រាជធានីភ្នំពេញ ៖ ដោយជឿជាក់លើទេពកោសល្យ ភាពក្លាហាន និងសម្រស់គួរឲ្យទាក់ទាញរបស់ខ្លួន ម្ចាស់ជ័យលាភីលេខ១កញ្ញាសុខ បញ្ញាកា បានចាកចេញពីប្រទេសកម្ពុជាឆ្ពោះទៅវេទិកាប្រកួតលក្ខណៈអន្តរជាតិដ៏អស្ចារ្យក្នុងប្រទេសឥណ្ឌូណេស៊ី ដោយមានស្រីស្អាតពីប្រទេសជាច្រើនទៀតចូលរួម ។
នាថ្ងៃទី២២ ខែឧសភា ឆ្នាំ២០១៦ ក្រុមហ៊ុន SUN Super Models Cambodia បានបញ្ជូនកញ្ញាសុខ បញ្ញាកា ម្ចាស់ជ័យលាភី Miss Cat of The City 2016 ក្នុងកម្មវិធី Miss & Mr Cat of The City 2016 ដែលរៀបចំការប្រកួតវគ្គផ្ដាច់ព្រ័ត្រកាលពីខែមីនាឱ្យទៅចូលរួមប្រកួតក្នុងកម្មវិធី Miss Southeast Asian 2016 នៅប្រទេសឥណ្ឌូណេស៊ីចាប់ពីថ្ងៃទី២៣ដល់ថ្ងៃទី៣០ ខែឧសភា ឆ្នាំ២០១៦ ។
កម្មវិធីប្រកួត Miss Southeast Asian 2016 មានប្រទេសសមាជិកអាស៊ានមួយចំនួនដូចជា ប្រទេសកម្ពុជា ម៉ាឡេស៊ី មីយ៉ាន់ម៉ា ហ្វ៊ីលីពីន សិង្ហបុរី ថៃ វៀតណាម និងប្រទេស ឥណ្ឌូណេស៊ី ជាម្ចាស់ផ្ទះ ។ សម្រាប់អ្នកឈ្នះបវរកញ្ញាអាស៊ីអាគ្នេយ៍នេះត្រូវតែមានពិន្ទុខ្ពស់បំផុតក្នុងការបង្ហាញចេញគ្រប់សកម្មភាពរបស់ខ្លួនអំឡុងពេលចូលរួមការប្រកួតប្រជែង និងការប្រកួតវគ្គផ្ដាច់ព្រ័ត្រ ទាំងការរចនាម៉ូដសម្លៀកបំពាក់ ការបង្ហាញក្បាច់រាំប្រពៃណី ទេពកោសល្យ និងជាជនគំរូល្អបំផុត ក្នុងការដើរបង្ហាញម៉ូដនៅចំពោះមុខទស្សនិកជនផ្ទាល់ ។ កម្មវិធី Miss Southeast Asian 2016 នេះគឺកំពុងពេញនិយម និងទទួលបានការគាំទ្រខ្លាំងបំផុតក្នុងតំបន់អាស៊ីអាគ្នេយ៍ ហើយបានដើរតួនាទីយ៉ាងសំខាន់សម្រាប់បេក្ខនារី ដើម្បីបង្ហាញពីសមត្ថភាពក្នុងអាជីពតារាបង្ហាញម៉ូដដ៏ពិតប្រាកដរបស់ពួកគេទាំងឥរិយាបថល្អ តុល្យភាព និងបច្ចេកទេស ដែលត្រូវបានពិនិត្យយ៉ាងល្អិតល្អន់ដោយចៅក្រម ។ នេះបើតាមការលើកឡើងរបស់លោកខន ប្រសិទ្ធ ដែលជាប្រធានក្រុមម៉ូដែល ។ លោកថ្លែងអំណរគុណអ្នកឧបត្ថម្ភធំ និងសហការឧបត្ថម្ភដែលជួយលើកស្ទួយក្រុមតារាបង្ហាញម៉ូដ និងកូនខ្មែរយើងក្នុងការបង្ហាញសមត្ថភាព ទេពកោសល្យពីធម្មជាតិរបស់ពួកនាងទៅកាន់ប្រទេសដែលជាសមាជិកអាស៊ាន ។
ការចេញទៅប្រកួតនេះក្រោមការឧបត្ថម្ភធំដោយ Migabee Moringa Botanical Skin Care ជាផលិតផលថែរក្សាស្បែករុក្ខសាស្ត្រជាមួយនឹងម្រុំខ្មែរយើងជាមួយនឹងតំណក់ដ៏អស្ចារ្យដើម្បីស្បែកសភ្លឺរលោង និងហាងកាត់ដេរសំលៀកបំពាក់យ័រខ្លូត (YOUR CLOTHESS) ដែលសហការឧបត្ថម្ភសម្លៀកបំពាក់រាត្រីសមោសរយ៉ាងស្រស់ស្អាតសម្រាប់ចូលរួមការប្រកួតនេះ ។
កញ្ញាសុខ បញ្ញាកា មានការជូនដំណើរពីតារាបង្ហាញម៉ូដរៀមច្បង អ្នករួមជំនាន់ និងមិត្តភក្តិមួយចំនួន ។
កញ្ញាសុខ បញ្ញាកា ប្ដេជ្ញាចិត្តបង្ហាញទេពកោសល្យដើម្បីដណ្ដើមយកជ័យលាភីក្នុងកម្មវិធីនេះ ដែលអាចជួយលើកស្ទួយមុខមាត់ប្រទេសកម្ពុជាយើង ។ ផ្សារភ្ជាប់ជាមួយគ្នានេះនាងសូមឲ្យទស្សនិកជនខ្មែរទាំងអស់ជួយផ្តល់កម្លាំងចិត្តអំឡុងពេលដែលនាងកំពុងមានវត្តមានប្រកួតប្រជែងជាមួយបណ្តាប្រទេសនានានៅលើទឹកដីប្រទេសឥណ្ឌូណេស៊ីគ្រាដែលកម្ពុជាយើងកាន់តែសម្បូរអ្នក ពូកែៗ ប្រជែងយកជ័យជម្នះនៅលើឆាកអន្តរជាតិ ។
សាន់ស៊ូពើម៉ូដែល ជាក្រុមហ៊ុនដើរម៉ូដមួយមានភាពល្បីល្បាញនាពេលបច្ចុប្បន្នដែលមានអ្នកដឹកនាំឈ្លាសវៃក្នុងការច្នៃប្រឌិតប្លង់ដើរបំបែកក្រឡាបង្ហាញម៉ូដបានយ៉ាងល្អនៅលើឆាកសម្តែង ព្រមទាំងការរចនាម៉ូដសម្លៀកបំពាក់ សក់ ទាំងបុរាណ-សម័យទស្សនាប្លែកគួរឲ្យចាប់អារម្មណ៍ ។ ក្រុមហ៊ុនមួយនេះតែងតែស្ពាយយកភាពជោគជ័យពីក្រៅប្រទេសជូនជាតិកម្ពុជាច្រើនកម្មវិធីមកហើយ តាមរយៈការប្រកួតសម្រស់ទាំងបុរស និងនារី ។ បច្ចុប្បន្នសាន់ស៊ូពើម៉ូដែល កំពុងតែមមាញឹកកម្មវិធីច្រើននៅក្នុងស្រុក ហើយក្រុមមួយនេះបានចែករំលែកសកម្មភាពជួយសង្គមតាមរយៈរូបភាពមនុស្សធម៌នាពេលកន្លងមក ៕
ចែករំលែកព័តមាននេះ