ខេត្តកណ្តាល ៖ ពិធីបុណ្យពុទ្ធាភិសេកព្រះពុទ្ធរូប ព្រះអង្គទ្រង់ឈរប្រោសសត្វ ធ្វើពីស្ពាន់លាយមាស និងប្រាក់ កម្ពស់៩,៩ម៉ែត្រ និងទម្ងន់៩,៩០តោន ទ្រដោយបល័ង្កផ្កាឈូកស៥ស្រទាប់ កម្ពស់៩,៩០ម៉ែត្រ
ខេត្តកណ្តាល ៖ ពិធីបុណ្យពុទ្ធាភិសេកព្រះពុទ្ធរូប ព្រះអង្គទ្រង់ឈរប្រោសសត្វ ធ្វើពីស្ពាន់លាយមាស និងប្រាក់ កម្ពស់៩,៩ម៉ែត្រ និងទម្ងន់៩,៩០តោន ទ្រដោយបល័ង្កផ្កាឈូកស៥ស្រទាប់ កម្ពស់៩,៩០ម៉ែត្រ និងសមិទ្ធផលមួយចំនួនទៀត នៅវត្តព្រះពុទ្ធអណ្តែតហៅវត្តព្រែកហូរ សង្កាត់ព្រែកហូរ ក្រុងតាខ្មៅ ខេត្តកណ្តាល ។
ផ្តួចផ្តើមកសាងឡើងដោយលោកជំទាវ ឧកញ៉ាសៀង ចាន់ហេង ប្រធានក្រុមហ៊ុនហេងអភិវឌ្ឍន៍ និងសប្បុរសជនមួយចំនួនទៀត ពិធីបុណ្យពុទ្ធាភិសេក និងសម្ពោធដារឆ្លងជាផ្លូវការ បានធ្វើឡើងកាលពីរសៀលថ្ងៃទី២១ និងព្រឹកថ្ងៃទី២២ ខែឧសភា ឆ្នាំ២០១៦ ។
លោកជំទាវឧកញ៉ាសៀង ចាន់ហេង មានប្រសាសន៍ថា សមិទ្ធផលដែលបម្រើឲ្យវិស័យព្រះពុទ្ធសាសនា នៅក្នុងទីអារាមព្រះពុទ្ធអណ្តែត ដែលធ្វើបុណ្យពុទ្ធាភិសេក និងបុណ្យឆ្លងនេះ រួមមានរូបព្រះពុទ្ធទ្រង់ឈរប្រោសសត្វកម្ពស់៩ម៉ែត្រ៩តឹក សាងសង់អំពីស្ពាន់ លាយមាស និងប្រាក់ បល័ង្កផ្កាឈូក ប្រាំស្រទាប់ កម្ពស់៩,៩០ម៉ែត្រ ខាងក្នុងបល័ង្កតម្កល់ផ្ទាំងគំនូរផុសអំពីពុទ្ធប្រវត្តិ និងព្រះពុទ្ធរូបអង្គតូចចំនួន៥០០០អង្គ រូបសំណាកស្តេចចក្រទិសទាំង៤ កាន់ឆត្ររួត, រូបសត្វឆ្នាំទាំង១២ រូបព្រះនារាយណ៍ និងព្រះវិស្ណុ ។ សមិទ្ធផលទាំងនេះចាប់ផ្តើមសាងសង់ឡើងកាលពីថ្ងៃទី៥ ខែកញ្ញា ឆ្នាំ២០១២ និងបានបញ្ចប់ជាស្ថាពរនៅថ្ងៃទី២០ ខែឧសភា ឆ្នាំ២០១៦ ដោយចំណាយប្រាក់ សរុបប្រមាណជាង៦៤ម៉ឺនដុល្លារអាមេរិក ក្នុងនោះប្រាក់ផ្ទាល់របស់លោកជំទាវ សៀង ចាន់ហេង ៩០% និងសប្បុរសជន១០% ។ សមិទ្ធផលដែលកសាងឡើងនៅក្នុងអារាមនេះ គឺដើម្បីបូជានៅក្នុងព្រះពុទ្ធសាសនា និងថ្ងៃបុណ្យបុណ្យវិសាខបូជា ដែលទើបកន្លងផុតទៅ ពិសេសសម្រាប់ពុទ្ធបរិស័ទគ្រប់មជ្ឈដ្ឋាន គោរពបូជាតរៀងទៅ ។
អភិបាលក្រុងតាខ្មៅ លោកហេង ធៀម ឱ្យដឹងថា វត្តព្រះពុទ្ធអណ្តែត ជាវត្តមួយមានវ័យចំណាស់ កសាងឡើងនៅសម័យកាលដែលប្រទេសកម្ពុជា ធ្លាក់ក្នុងនឹមត្រួតត្រារបស់អាណានិគមនិយមបារាំង ក្នុងអំឡុងពុទ្ធសករាជ ២៤២៩ គ្រឹស្តសករាជ១៨៨៥ ហើយរហូតមកដល់ពេលនេះមានអាយុកាលជាង១៣០ ឆ្នាំហើយ ដោយឆ្លងកាត់ការដឹកនាំរបស់ព្រះចៅអធិការវត្តចំនួន៦ព្រះអង្គ រួមនិងព្រះចៅអធិការនាបច្ចុប្បន្ននេះ ។
លោកបណ្ឌិតម៉ៅ ភិរុណ អភិបាលខេត្តកណ្តាល ដែលអញ្ចើញជាអធិបតីនាឱកាសនោះបានកោតសរសើរលោកជំទាវសៀង ចាន់ហេង ដែលចំណាយប្រាក់ផ្ទាល់ខ្លួនយ៉ាងច្រើនកសាងសមិទ្ធផលថ្មីបម្រើឱ្យវិស័យព្រះពុទ្ធសាសនា និងបានចាត់ទុកការកកើតឡើងសមិទ្ធផលថ្មីនេះ គឺជាការបញ្ជាក់ពីការរីកចម្រើនបន្ថែមទៀត ក្នុងវិស័យព្រះពុទ្ធសាសនារបស់យើង ពិសេសជួយឲ្យវត្តព្រះពុទ្ធអណ្តែតកាន់តែមានសោភ័ណភាពស្រស់ស្អាត ស័ក្តិសមជាកន្លែងគោរពបូជារបស់ពុទ្ធបរិស័ទ ព្រមទាំងចូលរួមចំណែកលើកស្ទួយវិស័យព្រះពុទ្ធសាសនានៅខេត្តកណ្តាល ក៏ដូចជាប្រទេសកម្ពុជាឲ្យកាន់តែរីកចម្រើនឡើង ៕
ចែករំលែកព័តមាននេះ