រាជធានីភ្នំពេញ ៖ ដើម្បីពង្រឹងទំនាក់ទំនង និងពង្រីកការធ្វើពាណិជ្ជកម្មទ្វេភាគីរវាងប្រទេសកម្ពុជា និងថៃ ខាងអគ្គនាយកដ្ឋានជំរុញពាណិជ្ជកម្មអន្តរជាតិនៃក្រសួងពាណិជ្ជកម្មថៃ និងសហព័ន្ធកីឡាយានយន្តកម្ពុជា នឹងរៀបចំដំណើរកម្សាន្តជាលក្ខណៈមិត្តភាពតាមផ្លូវគោក (KARALLY) ទៅកាន់ប្រទេសថៃ នៅថ្ងៃទី២៦ ដល់ថ្ងៃទី៣០ ឧសភា ខាងមុខនេះ ហើយក្នុងឱកាសនោះដែរ នឹងមានបង្កើតជាវេទិកាចាប់ដៃគូពាណិជ្ជករលំដាប់អ្នកជំនួញមហាសេដ្ឋីនៃប្រទេសទាំងពីរនៅក្នុងទីក្រុងបាងកក ដើម្បីធ្វើពាណិជ្ជកម្មរួមគ្នា ។
លោកស្រី ជីរ៉ាណាន់ វង្សមង្គល អគ្គទីប្រឹក្សារពាណិជ្ជកម្មនៃស្ថានទូតថៃប្រចាំកម្ពុជា បានមានប្រសាសន៍ក្នុងសន្និសីទសារព័ត៌មាន កាលពីថ្ងៃទី១៩ ឧសភា នៅភោជនីយដ្ឋានទន្លេបាសាក់២ ថា ៖ « នៅក្នុងដំណើរកម្សាន្តជាលក្ខណៈមិត្តភាពតាមផ្លូវគោកនេះ គឺគ្រោងនឹងចាប់ផ្តើមនាពេលខាងមុខ ដោយបែងចែកកម្មវិធីសំខាន់ៗជា២គឺ ៖ ១-ជាកិច្ចសហការវាងសហព័ន្ធកីឡាយានយន្តកម្ពុជា-ថៃ និង២-នៅថ្ងៃទី២៨ ឧសភា យើងនឹងអញ្ជើញថ្នាក់ដឹកនាំ និងអ្នកជំនួញថ្នាក់មហាសេដ្ឋីនៅកម្ពុជា ដើម្បីចូលរួមក្នុងវេទិកាចាប់ដៃគូពាណិជ្ជកម្មរវាងថ្នាក់មហាសេដ្ឋីនៃប្រទេសទាំងពីរឱ្យបានស្គាល់គ្នា ដើម្បីមានឱកាសធ្វើពាណិជ្ជកម្មជាមួយគ្នា ក្នុងន័យបង្កើន និងពង្រឹងការធ្វើពាណិជ្ជកម្មរវាងប្រទេសទាំងពីរផងដែរ » ។
លោកស្រីបន្តថា ៖ « កាលពីឆ្នាំ២០១៥ កន្លងទៅ ទំហំពាណិជ្ជកម្មថៃ-កម្ពុជា មានទឹកប្រាក់ចំនួន៥,៣លានដុល្លារ ក្នុងនោះប្រទេសថៃបាននាំចូលមកកម្ពុជាមានទឹកប្រាក់៤,៧លានដុល្លារ ហើយកម្ពុជាបាននាំចូលទៅថៃវិញ ស្មើនឹងទឹកប្រាក់៥០០លានដុល្លារ ហើយបៀបធៀបនឹងឆ្នាំ២០១៤ គឺកើនឡើងប្រមាណ១៥% ។ ដោយឡែក ទំហំពាណិជ្ជកម្មរវាងប្រទេសទាំងពីរក្នុងរយៈពេល៤ខែដើមឆ្នាំនេះ បានកើនឡើងប្រហែល១១% បើធៀបនឹងឆ្នាំ២០១៥ ហើយនៅពេលដំណាច់ឆ្នាំ២០១៦ នឹងមានកំណើនខ្ពស់ជាងនេះបន្ថែមទៀត » ។
