស្វាយរំពារ ស្រុកបសេដ្ឋ ខេត្តកំពង់ស្ពឺ ។
តាមប្រភពព័ត៌មាននៅកន្លែងកើតហេតុឲ្យដឹងថា ខណៈកំពុងមានភ្លៀងធ្លាក់នោះស្រាប់តែឃើញជនរងគ្រោះទាំង២នាក់ជិះម៉ូតូ១គ្រឿង ម៉ាកហុងដាឌ្រីម ពណ៌ខ្មៅ ស៊េរីឆ្នាំ២០១២ ពាក់ផ្លាកលេខ ភ្នំពេញ 1BS-3267 បើកបរក្នុងល្បឿនលឿន តាមបណ្តោយផ្លូវជាតិលេខ៤ក្នុងទិសដៅពីកើតទៅលិច ។ លុះទៅដល់ចំណុចខាងលើ បានព្យាយាមជែងរថយន្តនៅខាងមុខក្នុងល្បឿនលឿនលាយឡំនឹងតំណក់ភ្លៀងមើលផ្លូវមិនច្បាស់ផង ក៏រេចង្កូតជ្រុលចូល ចំណែកផ្លូវខាងឆ្វេងដៃទៅបុកជាមួយម៉ូតូមួយគ្រឿងទៀតម៉ាក Zoomer-X មិនចាំស្លាកលេខដែលធ្វើដំណើរបញ្ច្រាសគ្នា បណ្តាលឱ្យអ្នកទាំង២នាក់ដួលម៉ូតូបោកក្បាលនឹងថ្នល់អូសទៅប្រមាណជាង៥០ម៉ែត្រ ។ រីឯម៉ូតូ Zoomer-X ជិះម្នាក់ឯងរងរបួសស្រាល បានលើកម៉ូតូជិះចេញបាត់ទៅ ។
ប្រភពព័ត៌មានបន្តថា ក្នុងហេតុការណ៍នេះបណ្តាលឱ្យជនរងគ្រោះជាអ្នកបើកបរម៉ូតូ បាក់ជើងស្តាំបីកំណាត់ និងបែកក្បាលធ្លាយខួរស្លាប់យ៉ាងអាណោចអាធ័មភ្លាមៗ ចំណែកម្នាក់ទៀតដែលជិះពីក្រោយបែកក្បាលពីក្រោយធ្ងន់ដូចគ្នា ។ ខណៈនោះដែរស្រាប់មានម៉ូតូ MSX ១គ្រឿងទៀត បើកមកពីលិចក្រោយម៉ូតូ Zoomer-X មើលមិនឃើញជនរងគ្រោះនៅលើថ្នល់ក៏បានបុកនិងកិនពីលើបន្ថែមទៀត ។
ក្រោយពេលកើតហេតុ សមត្ថកិច្ចមូលដ្ឋានបានចុះទៅដល់ ហើយសម្រួលចរាចរណ៍ផងនិងទាក់ទងទៅមន្ត្រជំនាញមកវាស់វែងធ្វើកំណត់ហេតុប្រគល់សពឱ្យទៅសាច់ញាតិដឹកយកទៅស្រុកកំណើតរៀងខ្លួនដើម្បីធ្វើបុណ្យតាមប្រពៃណី ៕
ចែករំលែកព័តមាននេះ