វិទ្យុស៊ីលី BIOBIO រាយការណ៍ថា យុវជនម្នាក់អាយុ២០ឆ្នាំ ប៉ុនប៉ងធ្វើអត្តឃាតដោយលោតទាំងស្រាតចូលក្នុងទ្រុងតោនៅឯសួនសត្វ METROPOLITAN ZOO ក្រុងសាន់ទីយ៉ាហ្គោ ប្រទេសស៊ីលី ។ បុរសនេះត្រូវពួកតោខាំរបួសធ្ងន់ធ្ងរ ក៏ប៉ុន្តែអាចគេចផុតពីការស្លាប់ ។
ពេលដើរលេងក្នុងសួនសត្វ យុវជន FRANCO LUIS FERRADA ធ្វើខ្លួនដូចជាអ្នកដើរមើលដោយទិញសំបុត្រចូល ។ បន្ទាប់មករូបគេគេចខ្លួនពីប្រព័ន្ធសន្តិសុខ ហើយឡើងលើដំបូលទ្រង់ដាក់ពពួកសត្វសាហាវ ។ យុវជននេះដោះសម្លៀកបំពាក់ចេញ រួចក៏លោតចូលក្នុងទ្រុងមានតោឈ្មោលអាហ្វ្រិកមួយក្បាល និងតោញីមួយក្បាល ។ ពេលនោះតោទាំងនេះចាប់ប្រឡែងយុវជននេះ ហើយក៏វាយប្រហារ។ បុរសនេះភ័យខ្លាំងណាស់ ស្រែករកអ្វីជួយ ពិសេសព្រះយេស៊ូ ។ តាមវីដេអូជាច្រើនផ្សាយតាម YOUTUBE គេឃើញយុវជននេះដេកដួលលើដី លាដៃ ហើយពួកតោគ្រញេចលើក្បាលគេ ។
មានការប្រកាសអាសន្នបុគ្គលិកសន្តិសុខសួនសត្វដំបូងប៉ុនប៉ងបំបែកសត្វតោទាំងនេះ ឱ្យដើរចេញតែមិនសម្រេច ។ បុគ្គលិកម្នាក់ជះទឹកចូលទ្រង់ បន្ទាប់មកក៏ជម្លៀសមនុស្សចេញ ហើយបាញ់ប្រហារ ។ តោទាំង២ក្បាលមានអាយុប្រមាណជា២២ឆ្នាំត្រូវងាប់នៅនឹងកន្លែងញ៉ាំងឱ្យមានការរិះគន់នានា ។ នាយិកាសួនសត្វនេះ លោកស្រី ALEJANDRA MONTALVA មានប្រសាសន៍ថា ខ្មាន់កាំភ្លើងបាញ់សម្លាប់ពួកតោ ដើម្បីជួយសង្គ្រោះជីវិតមនុស្ស ក៏ប៉ុន្តែត្រូវលះបង់សមាជិក២នៃគ្រួសាររបស់យើង ៕
ចែករំលែកព័តមាននេះ