លោកស្រីបន្ថែមថា ៖ « តាមស្ថិតិរបស់ក្រសួងអភិវឌ្ឍន៍កម្ពុជា (CDC) ឃើញថា នៅដើមឆ្នាំ២០១៦ ពាណិជ្ជករថៃដែលមកវិនិយោគទុននៅក្នុងប្រទេសកម្ពុជា បានជាប់ចំណាត់ថ្នាក់លេខរៀងទី១០ ក្នុងចំណោមប្រទេសផ្សេងទៀត ។ ទោះបីជាយ៉ាងណា យើងចង់ឲ្យវិនិយោគិនថៃមកវិនិយោគនៅកម្ពុជាបានច្រើនជាងនេះទៀត គឺអាចស្ថិតក្នុងលំដាប់ថ្នាក់លេខទី៤ ឬទី៥ ដូចកាលពី១០ឆ្នាំមុន ។ ឆ្លងកាត់តាមការរៀបចំកម្មវិធីដំណើរកម្សាន្តរវាងកម្ពុជានិងថៃលើកនេះ ខ្ញុំសង្ឃឹមថា ខាងភាគីកម្ពុជា ជាពិសេស ពាណិជ្ជករកម្ពុជានឹងមានឱកាសបង្ហាញដល់ពាណិជ្ជករថៃឲ្យបានឃើញពីសក្តានុពលនៃប្រទេសកម្ពុជា ដើម្បីឲ្យពាណិជ្ជករថៃបានយល់ដឹងកាន់តែច្បាស់ និងបានមកវិនិយោគបន្ថែមនៅកម្ពុជា » ។
ក្នុងឱកាសនោះដែរ លោក មៀច សុផាណា ប្រធានសហព័ន្ធកីឡាយានយន្តកម្ពុជា បានមានប្រសាសន៍ថា ៖ « ខ្ញុំចាត់ទុកថា ក្បួនដំណើរកម្សាន្តលក្ខណៈមិត្តភាពតាមផ្លូវគោក (KARALLY) នេះ គឺជាក្បួននិម្មិតរូបនៃមិត្តភាពរវាងសហព័ន្ធកីឡាយានយន្តកម្ពុជា-ថៃ ។ ក្បួននេះ វាមិនត្រឹមតែជាក្បួនកីឡាប៉ុណ្ណោះទេ ថែមទាំងជាក្បួននាំមកនូវទំនាក់ទំនងផ្នែកពាណិជ្ជកម្ម ទេសចរណ៍ និងជាក្បួននិម្មិតរូបល្អនៃប្រទេសទាំងពីរផងដែរ ដែលយើងនឹងប្រឹងប្រែងជំរុញ លើកតម្កើងឲ្យបានខ្ពង់ខ្ពស់ » ។
លោកបញ្ជាក់ថា ៖ « ក្បួន KARALLY នឹងចាប់ផ្តើមនាពេលខាងមុខ ដោយមានរថយន្តចំនួន១៩គ្រឿង ម៉ូតូ១១គ្រឿង ហើយមានកីឡាករបញ្ជាយានយន្តឆ្លាស់គ្នាចំនួន៥៩រូបសំខាន់ៗ។ ក្បួនលើកទី១នេះ យើងសង្ឃឹមថា នឹងទទួលបានជោគជ័យ ដោយអាចប្រមូលបាននូវបទពិសោធន៍ ទំនាក់ទំនង និងឲ្យបានស្គាល់គ្នាបន្ថែមទៀតរវាងពាណិជ្ជករនៃប្រទេសទាំងពីរកម្ពុជា-ថៃ » ។
លោក Nuthavudh Photisaro ឯកអគ្គរាជទូតថៃប្រចាំកម្ពុជា បានថ្លែងថា ៖ « នេះគឺជាកម្មវិធីថ្មីមួយ និងជាលើកដំបូងផងដែរ ហើយមានសារសំខាន់ក្នុងការរឹតចំណងមិត្តភាពរវាងប្រទេសយើងទាំងពីរ ។ ខ្ញុំគិតថា ដំណើរកម្សាន្តលក្ខណៈមិត្តភាពតាមផ្លូវគោក KARALLY នេះ នឹងជួយបង្កើននូវទំនាក់ទំនងមិត្តភាពរវាងប្រជាជន និងប្រជាជន ដែលជាមូលដ្ឋានគ្រឹះនៃប្រទេសទាំងពីរ ។ ខ្ញុំជឿជាក់ថា ការរៀបចំកម្មវិធីដំណើរកម្សាន្តលក្ខណៈមិត្តភាពរវាងកម្ពុជា-ថៃ និងកម្មវិធី Thai-Cambodia Business Networking នឹងសម្រេចបានជោគជ័យដូចការគ្រោងទុក » ៕
ចែករំលែកព័តមាននេះ