រាជធានីភ្នំពេញ ៖ SCG ជាក្រុមហ៊ុនដ៏ធំមួយប្រចាំតំបន់អាស៊ាន បានត្រៀមនូវទឹកប្រាក់ប្រមាណជាង១៤០លានដុល្លារសម្រាប់ពង្រីកការវិនិយោគរបស់ខ្លួននៅក្នុងតំបន់អាស៊ាន ដោយផ្តោតទៅលើផលិតផលមានគុណតម្លៃបន្ថែមខ្ពស់ និងអភិវឌ្ឍន៍នូវបច្ចេកវិទ្យាច្នៃប្រឌិតថ្មីដែលបំពេញតាមតម្រូវការទីផ្សារ ។
ក្រោយបានឡើងកាន់តំណែងជាថ្នាក់ដឹកនាំជាន់ខ្ពស់នៃក្រុមហ៊ុនឧស្សាហកម្ម និងក្រុមហ៊ុនផលិតស៊ីម៉ង់ត៍ដ៏ធំមួយកាលពីដើមឆ្នាំនេះ លោក Roongrote Ransiyopash ប្រធាន និងអគ្គនាយកក្រុមហ៊ុនអេស ស៊ី ជី (SCG) បានមានប្រសាសន៍ថា ៖ « ក្រុមហ៊ុនរបស់លោកបានកំណត់ទិសដៅកំណើនជាមធ្យម៥%ក្នុងឆ្នាំនេះ សម្រាប់ពង្រឹងការវិនិយោគបន្ថែមទៀត ខណៈដែលទីផ្សារអាស៊ានកំពុងតែកើនឡើងប្រមាណ៥% ជារៀងរាល់ឆ្នាំ ។ យើងចង់សម្រេចបាននូវកំណើនក្នុងកម្រិតដូចគ្នានេះ ឬបើខ្ពស់ជាងនេះកាន់តែប្រសើរ ។ អាស៊ាននៅតែជាទីផ្សារយុទ្ធសាស្ត្រមួយដែលមានសមត្ថភាពចំណាយខ្ពស់ និងមានប្រជាជនជាង៦០០លាននាក់។ យើងមើលឃើញថា តំបន់នេះគឺជាទីតាំងយុទ្ធសាស្ត្រមួយសម្រាប់ការពង្រីកអាជីវកម្ម ក៏ដូចជាពង្រីកវត្តមានរបស់យើងនៅក្នុងប្រទេសបណ្តាអាស៊ាន » ។
លោកបន្តថា ៖ « យើងក៏ចាប់អារម្មណ៍ចំពោះទីផ្សារនៅតំបន់ភាគខាងត្បូងប្រទេសចិនផងដែរ ដែលមានប្រជាជនប្រមាណ៦០ ទៅ៨០លាននាក់ដែលមានសក្តានុពលខ្ពស់ក្នុងការរីកលូតលាស់ ។ អេស ស៊ី ជី កំពុងតែសម្លឹងមើលទីផ្សារនៅបណ្តាទីក្រុងភាគខាងត្បូងប្រទេសចិន ដែលគេរំពឹងថា អាចនឹងមានកំណើនសេដ្ឋកិច្ចយ៉ាងឆាប់រហ័ស ប្រសិនបើមានសេវាភ័ស្តុភារដើម្បីជួយជំរុញប្រតិបត្តិការអាជីវកម្ម ។ អេស ស៊ី ជី នឹងចំណាយពេល២ឆ្នាំ-៣ឆ្នាំ ដើម្បីសិក្សាពីទីផ្សារភាគខាងត្បូងប្រទេសចិន មុននឹងសម្រេចចិត្តទៅលើប្រភេទអាជីវកម្មដែលគួរតែវិនិយោគ ។ សម្រាប់ប្រទេសក្នុងតំបន់អាស៊ានវិញ ក្រុមហ៊ុននឹងបន្តយកចិត្តទុកដាក់ និងពិចារណាថា តើប្រទេសណា និងវិស័យណាមួយដែលគួរតែពង្រីកការវិនិយោគបន្ថែមទៀត » ។
លោកបន្ថែមថា ៖ « ឆ្នាំនេះ អេស ស៊ី ជី គ្រោងនឹងចំណាយទឹកប្រាក់ចំនួន៥ពាន់លានបាត ឬប្រមាណជាង១៤០លានដុល្លារនៃខ្ទង់ថវិកាវិនិយោគរបស់ខ្លួន ដើម្បីពង្រីកអាជីវកម្មនានារបស់ក្រុមហ៊ុននៅក្នុងតំបន់អាស៊ាន រួមទាំងប្រទេសថៃផងដែរ ។ អេស ស៊ី ជី នឹងបន្តផ្តោតលើផែនការរបស់ខ្លួន ក្នុងការបង្កើតផលិតផលប្រកបដោយភាពច្នៃប្រឌិតដើម្បីបំពេញតាមតម្រូវការថ្មីៗនៅក្នុងប្រទេសនីមួយៗ និងបន្តបង្កើតផលិតផលដែលមានគុណតម្លៃបន្ថែមខ្ពស់ ដែលនឹងចូលរួមចំណែកបង្កើតប្រាក់ចំណូលបន្ថែមទៀតដល់ក្រុមហ៊ុន » ។
