រាជធានីភ្នំពេញ ៖ តារាចម្រៀងក្នុងផលិតកម្មភ្លេងរីខត នាងវ៉ាន់ នីឡា និងគូស្នេហ៍របស់នាងបានសរសេរសារបង្ហោះឆ្លើយឆ្លងគ្នាបង្ហាញ ទឹកចិត្តដែលចង់បាន រៀងៗខ្លួន ខណៈពេលដែលចំណងស្នេហ៍របស់ពួកគេ
រាជធានីភ្នំពេញ ៖ តារាចម្រៀងក្នុងផលិតកម្មភ្លេងរីខត នាងវ៉ាន់ នីឡា និងគូស្នេហ៍របស់នាងបានសរសេរសារបង្ហោះឆ្លើយឆ្លងគ្នាបង្ហាញ ទឹកចិត្តដែលចង់បាន រៀងៗខ្លួន ខណៈពេលដែលចំណងស្នេហ៍របស់ពួកគេទាំងពីរនៅមិនទាន់ផ្សះផ្សាគ្នាបាននៅឡើយ ។
តារាចម្រៀងវ៉ាន់ នីឡា តែងតែសរសេរ បង្ហោះតាមហ្វេសប៊ុកស្តីពីអារម្មណ៍ពិត និងភាពឈឺចាប់ដែលខ្លួនបានទទួល បន្ទាប់ពីចំណងស្នេហ៍មិនទាន់ត្រឡប់មករកសភាពដូចដើមវិញ ខណៈពេលដែលគូស្នេហ៍របស់នាងបានឆ្លើយតប និងព្យាយាមផ្សះផ្សាគ្នាជាថ្មីឡើងវិញ ។
ជាការកត់សម្គាល់លើទំព័រហ្វេសប៊ុករបស់ខ្លួន វ៉ាន់ នីឡា សរសេរថា «សុខចិត្តជ្រើសរើសមនុស្សដែលសាមញ្ញ ប៉ុន្តែស្រលាញ់ថ្នាក់ថ្នមអាណិតប្រពន្ធ វាប្រសើរជាងរស់នៅក្នុងវីឡាស្កឹមស្កៃ ឡានទំនើប មានបុណ្យសក្តិ ប៉ុន្តែរស់នៅប្រៀបបីដូចជាទាសករ ឃើញផ្ទាល់ភ្នែក ឮផ្ទាល់ត្រចៀកលោកអើយ! ហេតុតែគេមានអំណាច វៃ៉ធ្វើបាបប្រពន្ធតាមចិត្ត ហើយប្រពន្ធជាស្ត្រីទន់ខ្សោយ គ្រួសារអ្នកសាមញ្ញ គ្មានយសសក្តិដូចប្តី ។ គេជេរ គេវ៉ៃ ឃុំឃាំង ទៅណាមួយជំហានមិនបាន ឡានដាក់សុទ្ធតែ GPS ឈ្លោះគ្នា ម្តងៗកាំភ្លើងលើក្បាលដេកទាំងភ័យខ្លាច ។ អីុចឹងបានថា លុយសំខាន់…ទាំងអ្នកមាន ទាំងអ្នកក្រសុទ្ធតែត្រូវការវា ប៉ុន្តែបើសិនជាអ្នកណាដែលបានដឹងឮ និងហែលឆ្លងនូវរឿងរ៉ាវទាំងអស់នេះ នោះអ្នកនឹងលែងត្រូវការ ហើយលុយទ្រព្យសម្បត្តិហូរហៀរ សុំត្រឹមតែមានជីវភាពសមល្មម តែមានសុភមង្គលក្នុងគ្រួសារ តែបើមានលុយហើយគេទាត់ធាក់ ហើយមានស្រីទៀត ក៏លុយទាំងអស់នោះមិនអាចទិញទឹកភ្នែកអ្នកបានដែរ ! អីុចឹងបានដូចពាក្យមួយឃ្លាដែលគេនិយាយថា «ស៊ូធ្វើព្រះនាងសម្រាប់ប្តីអ្នកក្រ កុំធ្វើជាខ្ញុំកំដរសម្រាប់ប្តីអ្នកមាន» ។
គ្មានការជួបជុំណាមួយដែលមិនបែកបាក់ មនុស្សមួយចំនួនស្អប់ពាក្យនេះ ដោយសារអ្វី ? ដោយសារតែវាត្រូវពេក» ។
ដោយឡែកសម្រាប់គូស្នេហ៍របស់វ៉ាន់ នីឡា ដែលគេស្គាល់ថា ជាកូនមន្ត្រីថ្នាក់ខ្ពស់មួយរូបឈ្មោះសិទ្ធីសក្តិ បានសរសេរសារបង្ហោះតាមហ្វេសប៊ុកថា «មនុស្សណាដែលមិនចេះខុស តែសំខាន់ដឹងខុសហើយចេះកែទាន់នៅមានឱកាស ចង់ប្រាប់ថាខ្ញុំនៅទីនេះ ចាំលើកទឹកចិត្តអ្នក ជួយប្រាប់និងដាស់តឿនអ្នកគ្រប់ពេល ដោយមិនខ្លាចនឿយហត់ ហើយមិនមែនមានតែខ្ញុំទេ គឺអ្នកមានគ្រួសារជាទីស្រលាញ់ ហើយនិងមិត្តភក្តិដ៏ល្អនៅជួយជាកំលាំងចិត្ត ។ ខ្ញុំចង់និយាយប្រាប់អ្នក និងពិភពលោកនេះថា អ្នកមិនឯកាទេ» ។
កូនមន្ត្រីប៉ូលិសថ្នាក់ខ្ពស់រូបនេះហាក់បង្ហាញពីការព្យាយាមផ្សះផ្សាចំណងស្នេហ៍របស់ខ្លួនដែលជួបភាពរង្គោះរង្គើឡើងវិញ បន្ទាប់ពីខ្លួនបានបញ្ចប់ការសិក្សានៅឯក្រៅប្រទេស។
កន្លងមកនាងវ៉ាន់ នីឡា បានបង្ហាញមុខគូស្នេហ៍ជាចំហ និងបានបង្ហោះរូបភាពផ្អែមល្ហែមជាមួយគ្នាលើទំព័រហ្វេសប៊ុកជាបន្តបន្ទាប់ មុននឹងឈានដល់ភាពរកាំរកូសគ្នាក្នុងរយៈពេលចុងក្រោយនេះ ។ ភាពរកាំរកូសនេះត្រូវគេដឹងថា ដោយសារតែភាពមិនយល់ចិត្តគ្នា និងមានភាពប្រចែប្រចណ្ឌច្រើន តែយ៉ាងណាក្តីភាគីខាងប្រុសតែងតែព្យាយាមសម្របសម្រួល និងទទួលកំហុសរបស់ខ្លួន ដើម្បីផ្សះផ្សាចំណងស្នេហ៍ឱ្យដូចដើមវិញ ៕
ចែករំលែកព័តមាននេះ