«Mirror» របស់អង់គ្លេសកាលពីពេល ថ្មីៗ កន្លងមកផ្សាយថា បុរសជនជាតិអារា៉ប៊ី សាអូឌីតម្នាក់ សម្រេចចិត្តប្តឹងលែងលះប្រពន្ធក្នុងយប់ផ្សំដំណេក ដោយសារតែខឹងនាងមិនរវល់នឹងរូបគេ ហើយគិតតែផ្ញើសារឆ្លើយឆ្លងជាមួយមិត្តភក្តិដែលអបអរសាទរអាពាហ៍ពិពាហ៍របស់នាង ។
ប្តីប្រពន្ធថ្មីថ្មោងនោះបានចូលក្រេបចន្ទទឹកឃ្មុំក្នុងសណ្ឋាគារមួយនៅក្រុង Manama ប្រទេសបារ៉ែន ។ រាត្រីនោះនារីជាប្រពន្ធមិនរវល់នឹងប្តីដែលត្រូវការភាពផ្អែមល្ហែម បែរជាគិតតែផ្ញើសារឆ្លើយឆ្លងជាមួយមិត្តភក្តិ ។
ក្រុមគ្រួសាររបស់ប្តី-ប្រពន្ធនោះបញ្ជាក់ប្រាប់កាសែតក្នុងស្រុក «Alwatan» ថា ភាគីខាងស្រីរវល់តែផ្ញើសារ បដិសេធក្រេបចន្ទទឹកឃ្មុំជាមួយប្តី ។ នៅពេលប្តីប្រាប់ឱ្យនាងឈប់ផ្ញើសារ នាងបដិសេធបង្កឱ្យមានទំនាស់នឹងគ្នា ។ ទោះជាយា៉ងណាក្តី បុរសជាប្តីព្យាយាមលួងលោមផ្លូវចិត្តប្រពន្ធដោយសួរនាងថា «តើរវាងមិត្ត និងរូបគេជាប្តី ខាងណាសំខាន់ជាង ?» ។ នាងជាប្រពន្ធឆ្លើយថា «មិត្តភក្តិ» ដូច្នេះហើយធ្វើឱ្យប្តីខឹងយា៉ងខ្លាំង ។ ភ្លាមនោះបុរសជាប្តីប្រាប់នាងជាប្រពន្ធថា គេនឹងប្តឹងលែងលះនាង ក្រោយពេលចេញពីសណ្ឋាគារ ។
នៅពេលបុរសជាប្តីសុំលែងលះ តុលាការបានចេញបញ្ជាឱ្យពួកគេស្រុះស្រួលគ្នាវិញ ប៉ុន្តែខាងដើមបណ្តឹងមិនព្រម ដោយបញ្ជាក់ថា ដាច់ខាតត្រូវតែលែងលះ ។
ការសន្និដ្ឋានពីហេតុការណ៍នោះនៅមិនទាន់ច្បាស់លាស់នៅឡើយ ខណៈពេលអ្នកជំនាញផ្នែកច្បាប់របស់អារា៉ប៊ី សាអូឌីត ឱ្យដឹងថា បច្ចុប្បន្នអ្នកដែលទើបរៀបការបានលែងលះគ្នាក្នុងអត្រាខ្ពស់ជិត៥០% ៕
ចែករំលែកព័តមាននេះ