លោកលើកឡើងថា ៖ « ដើម្បីបង្កើតផលិតផលដែលមានគុណតម្លៃបន្ថែមខ្ពស់ថ្មីៗក្រុមហ៊ុនក៏វិនិយោគកាន់តែច្រើនក្នុងកិច្ចការស្រាវជ្រាវ និងអភិវឌ្ឍន៍ (R&D) ពោលគឺមិនបង្កើនតែខ្ទង់ថវិកាវិនិយោគតែប៉ុណ្ណោះទេ ប៉ុន្តែក៏បង្កើនទាំងធនធានមនុស្សផងដែរ ។ ឆ្នាំនេះ អេស ស៊ី ជី បានត្រៀមបម្រុងទុកប្រមាណ ១% នៃប្រាក់ចំណូលប្រចាំឆ្នាំសរុបរបស់ខ្លួន ឬស្មើនឹងទឹកប្រាក់ប្រមាណ៤ពាន់លានបាតសម្រាប់កិច្ចការស្រាវជ្រាវ និងអភិវឌ្ឍន៍ ។ នេះជាការកើនឡើងពីចំនួនទឹកប្រាក់ត្រឹម៣ពាន់លានបាត ឬស្មើនឹង០,៨% នៃប្រាក់ចំណូលប្រចាំឆ្នាំសរុប កាលពីឆ្នាំមុន ។ លើសពីនេះទៀត ក្រុមហ៊ុនមានបុគ្គលិកប្រមាណ១ពាន់នាក់ដែលកំពុងបំពេញការងារក្នុងផ្នែកស្រាវជ្រាវ និងអភិវឌ្ឍន៍ » ។
លោកលើកឡើងទៀតថា ៖ « ផលិតផលមានគុណតម្លៃបន្ថែមខ្ពស់បានចូលរួមចំណែកប្រមាណជា៣៩% នៃប្រាក់ចំណូលសរុបរបស់យើង ហើយយើងរំពឹងថា ភាគរយនេះនឹងកើនឡើងកាន់តែខ្ពស់បន្ថែមទៀតនៅពេលដែលយើងបន្តអភិវឌ្ឍន៍ផលិតផលទាំងនោះបន្ថែម ។ យើងនឹងមិនបង្កើនចំនួនបុគ្គលិកដែលបំពេញការងារក្នុងផ្នែកស្រាវជ្រាវ និងអភិវឌ្ឍន៍ទេ ។ ប៉ុន្តែយើងនឹងប្រមូលផ្តុំនូវបុគ្គលិកដែលបានបំពេញការងារនៅក្នុងផ្នែកទីផ្សារ និងសេវាអតិថិជន ដែលពួកគាត់មានបទពិសោធន៍ធ្វើការជាមួយអតិថិជនច្រើន ដើម្បីសហការគ្នាបង្កើតគំនិតច្នៃប្រឌិតថ្មី ។ ការធ្វើបែបនេះ នឹងជួយឱ្យក្រុមហ៊ុនបង្កើតផលិតផលថ្មីដែលបំពេញតាមតម្រូវការជាក់ស្តែងរបស់អតិថិជន » ។
គួរបញ្ជាក់ថា ក្រុមហ៊ុន អេស ស៊ី ជី បានធ្វើអាជីវកម្មនៅប្រទេសឥណ្ឌូណេស៊ី និងវៀតណាម ក្នុងវិស័យស៊ីម៉ង់ត៍ សម្ភារសំណង់ សេវាកម្មវេចខ្ចប់ និងផលិតផលគីមីឥន្ធនៈ ។ ចំណែកនៅប្រទេសឡាវ មីយ៉ាន់ម៉ា កម្ពុជា សិង្ហបុរី និងម៉ាឡេស៊ីវិញ ក្រុមហ៊ុនបានផ្តោតលើអាជីវកម្មវេចខ្ចប់ និងសម្ភារសំណង់ ។
ក្រុមហ៊ុនអេស ស៊ី ជី បានបញ្ចេញនូវរបាយការណ៍ថា ខ្លួនរកបានប្រាក់ចំណូលសរុបប្រមាណ១១០ពាន់លានបាត ឬប្រមាណជាង៣ពាន់លានដុល្លារនៅក្នុងត្រីមាសទី១ឆ្នាំនេះ ខណៈប្រាក់ចំណេញសុទ្ធរបស់ក្រុមហ៊ុនក្នុងត្រីមាសទី១នេះ បានកើនឡើងដល់១៣,៦ពាន់លានបាត ឬប្រមាណ៣៨២លានដុល្លារ កើនឡើង២៣% បើធៀបនឹងឆ្នាំមុន ដែលភាគច្រើនបានមកពីផលចំណេញក្នុងអាជីវកម្មវេចខ្ចប់ និងសារធាតុគីមី ៕
ចែករំលែកព័តមាននេះ