រាជធានីភ្នំពេញ ៖ មន្ត្រីគយច្រកទ្វារម្នាក់ ត្រូវភរិយានិងកូន បានទៅឆាឆៅដល់សណ្ឋាគារសុវណ្ណបុរីថ្មី ស្ថិតនៅខាងក្រោយបុរីកីឡា ដោយសារតែមន្ត្រីរូបនេះ នាំស្រីក្មេងមកក្រេបទឹកឃ្មុំយ៉ាងសុខសាន្តពេញ១រាត្រី ។ លុះព្រឹកឡើង ថ្ងៃទី២៣ ឧសភា ទើបមានការភ្ញាក់ផ្អើលឈុលនាំខ្មាស់គេឯងទាំងព្រឹកព្រលឹមតែម្តងទៅ ។
សណ្ឋាគារសុវណ្ណបុរីថ្មី មានទីតាំងស្ថិតក្នុងសង្កាត់វាលវង់ ខណ្ឌ៧មករា ។ រឿងអាស្រូវផ្លូវភេទនេះ ពុំមានអ្នកណាបញ្ចេញឈ្មោះមន្ត្រីគយនោះឱ្យដឹងទេ ។ ទោះជាយា៉ងណា ក៏ត្រូវបានគេបង្ហើបឱ្យដឹងថា បុរសម្នាក់នោះជាមន្ត្រីគយប្រចាំច្រកទ្វារព្រំដែនត្រពាំងផ្លុង ។
ជុំវិញបាតុភាពនេះ អ្នកខ្លះនិយាយថា រឿងនាំស្រីដេកផ្ទះសំណាក់ឬសណ្ឋាគារ វាជារឿងសាមញ្ញទៅហើយ សម័យណាក៏ដូចសម័យណាដែរ សម្រាប់អ្នកសំបូរលុយចាយដូចជាលោកគយម្នាក់នេះជាដើម មិនគួរលោកស្រី មិនទុកឱកាសឱ្យគាត់ស្គាល់រសជាតិស្មៅខ្ចីខ្លះៗផងទេ ។ ប៉ុន្តែអ្នកខ្លះទៀតបានជំទាស់មតិខាងលើនេះ ដោយលើកឡើងថា ថ្វីបើសំបូរលុយចាយ អាចទិញស្រីក្មេងមកត្រេកត្រអាលបានក៏ពិតមែន តែវាមិនមែនជារឿងដែលគិតតែពីភាពងាយៗបាននោះទេ នៅពេលដែលមានការឈ្លក់វង្វេងហើយ ប្រហែលជាកាន់តែលង់ខ្លួននឹងស្រីក្មេង ទីបំផុតនឹងជួបរឿងអាម៉ាស់មិនខាន ។
ប្រភពព័ត៌មាននៅកន្លែងកើតហេតុ ត្រូវបានរៀបរាប់ឱ្យដឹងថា កាលពីយប់ថ្ងៃទី២២ ឧសភា បុរសចំណាស់ម្នាក់ដែលក្រុមគ្រួសារអះអាងថា ជាមន្ត្រីគយ បាននាំស្រីកំណាន់ម្នាក់មករួមមេត្រីនៅសណ្នាគារសុវណ្ណបុរីថ្មី ។ ខណៈពេលបុរសជាប្តីនាំស្រីស្អាតទៅដេកនៅសណ្ឋាគារនោះ ស្ត្រីជាប្រពន្ធនិងកូនប្រុសស្រី២នាក់ ក៏បានទៅជួលបន្ទប់មួយពីមុខបន្ទប់ប្តីដេកនោះដែរ ដើម្បីឃ្លាំចាំចាប់យកភស្តុតាងជាក់ស្តែង នៅពេលប្តីនាំស្រីចេញពីបន្ទប់ ។
ពេលនោះស្រី្តជាប្រពន្ធ និងកូនបានរៀបរាប់ប្រាប់អ្នកទទួលខុសត្រូវសណ្ឋាគារថា ពួកគាត់តាមសកម្មភាពប្តីច្រើនលើកច្រើនសារមកហើយ ប៉ុន្តែចាប់ភស្តុតាងមិនបានរឹងមាំសោះ លើកណាក៏លោកប្តីតែងតែបដិសេធ បើទោះបីធ្លាប់ជួបគ្នាជាមួយស្រីកំណាន់ រហូតមានការសម្របសម្រួល គ្នាយ៉ាងណាក៏ដោយ ។ និយាយទៅស្ត្រីជាប្រពន្ធ និងកូនទាំង២នាក់ នៅតែចោទប្រកាន់បុរសជាប្តីនិងឪពុកថា លួចលាក់មានស្រីកំណាន់ ដូច្នោះការតាមរករឿងនេះពួកគេចង់ឲ្យប្តី និងឪពុកទទួលស្គាល់ការពិត ហើយទាមទារឲ្យផ្តិតមេដៃលែងលះ និងទទួចឲ្យស្រីកំណាន់ម្នាក់នោះចេញមុខសារភាពហើយយកគ្នាធ្វើជាប្តីប្រពន្ធចុះ ។
