តាមការសិក្សាបានបង្ហាញថា ស្ត្រីទទួលទានជាប្រចាំប្រភេទអាហារសម្រន់មានដូចជានំប៊ីស្គីត នំខេក ឬនំប៉័ងផ្អែមអាចបង្កើនឱកាសកើតជំងឺមហារីកស្បូនដល់ទៅ៣៣ភាគរយ ។ អត្រានៃការកើតជំងឺនេះ អាចឡើងដល់៤២ភាគរយប្រសិនជាគេទទួលទានប្រភេទអាហារទាំងអស់នេះច្រើនជាង៣ដងក្នុងមួយសប្តាហ៍ ។
លទ្ធផលនៃការសិក្សានេះធ្វើឡើងដោយក្រុមអ្នកវិទ្យាសាស្ត្រមកពីវិទ្យាស្ថាន Karolinska ប្រទេសស៊ុយអែតដែលបានចំណាយពេលអស់ជាច្រើនឆ្នាំបានសិក្សាលើទិន្នន័យព័ត៌មានរបស់បណ្តាស្ត្រីរាប់ម៉ឺននាក់ចន្លោះពីឆ្នាំ១៩៨៧ដល់ឆ្នាំ១៩៩០ ។ ចុះផ្សាយនៅក្នុងព្រឹត្តិបត្រ Cancer Epidemiology,Biomarkers and Prevention ក្រុមអ្នកស្រាវជ្រាវបាននិយាយថា នៅមានផលប៉ះពាល់ជាច្រើនយ៉ាងទៀតដែលប្រភេទអាហារសម្រន់មានរសជាតិផ្អែមចំពោះរាងកាយមនុស្ស ។ ទី១គឺជាតិស្ករច្រើនលើសលប់នឹងធ្វើឱ្យរាងកាយបញ្ចេញអ័រម៉ូនអាំងស៊ុយលីនកាន់តែច្រើន ហើយអាចបណ្តាលឱ្យកោសិកាច្រើនលើសលប់កកើតនៅក្នុង endometrium ដែលជាភ្នាសខាងក្នុងរបស់ស្បូនមនុស្សស្រី ។ ចំណែកបញ្ហាទី២គឺវានឹងជួយជំរុញកម្រិតអ័រម៉ូន oestrogen ដែលត្រូវបានបង្ហាញថា ជាគន្លឹះនៃការលូតលាស់ដែលមិនអាចគ្រប់គ្រងបានរបស់កោសិកាទាំងឡាយ ។
លោកស្រីយីនកា អេបូ នាយកព័ត៌មានសុខភាពរបស់មូលនិធិស្រាវជ្រាវជំងឺមហារីកចក្រភពអង់គ្លេសបាននិយាយថា រក្សាទម្ងន់ខ្លួនឱ្យនៅថេរព្រមទាំងហាត់ប្រាណជាប្រចាំគឺជាមធ្យោបាយដ៏ល្អបំផុតក្នុងការកាត់បន្ថយឱកាសកើតមានជំងឺមហារីកស្បូន ។
ទោះជាយ៉ាងណាក៏ដោយ ក្រុមអ្នកស្រាវជ្រាវបានពិពណ៌នាទំហំនៃការប៉ះពាល់នេះថាមិនជាខ្លាំងប៉ុន្មានទេ ។ ផលប៉ះពាល់នេះទាមទារការស្រាវជ្រាវបន្ថែមទៀត ។ ចំណែកបណ្តាក្រុមអ្នកជំនាញខាងជំងឺមហារីករបស់អង់គ្លេសបានសង្កត់ធ្ងន់ថា វាដូចជាឆាប់រហ័សពេកដែលទាញការសន្និដ្ឋានពីផលប៉ះពាល់ដ៏មុតមាំបែបនេះនោះ ៕
ចែករំលែកព័តមាននេះ