យោងតាមអាជ្ញាធរថា ទឹកចាប់ផ្តើមស្រកវិញកាលពីថ្ងៃទី២៤ ឧសភា តែបង្ហាញពីទំហំនៃការខូចខាតដោយសារភ្លៀងធ្លាក់ខ្លាំងកាលពីសប្តាហ៍មុន ពិសេសទឹកជំនន់ និងការបាក់ដីដែលបណ្តាលឱ្យមនុស្សស្លាប់យ៉ាងតិច១០១នាក់ ។
អាជ្ញាធរយោធាប្រកាសពីការបន្តរុករក ទោះគ្មានសង្ឃឹមថា អាចរកឃើញអ្នកនៅរស់រានមានជីវិតដែលកប់ក្នុងភក់ក្តី ខណៈមនុស្សប្រមាណជា១០០នាក់នៅតែបាត់ខ្លួនក្នុងស្រុករងការប៉ះពាល់ខ្លាំងជាងគេ គឺស្រុក KEGALLE ចម្ងាយប្រមាណជា១០០គីឡូម៉ែត្រ ភាគឦ សានក្រុងកូឡុំបូ ។
លោក PRADEEP KODIPPILI អ្នកនាំពាក្យរបស់មជ្ឈមណ្ឌលគ្រប់គ្រងគ្រោះមហន្តរាយថ្លែងប្រាប់ AFP ថា ទឹកជំនន់បានស្រកចុះវិញក្នុងទូទាំងប្រទេស ។ ផ្ទះជាង៥៣០ខ្នងរងការបំផ្លាញទាំងស្រុង និងប្រមាណជា៤.០០០ខ្នងរងការខូចខាត ។ លោកបន្តថា ប្រជាជនរដ្ឋធានីភាគច្រើនអាចវិលចូលផ្ទះសម្បែងវិញចាប់ពីថ្ងៃទី២៣ ឧសភា មក ។ ប្រជាជនក្រុងកូឡុំបូជិត១ភាគ៣បានភៀសខ្លួនចេញ ពេលមានភ្លៀងធ្លាក់ខ្លាំងបំផុត ។ ក្រសួងហិរញ្ញវត្ថុវាយតម្លៃការខូចខាតថាប្រមាណជា២ពាន់លានដុល្លារ ។ សភាជាតិបានកោះប្រជុំនាថ្ងៃទី២៥ ឧសភា ដើម្បីពិភាក្សាពីការកសាងឡើងវិញក្នុងរដ្ឋធានី ក្រោយភ្លៀងធ្លាក់យ៉ាងខ្លាំងបំផុតពុំធ្លាប់ជួបប្រទះចាប់តាំងពី២៥ឆ្នាំមកហើយ ។
ភ្លៀងចាប់ស្ងប់វិញ បន្ទាប់ពីព្យុះឈ្មោះ ROANU បោកបក់ឆ្ពោះទៅប្រទេសបង់ក្លាដែស ដែលនៅទីនោះ បណ្តាលឱ្យមនុស្សស្លាប់២៤នាក់ មុនពេលព្យុះនេះរលាយវិញ ៕
ចែករំលែកព័តមាននេះ