ពេលបុរសជាប្តីស្នាក់នៅបន្ទប់មួយ ប្រពន្ធស្នាក់នៅបន្ទប់មួយទល់មុខគ្នារង់ចាំមើលសកម្មភាពប្តីយប់នោះដែរ ។ ស្ត្រីជាប្រពន្ធបានលបចេញទៅដាក់ពាក្យបណ្តឹងនៅសមត្ថកិច្ចមូលដ្ឋាន ដើម្បីឲ្យជួយអន្តរាគមន៍ឃាត់ប្តីដែលនាំស្រីកំណាន់មករមួលសួតនៅសណ្ឋាគារនោះ ។ សមត្ថកិច្ចហាក់ដូចជាមានភាពទាល់ច្រកក្នុងរឿងបណ្តឹងផ្ទាល់មាត់ពីអំពើផិតក្បត់បែបនេះ ។ លុះពេលព្រឹកព្រលឹមអុរ ស្ត្រីជាប្រពន្ធបានទាក់ទងសាច់ញាតិឲ្យមកជួយចាំមើល និងឃាត់ប្តី ព្រមទាំងស្រីកំណាន់រូបនោះ ដើម្បីជាចំណងរឹងមាំសម្រាប់ដាក់បន្ទុកកុំឲ្យប្តីប្រកែកដោះសារបានតទៅទៀត ។
ពេលនោះបានធ្វើឲ្យមានការភ្ញាក់ផ្អើលដល់អ្នកកាសែត ចាំថតយកព័ត៌មានពីសង្គ្រាមហែកអាវប្ដីលួចសៅគ្រីនេះ ។ លុះនៅវេលាម៉ោងប្រមាណ៩ព្រឹកថ្ងៃទី២៣ ឧសភា បុរសម្នាក់ដែលស្ត្រីជាប្រពន្ធនិងកូន រង់ចាំចាប់យកភស្តុតាងរឹងមាំ បានចុះពីបន្ទប់ស្នាក់អាស្រ័យ គឺចុះម្នាក់ឯងជាធម្មតាដូចអត់មានដឹងថា នៅខាងក្រៅបន្ទប់មានខ្លាចាំត្របាក់ឡើយ ។ ពេលចុះដល់កន្លែងគិតលុយស្រាប់តែស្ត្រីជាប្រពន្ធ និងកូន២នាក់ បានចាប់ដៃជាប់មិនឲ្យចេញ ព្រមទាំងបានឡាំប៉ាទាមទារឲ្យបុរសជាប្តីបង្ហាញមុខស្រីកំណាន់ដែលនាំទៅរមួលសួតយប់មិញ ត្រូវបុរសជាប្តីបដិសេធចំពោះមុខថា នេះជាការតាមរំខាន ហើយក៏ជាការធ្វើឱ្យលោកបាត់បង់កិត្តិយស ។
បុរសដែលគេថាជាមន្ត្រីគយនោះ បានទាំងនិយាយទៅកាន់អ្នកសារពត៍មានយ៉ាងសមរម្យថា នេះជារឿងក្រុមគ្រួសារមិនពាក់ព័ន្ធជាមួយអ្នកណាទេ ព្រោះប្រពន្ធរបស់លោកច្រើនតែតាមឆាឆៅលោកជានិច្ច ។ ពេលនោះបុរស និងស្ត្រីព្រមទាំងកូន មានការជជែកគ្នាផ្អើលនៅសណ្ឋាគារសុវណ្ណបុរីថ្មី រហូតដល់សមត្តកិច្ចមូលដ្នានបានចុះទៅសម្រុះសម្រួល ខាងស្ត្រីជាប្រពន្ធនៅតែមិនព្រម គឺសុំឲ្យតែម្យ៉ាង គឺបង្ហាញមុខស្រីកំណាន់របស់ប្តី ។ ទីបំផុតបុរសជាប្តីបានសម្រេចចិត្ត ចេញម៉ាខ្លួន ឡើងជិះរ៉ឺម៉កម៉ូតូចេញផុតទៅ ខណៈប្រពន្ធកូនបានដកសោរថយន្តឡិចស៊ីស៤៥០ពណ៌ស ទូរស័ព្ទដៃទុក ព្រមទាំងកាបូបប្រាក់មួយ ។
