យោងតាមការសិក្សាថ្មីមួយបានបង្ហាញថា ការដេករយៈពេលខ្លីជាពិសេសនៅពេលរសៀលអាចបង្កើនហានិភ័យពីជំងឺទឹកនោមផ្អែមប្រភេទ២ ។ ការសិក្សាដែលធ្វើលើមនុស្សជាង២ម៉ឺន៧ពាន់នាក់នៅប្រទេសចិនបានបង្ហាញថា អ្នកដែលដេកប្រហែលជាកន្លះម៉ោងក្រោយបាយថ្ងៃត្រង់រួចជួបឱកាសកើតមានជំងឺទឹកនោមផ្អែមប្រភេទ២ក្នុងកម្រិតមួយខ្ពស់ ។ បន្ថែមពីនេះទៀត ពួកគេក៏ជួបអត្រាប្រឈមនឹងជំងឺលើសឈាម និងលើសខ្លាញ់កូឡេស្តេរ៉ូលផងដែរ ។
ការរកឃើញដែលបានចុះផ្សាយនៅក្នុងព្រឹត្តិបត្រ Sleep Medicine លើកនេះហាក់ផ្ទុយគ្នាទៅនឹងលទ្ធផលនៃការសិក្សាកាលពីពេលថ្មីៗដែលរកឃើញថា ដំណេកក្នុងពេលថ្ងៃជួយជំរុញថាមពលដល់ខួរក្បាល កាត់បន្ថយអត្រាប្រឈមជំងឺគាំងបេះដូង និងជំងឺដាច់សរសៃឈាមក្នុងខួរក្បាលបានច្រើនជាង១/៣ ។
យ៉ាងណាក៏ដោយ យោងលទ្ធផលរបស់ក្រុមស្រាវជ្រាវសាកលវិទ្យាល័យវិទ្យាសាស្ត្រនិងបច្ចេកវិទ្យា Huazhong ក្នុងប្រទេសចិនលើបុរសស្ត្រី អាយុ៤៥ឆ្នាំឡើងប្រមាណ២ម៉ឺន៧ពាន់៩រយនាក់បង្ហាញថា កម្រិតគ្លុយកូសរបស់គេបានកើនឡើងខ្ពស់ក្នុងចំណោមអ្នកដេកថ្ងៃក្រោយបាយថ្ងៃត្រង់រួច ។ អំឡុងការពិសោធ ក្រុមអ្នកស្រាវជ្រាវបានពិនិត្យសុខភាពអ្នកចូលរួមដោយអនុវត្តការធ្វើតេស្តមានឈ្មោះថា Impaired Fasting Glucose ។
សរសេរនៅក្នុងរបាយការណ៍រកឃើញរបស់ខ្លួន ក្រុមអ្នកស្រាវជ្រាវបានបញ្ជាក់ថា ការដេករយៈពេលខ្លីសម្រាប់មនុស្សចាស់អាចផ្តល់អត្ថប្រយោជន៍ក្នុងការបំពេញមុខងារក្នុងពេលថ្ងៃក៏ដូចជាសុខភាពផ្លូវចិត្ត ។ ប៉ុន្តែមានភស្តុតាងដែលបង្ហាញថា វាអាចក្លាយជាកត្តាប្រឈមសំខាន់មួយនៃសេចក្តីស្លាប់ ៕
ចែករំលែកព័តមាននេះ