រាជធានីភ្នំពេញ ៖ សេចក្តីរាយការណ៍បឋមឱ្យដឹងថា មានការភ្ញាក់ផ្អើលមួយកើតឡើង បន្ទាប់ពីរថយន្តធំដឹងប្រេងមួយគ្រឿង បានបើកកិនខ្សែភ្លើងមួយមួយដុំធំធ្លាក់កាត់ទទឹងផ្លូវ ខណៈបាក់បង្គោលភ្លើងឈើមួយកាលពីម្សិលមិញ ដោយអាជ្ញាធរធ្វេសប្រហែស មិនបានចាត់ចែងរៀបចំឱ្យបានស្រួលបួលវិញនោះ បណ្តាលឱ្យទុស្សេឆេះ តែត្រូវប្រជាពលរដ្ឋនាំគ្នារត់ទៅយកបំពង់បាញ់ពន្លត់ទាន់ ហើយបានបន្តបាក់បង្គោលរហូតដល់៤ថែមទៀត ។
ហេតុការណ៍នេះ កើតឡើងកាលពីវេលាម៉ោង០១រសៀលថ្ងៃទី២៤ ឧសភា ២០១៦ ស្ថិតនៅចំណុចភូមិត្រពាំងធ្នង់ សង្កាត់សំរោងក្រោម ខណ្ឌពោធិ៍សែនជ័យ ។
ប្រភពឱ្យដឹងថា អ្នកបើកបរខាងលើ មិនបានស្គាល់អត្តសញ្ញាណទេគេចខ្លួនបាត់ បន្សល់ទុកតែរថយន្តម៉ាកហ៊ីណូ ប្រភេទចំណុះ (២ម៉ឺន៨ពាន់លីត្រ) ដឹកប្រេងរបស់ក្រុមហ៊ុន «LHR» មានស្លាកលេខផ្នែកខាងមុខភ្នំពេញ 3A-1885 និងផ្នែកក្រោយភ្នំពេញ 4A-0135 ។
ប្រភពបន្តថា មុនពេលកើតហេតុ ទីតាំងនោះត្រូវបានបាក់បង្គោលឈើ ដោយធ្លាក់ខ្សែភ្លើងមួយដុំធំកាត់ទទឹងថ្នល់ ។ អ្នកដំណើរខ្លះ គាត់មានប្រុងប្រយ័ត្ន ពេលមកដល់ ក៏ចុះលើកខ្សែភ្លើងនោះបញ្ឈរ ទើបធ្វើដំណើរបន្តទៀត ។ ស្រាប់តែមកដល់រថយន្តដឹកប្រេងខាងលើនេះ មិនដឹងថា គាត់មើលមិនឃើញ ឬយ៉ាងម៉េចទេ បានបើកកិនពីលើខ្សែភ្លើងនោះតែម្តង ទើបបណ្តាលឱ្យមានហេតុការភ្ញាក់ផ្អើលនេះកើតឡើង ។
សំណាងហើយ ការទុស្សេខ្សែភ្លើងនេះត្រូវពន្លត់ទាន់ កុំអីមិនដឹងថា មានផ្ទះពលរដ្ឋប៉ុន្មាននាក់ នឹងត្រូវភ្លើងត្របាក់នោះទេ ។
ចែករំលែកព័តមាននេះ