រាជធានីភ្នំពេញ ៖ ការប្រកួតប្រដាល់ដណ្ដើមខ្សែក្រវាត់គោជល់នៅលើសង្វៀនស៊ីអិនស៊ីក្នុងប្រភេទទម្ងន់៦៩គីឡូក្រាមនៅថ្ងៃសៅរ៍ ទី២៨ ឧសភា សប្ដាហ៍នេះ ឈានចូលដល់វគ្គពាក់កណ្ដាលផ្ដាច់ព្រ័ត្រហើយ ។ នៅក្នុងថ្ងៃនោះគូប្រកួតដណ្ដើមខ្សែក្រវាត់មានតែមួយប៉ុណ្ណោះ ដែលជាការជួបគ្នារវាងពេជ្រ សីហា មកពីសមាគមកីឡាប្រដាល់ក្រសួងការពាជាតិ និងកីឡាករថៃ ធុតស៍ភុន ស.សុម៉ាលី ។ ចំណែក បេក្ខភាពដណ្ដើមខ្សែក្រវាត់មួយគូទៀតដែលជាការជួបគ្នារវាងរឿង សោភ័ណ្ឌ មកពីក្លិបមកុដរាជសីហ៍ និងឡុង សុភី មកពីក្លិបសាលវ័ន្តកីឡា ត្រូវលើកពេលទៅប្រកួតនៅសប្ដាហ៍ក្រោយ ដោយសារតែរឿង សោភ័ណ្ឌ មានបញ្ហាផ្នែកសុខភាព ។
កីឡាករពេជ្រ សីហា ដែលត្រូវជួបប្រកួតជាមួយកីឡាករថៃដណ្ដើមកៅអីទៅប្រកួតនៅវគ្គផ្ដាច់ព្រ័ត្រលើកនេះក៏មិនសូវជាមានសង្ឃឹមប៉ុន្មានដែរដោយសារតែការប្រកួតកន្លងមកគេស្ទើរតែគ្មានឱកាសឡើងមកដល់វគ្គនេះបាន ។ ចំណែកភាគីកីឡាករថៃជាជើងខ្លាំងមួយរូបដែលមិនទាន់មានអ្នកណាផ្ដួលគេបានឡើយ សូម្បីតែពេជ្រ សីហា ក៏ធ្លាប់ចាញ់នៅក្រោមកណ្ដាប់ដៃរបស់គេរួចម្ដងមកហើយ ។ ធុតស៍ភុន ស.សុម៉ាលី គេមានល្បិចប្រយុទ្ធល្អខ្លាំងណាស់ បូករួមទាំងផ្លែកែង និងជង្គង់ឡើងទៅគឺអាចប្រើការបានយ៉ាងស្ទាត់ជំនាញបំផុត ។ មិនតែប៉ុណ្ណោះទាំងមាឌនិងកម្ពស់ក៏ល្អជាង ពេជ្រ សីហាដែរ ។ ដូច្នេះការប្រកួតលើកនេះសូម្បីតែអ្នកដែលធ្លាប់តាមដានការប្រកួតភាគច្រើនក៏គេមិនសូវមានជំនឿចិត្តលើកីឡាករកម្ពុជាយើងដែរ ។ ពេជ្រ សីហា មានផ្លែកែងនិងជង្គង់ល្អគួរសមប៉ុន្តែចិត្តរបស់គេរាងតូចបន្តិចហើយ ចលនាវាយចេញក៏មិនសូវជារហ័សរហួនប៉ុន្មានទៀត ។ គេបានព្យាករទុករួចហើយថា តំណែងជាម្ចាស់ខ្សែក្រវាត់លើកនេះប្រហែលជាធ្លាក់ទៅលើធុតស៍ភុន ស.សុម៉ាលី ច្រើនជាង។ មូលហេតុដែលគេហ៊ាននិយាយបែបនេះ ព្រោះសូម្បីតែឡុង សុភី និងរឿងសោ ភ័ណ្ឌ ក៏មិនអាចទៅរួចជាមួយគេដែរ ។
ចំណែកគូប្រកួតមិត្តភាពអន្តរជាតិមួយគូទៀតតម្រូវទៅលើកីឡាករ យស់ សំអាល់ មកពីក្លិបឃ្លាំងមឿងកីឡា ប្រកួតជាមួយកីឡាករថៃឈ្មោះហូលីហ្វីល ស៊ីតសាមផ្យាក់ ក្នុងប្រភេទទម្ងន់៦០គីឡូក្រាម ។ កីឡាករ ភួង ពិសិដ្ឋ មកពីក្លិបតាឡីដំរីមានរិទ្ធ ប្រកួតជាមួយកីឡាករ ព្រឿង សុជាតិ មកពីសមាគមកីឡាប្រដាល់ក្រសួងការពារជាតិ និងកីឡាករ សេក គឹមរួនមកពីក្លិបអង្គរមានជ័យ ខេត្តសៀមរាប ប្រកួតជាមួយកីឡាករ ផន ផល្លា មកពីក្លិបតាព្រហ្មមានជ័យ ៕
ចែករំលែកព័តមាននេះ