ខេត្តកំពង់ឆ្នាំង៖ មនុស្សម្នាក់ស្លាប់នៅនឹងកន្លែង និងម្នាក់ទៀតរងរបួសធ្ងន់ ក្នុងហេតុការណ៍គ្រោះថ្នាក់ចរាចរណ៍មួយកើតឡើងកាលពីវេលាម៉ោង០៣ និង២០ទៀបភ្លឺថ្ងៃទី២៤ ឧសភា ២០១៦ ស្ថិតនៅលើផ្លូវជាតិលេខ៥ ក្នុងភូមិផ្សារ ឃុំផ្សារ ស្រុកបរិបូរណ៌ ខណៈជិះក្នុងរថយន្តធ្លាក់ពីផ្លូវជាតិទៅបុកផ្ទប់ដើមឈើ ។
សមត្ថកិច្ចឱ្យដឹងថា ជនរងគ្រោះដែលស្លាប់ឈ្មោះរឿន សំអាង អាយុ១៨ឆ្នាំ (ជាព្រូ) មានទីលំនៅក្នុងភូមិជើងខ្នា ឃុំពន្លៃ ស្រុកបរិបូរណ៌ និងអ្នកបើករបួសធ្ងន់ឈ្មោះសែម សុជាតិ អាយុ២៩ឆ្នាំ មានទីលំនៅភូមិភូមិក្បាលដំរី ឃុំត្រពាំងចាន់ ស្រុកបរិបូរណ៌ ។
ប្រភពដដែលបន្តថា មុនពេលកើតហេតុ ជនរងគ្រោះ២នាក់ជាកម្មករបើករថយន្តម៉ាកហ៊ីយ៉ាន់ដាយ គ្មានស្លាកលេខ ដឹកទឹកបរិសុទ្ធលក់តាមដេប៉ូ ។ លុះពេលដឹកទឹកលក់អស់ជិះត្រឡប់ទៅវិញ ដោយដឹកអុសខ្លះដាក់ក្នុងរថយន្ត ពេលមកដល់ចំណុចកើតហេតុ ជាផ្លូវកោងប្រហែលជាអ្នកបើកបរបានងោកមួយភាំង បណ្តាលរថយន្តជ្រុលចង្កូតធ្លាក់ផ្លូវមកស្តាំដៃ ទៅបុកផ្ទប់ជាមួយដើមក្ងោក និងដើមចន្ទី បណ្តាលឱ្យស្លាប់ព្រូកៀបជាប់ក្នុងរថយន្ត ចំណែកអ្នកបើកបរបានរងរបួសធ្ងន់តែម្តង ។
ក្រោយពេលកើតហេតុ សមត្ថកិច្ច និងប្រជាពលរដ្ឋនាំគ្នាគាស់រថយន្តយកសពជនរងគ្រោះ និងអ្នករងរបួសធ្ងន់ចេញពីក្នុងរថយន្ត ដោយប្រើរយៈពេលយ៉ាងយូរ ។ បន្ទាប់មក ជនរងគ្រោះដែលរងរបួសធ្ងន់ ត្រូវបានដឹកទៅសង្គ្រោះនៅមន្ទីរពេទ្យជាបន្ទាន់ ចំណែកសពជនរងគ្រោះ ត្រូវក្រុមគ្រួសារដឹកទៅធ្វើបុណ្យតាមប្រពៃណី ។
ចែករំលែកព័តមាននេះ