ក្រោយពេលបុរសជាប្តី និងជាឪពុកចេញទៅផុត ស្ត្រីជាប្រពន្ធនិងកូនព្រមទាំងសាច់ញាតិ មិនអស់ចិត្តបានសុំម្ចាស់សណ្ឋាគារឡើងទៅមើលបន្ទប់ដែលប្តីដេក ដើម្បីចាប់ស្រីកំណាន់សម្រាប់ដាក់បន្ទុកលើបុរសជាប្តី ។ ម្ចាស់សណ្ឋាគារក៏បានសហការតាមសំណូមពរ ។ នៅពេលទៅឆែកបន្ទប់ដែលដេកមួយយប់នោះ មិនបានឃើញស្រីដែលអះអាងថាជាស្រីកំណាន់របស់ប្តីទេ ។
ពេលរកមិនឃើញស្រីកំណាន់នោះស្ត្រីជាភរិយានិងកូននៅតែមិនអស់ចិត្ត បានសុំឲ្យម្ចាស់សណ្ឋាគារឆែកមើលកាមេរ៉ាសុវត្ថិភាពទៀត គឺមើលពេលវេលាម៉ោងប្តីនាំស្រីទៅដេក ពេលនោះម្ចាស់សណ្ឋាគារក៏មិនជំទាស់ ហើយឆែកក៏មិនបានឃើញស្រីកំណាន់របស់ប្តីនោះដែរ ។ ក្រោយពេលដឹងថា តាមទាន់ជាន់កែងប៉ុណ្ណឹងហើយនៅតែរបូត ស្ត្រីជាប្រពន្ធបានពោលពាក្យដាក់មន្ទិលសង្ស័យថា ម្ចាស់សណ្ឋាគារអាចមានចេតនាជួយលាក់បាំងស្រីកំណាន់របស់ប្តី អាចធ្លាយរឿងហើយជំលៀស ស្រីកំណាន់នោះចេញទៅបន្ទប់ផ្សេង ។
រឿងនេះកើតឡើងពេញមួយព្រឹកដែលការស្វែងរកចាប់យកភស្តុងមិនទាន់ជាក់ស្តែងបែបនេះ ខាងស្ត្រីជាប្រពន្ធនិងកូនខកចិត្ត ដោយទាំងអ្នកកាសែតទូរទស្សន៍ ដែលឃើញមានតែតួអង្គម្ខាងចាត់ទុកថា ម្ខាងទៀតជាស្រមោល ក៏បែកគ្នាទៅប្រកបមុខរបររៀងខ្លួនវិញទៅ ។
អ្វីដែលកត់សម្គាល់ នៅពេលភាគីខាងភរិយាលោកគយ និងក្រុមអ្នកប្រមាញ់ព័ត៌មានចេញផុតមួយភ្លែត គេបានឃើញរថយន្តទំនើប១គ្រឿង បានទយគូទចូលដល់មាត់ទ្វារសណ្ឋាគារ និងបានឃើញស្ត្រីរាងស្វែលម្នាក់ រុំកន្សែងជិតមុខ ដើរចេញពីខាងក្នុង ដោយមានការជួយបិទបាំងខ្លះៗផងនាំចូលក្នុងរថយន្ដ បើកចេញយ៉ាងប្រញាប់ប្រញាល់ដោយសុវត្ថិភាពទៅ ដែលអ្នកនៅទីនោះនិយាយថា អាចជាស្រីកំណាន់របស់មន្ត្រីគយរូបនោះហើយមើលទៅ ។
ព័ត៌មានទាំងអស់ដែលកោះសន្តិភាពទទួលបាននេះ មិនត្រូវបានភាគីណាមួយបញ្ជាក់ពីអង្គហេតុឲ្យច្បាស់លាស់ទេ គឺជាព័ត៌មានទទួលបានជាក់ស្តែងនៅកន្លែងកើតហេតុតែប៉ុណ្ណោះ និងមិនមានចេតនាណាមួយបំផ្លើស ឬធ្វើឱ្យបាក់មុខបាក់មាត់ភាគីណាមួយឡើយ ៕
ចែករំលែកព័តមាននេះ