ប្រទេសចិន ៖ ធនាគារអភិវឌ្ឍន៍កសិកម្មចិន ដែលជាធនាគារផ្ដល់ប្រាក់កម្ចីដ៏សំខាន់មួយនៅក្នុងប្រទេស មានផែនការពង្រីកប្រាក់កម្ចីក្នុងទំហំទឹកប្រាក់៣ទ្រីលានយន់ ស្មើនឹងប្រមាណ៤៥៨,៣ប៊ីលានដុល្លារអាមេរិក រហូតដល់ឆ្នាំ២០២០ ដែលជាផ្នែកមួយនៃកិច្ចខិតខំប្រឹងប្រែងរបស់រដ្ឋាភិបាលក្នុងការកាត់បន្ថយភាពក្រីក្រ។ នេះបើយោងតាមប្រព័ន្ធផ្សព្វផ្សាយរដ្ឋ ដែលបានឲ្យដឹងកាលពីថ្ងៃអាទិត្យ ។
កាសែត People Daily បានរាយការណ៍ថា ធនាគារនឹងផ្ដល់កម្ចីចំនួន១,១ទ្រីលានយន់ ដើម្បីគាំទ្រកដល់ការកសាងហេដ្ឋារចនាសម្ព័ន្ធនៅតាមតំបន់ជនបទ ខណៈដែលទឹកប្រាក់១ទ្រីលានយន់ទៀត នឹងគាំទ្រដល់ការធ្វើឲ្យប្រសើរឡើងក្នុងវិស័យឧស្សាហកម្មផលិតកម្មស្រូវ និងដំណាំ ។
ទីភ្នាក់ងារស៊ីនហួរបានស្រង់សម្ដីប្រធានធនាគារ លោក Xie Xuezhi កាលពីថ្ងៃសៅរ៍ថា ៖ « ការបម្លាស់ប្ដូរទីលំនៅរបស់ប្រជាជនស្ថិតនៅក្រោមបន្ទាត់ក្រីក្រ, វិស័យទេសចរណ៍, បរិស្ថាន និងប្រព័ន្ធអប់រំ គឺស្ថិតក្នុងចំណោមវិស័យដទៃទៀតដែលធនាគារនឹងផ្ដល់ប្រាក់កម្ចី ដែលជាផ្នែកមួយនៃកិច្ចខិតខំប្រឹងប្រែងដើម្បីកាត់បន្ថយភាពក្រីក្រ»។
កាលពីខែតុលា ឆ្នាំមុន រដ្ឋាភិបាលបានប្រកាសពីគោលបំណងក្នុងការលើកស្ទួយប្រជាជនក្រីក្ររបស់ខ្លួនចំនួន៧០លាននាក់ឲ្យស្ថិតនៅលើបន្ទាត់ភាពក្រីក្រនៅត្រឹមឆ្នាំ២០២០។ ទន្ទឹមនឹងនេះ កាលពីខែមីនា ដើមឆ្នាំនេះ លោកនាយករដ្ឋមន្ត្រី លី កឺឈាង ក៏បានសន្យាផ្ដល់ប្រាក់បន្ថែម៤៣% នៅក្នុងកម្មវិធីកាត់បន្ថយភាពក្រីក្រផងដែរ ។
យោងតាមតួលេខពីធនាគារពិភពលោកបានឱ្យដឹងថា ចាប់តាំងពីឆ្នាំ១៩៧៨មក ប្រជាជនចិនជាង៨០០លាននាក់បានរួចផុតពីភាពក្រីក្រ ៕
ចែករំលែកព័តមាននេះ