រាជធានីភ្នំពេញ ៖ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានសព្វព្រះរាជហឫទ័យយាងទតការសម្តែងរបាំបាឡេក្នុង «មហោស្រពកូរ៉េក្នុងប្រទេសអាស៊ី
រាជធានីភ្នំពេញ ៖ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានសព្វព្រះរាជហឫទ័យយាងទតការសម្តែងរបាំបាឡេក្នុង «មហោស្រពកូរ៉េក្នុងប្រទេសអាស៊ី រាត្រីសមោសររបាំបាឡេកូរ៉េ»ដែលរៀបចំដោយស្ថានទូតនៃសាធារណរដ្ឋកូរ៉េប្រចាំនៅកម្ពុជា ។
កម្មវិធីនេះរៀបចំធ្វើឡើងកាលពីរាត្រីថ្ងៃទី១៩ ខែឧសភា ឆ្នាំ២០១៦ នៅសាលសន្និសីទចតុម្មុខ ក្រោមការចូលរួមពីមន្ត្រីថ្នាក់ដឹកនាំ មន្ត្រីស្ថានទូត ភ្ញៀវជាតិ និងអន្តរជាតិជាច្រើនរូប ។
មន្ត្រីស្ថានទូតសាធារណរដ្ឋកូរ៉េប្រចាំនៅកម្ពុជា ឱ្យដឹងថា របាំបាឡេជាតិរបស់កូរ៉េបង្កើតឡើងក្នុងឆ្នាំ១៩៦២ដែលជាក្រុមហ៊ុនរបាំបាឡេវិជ្ជាជីវៈលើកដំបូងនៅប្រទេសកូរ៉េ។
បច្ចុប្បន្នវាគឺជាក្រុមរាំដ៏អស្ចារ្យ និងគ្រប់ជំនាញមានក្រុមរាំសរុបចំនួន៩០នាក់ដែលមានសមត្ថភាពក្នុងការសម្តែងល្ខោនឆ្លាស់គ្នាយ៉ាងធំទូលាយ ។ ក្រុមនេះបានចេញសម្តែងជាង១០០ដងប្រចាំឆ្នាំ ហើយជាមួយនឹងការបើកដំណើរការសាលាបណ្តុះបណ្តាលរបាំបាឡេផ្ទាល់ខ្លួនសម្រាប់កុមារ និងមនុស្សពេញវ័យ ។
បើកឆាកសម្តែងដោយការសម្តែង យឺតៗរបស់ក្រុមរបាំបាឡេរៀបរាប់អំពីរឿង«បឹងហង្ស»ដែលសម្តែងដោយសិល្បករ Han Narea និង Kim Kiwan ជាមួយនឹងក្រុមរបាំបាឡេជាច្រើននាក់ផ្សេងទៀតដែលរាំយ៉ាងល្វតល្វន់គួរជាទីទាក់ទាញ ។ បន្ទាប់មកគឺការបង្ហាញពីក្បាច់រាំ«ឆ្មាំចម្បាំង» «ព្រះអង្គម្ចាស់ Hodong» របាំ «ចោរសមុទ្រ» របាំ «Spauacus» ការរាំរបស់សិល្បករបីនាក់ក្រោមចំណងជើង «តើអ្នកធំដូចខ្ញុំទេ» របាំ «ខាងក្នុងសាច់ភ្លេង» របាំតុងហ្គោ ការរាំវាយស្គរ «La Bayadere» និងចុងក្រោយគឺការសម្តែងរបាំបាឡេ «Don Quixote» ។
ចុងបញ្ចប់នៃកម្មវិធីព្រះករុណាព្រះបាទសម្តេចព្រះបរមនាថ នរោត្តម សីហមុនី សព្វព្រះរាជហឫទ័យប្រគល់ជូននូវកន្ត្រកផ្កា និងផ្តិលប្រាក់ដល់មន្ត្រីស្ថានទូតនៃសាធារណរដ្ឋកូរ៉េប្រចាំនៅកម្ពុជា ។
មហោស្រពកូរ៉េគឺជាកម្មវិធីវប្បធម៌ដ៏ទូលំទូលាយដែលរៀបចំដោយមូលនិធិកូរ៉េបង្ហាញពីសកម្មភាព ផ្សេងៗគ្នាច្រើនបែប ច្រើនយ៉ាងដើម្បីជួយឲ្យអ្នកទស្សនានៅជុំវិញពិភពលោកបានស្គាល់កាន់តែច្បាស់ពីវប្បធម៌និងសិល្បៈកូរ៉េ ។
សម្រាប់ឆ្នាំ២០១៦មហោស្រពនេះបានបង្ហាញនៅអាស៊ីបូព៌ា ជាប្រទេសពោរពេញដោយភាសា វប្បធម៌ សាសនា ទំនៀមទម្លាប់ចម្រុះសព្វបែបយ៉ាង ។
ជាមួយគ្នានេះមូលនិធិកូរ៉េបានខិតខំប្រឹងប្រែងដើម្បីបង្ហាញពីវប្បធម៌កូរ៉េ នៅកម្ពុជា និងបង្កើតការយល់ដឹងឲ្យកាន់តែទូលំទូលាយពីវប្បធម៌កម្ពុជានៅក្នុងប្រទេសកូរ៉េ ។
ប៉ុន្មានឆ្នាំកន្លងមកនេះមូលនិធិនេះបានរៀបចំព្រឹត្តិការណ៍ជាច្រើនដើម្បីបង្ហាញពីតន្ត្រី និងរបាំបុរាណកូរ៉េទៅទស្សនិកជននៅកម្ពុជា រួមជាមួយនឹងការបង្ហាញពីមហោស្រពម្ហូបកូរ៉េជាដើម ៕
ចែករំលែកព័តមាននេះ