ថ្ងៃក្រោយឲ្យរាង កុំអាងខ្លួនអង្គរក្សធ្វើស្រេចតែចិត្ត
ខេត្តព្រះសីហនុ ៖ បុរសស្រវឹងជោគជាំម្នាក់ដែលបានបើកបរក្នុងស្ថានភាពស្រវឹងហើយពុំមានប័ណ្ណបើកបរត្រឹមត្រូវ ព្រមទាំងយកឈ្មោះថ្នាក់ដឹកនាំមកប្រើប្រាស់ និងបានបើកបរ
ខេត្តព្រះសីហនុ ៖ បុរសស្រវឹងជោគជាំម្នាក់ដែលបានបើកបរក្នុងស្ថានភាពស្រវឹងហើយពុំមានប័ណ្ណបើកបរត្រឹមត្រូវ ព្រមទាំងយកឈ្មោះថ្នាក់ដឹកនាំមកប្រើប្រាស់ និងបានបើកបរបង្កផលប៉ះពាល់ទ្រព្យសម្បត្តិដល់អ្នកដទៃកាលពីទៀបភ្លឺឈានចូលថ្ងៃទី២៤ឧសភាកន្លងទៅនោះត្រូវបានកម្លាំងជំនាញនគរបាលចរាចរណ៍ផ្លូវគោកខេត្តព្រះសីហនុបញ្ជូនខ្លួនទៅកាន់សាលាដំបូងហើយ បន្ទាប់ពីមានបទបញ្ជាយ៉ាងរឹងពីលោកឧត្តមសេនីយ៍ទោ ជួន ណារិន្ឋ ស្នងការនគរបាលខេត្តព្រះសីហនុ ។
លោកវរសេនីយ៍ ព្រហ្ម ពៅ នាយការិយាល័យចរាចរណ៍ផ្លូវគោក បានគូសបញ្ញាក់ថា ដើម្បីអនុវត្តច្បាប់ស្តីពីចរាចរណ៍ផ្លូវវគោក ក៏ដូចជាយោងតាមបទបញ្ជាយ៉ាងតឹងរ៉ឹងពីលោកឧត្តមសេនីយ៍ទោ ជួន ណារិន្ឋ ស្នងការនគរបាលខេត្តព្រះសីហនុ ដោយលោកឧត្តមសេនីយ៍មិនអត់ឱនជាដាច់ខាតចំពោះជនណានៅតែល្មើសច្បាប់នៅលើដងផ្លូវ ។
លោកបញ្ជាក់ថា កាលពីវេលាម៉ោង២ និង៣០នាទីទៀបភ្លឺឈានចូលថ្ងៃទី២៤ឧសភា នៅចំណុចខារ៉ាអូខេ៣៣៣ ស្ថិតក្នុងក្រុមទី២ ភូមិ៤ សង្កាត់លេខ៤ ក្រុងព្រះសីហនុ មានករណីគ្រោះថ្នាក់ចរាចណ៍មួយកើតឡើងបង្កឡើងដោយរថយន្ត១គ្រឿងម៉ាកហាយលែនឌ័រ ពណ៌ស្ករ ពាក់ស្លាកលេខ ភ្នំពេញ 2AG-5133 បើកបរដោយឈ្មោះ អ៊ុក សាមិត្ត ភេទប្រុស អាយុប្រហែល៣៧ឆ្នាំ ជនជាតិខ្មែរ មានមុខងារជាអង្គរក្សសម្តេចជំនាន់២១ គ្រាំងចេក ឋានៈអនុសេនីយ៍ទោ បានបើករថយន្តថយក្រោយបុកម៉ូតូស្កុបពី ពណ៌ខៀវ-ស គ្មានស្លាកលេខ ជាកម្មសិទ្ធិរបស់ឈ្មោះ យ៉ា ទី ភេទស្រី អាយុ២៣ឆ្នាំ រងការខូចខាតតិចតួច ប៉ុន្តែពុំបណ្តាលឲ្យមនុស្សណាម្នាក់រងរបួសនោះទេ ។ ក្រោយកើតហេតុ ជនបង្កមានអាកប្បកិរិយាអសីលធម៌ មិនគោរពច្បាប់ ពុំសហការជាមួយសមត្ថកិច្ច ហើយបានស្រែកឡូឡាថាខ្លួនជាមានមុខងារជាអង្គរក្សសម្តេចជំនាន់២១ គ្រាំងចេក ឋានៈអនុសេនីយ៍ទោ គ្មានអ្នកណាអាចធ្វើអ្វីខ្លួនបានទេ ទើបសមត្ថកិច្ចសម្រេចចិត្តខ្លួនបញ្ជូនមកកាន់ការិយាល័យធ្វើការសាកសួរ និងដើម្បីអនុវត្តទៅតាមនិតិវិធីច្បាប់ ម្យ៉ាងវិញទៀតដើម្បីបញ្ចៀសនូវហេតុការណ៍ផ្សេងៗដែលអាចផ្តើមចេញពីកំហឹងរបស់ប្រជាពលរដ្ឋ ។
រហូតដល់វេលាម៉ោងជិត៥ល្ងាច បុរសបង្កបទល្មើសខាងលើត្រូវបានសាលាដំបូងខេត្តព្រះសីហនុចេញដីការឃុំខ្លួនបណ្តោះអាសន្នលេខ៦៧៦តពដ១៦ ចុះថ្ងៃទី២៤ ខែឧសភា ឆ្នាំ២០១៦ ដោយលោកចៅក្រមស៊ើបសួរ សុខ សឿន ដោយយោងតាមមាត្រាលេខ៧៥ និងលេខ៨២ នៃច្បាប់ចរាចរណ៍ផ្លូវគោក និងយោងតាមមេត្រាលេខ៦១០នៃច្បាប់ក្រមព្រហ្មទណ្ឌ ពាក់ព័ន្ឋបទចោទចំនួន៣ រួមមាន ១-បើកបរក្នុងស្ថានភាពស្រវឹង ២-ពុំមានប័ណ្ណបើកត្រឹមត្រូវ ពុំមានប័ណ្ណសំគាល់យានយន្ត ៣-បទបង្កើតឲ្យមានការច្រឡំ ជាមួយបំពេញមុខងារសាធារណៈ ប្រព្រឹត្តទៅនៅភូមិ៤ សង្កាត់លេខ៤ ក្រុងព្រះសីហនុ ៕
ចែករំលែកព័តមាននេះ