តាមអ្នកវិទ្យាសាស្ត្របានរកឃើញថា ពពួកបន្លែដែលចេញផ្កាដូចជាស្ពៃខាត់ណាខៀវទទួលបានការចាប់អារម្មណ៍យ៉ាងខ្លាំងព្រោះវាផ្ទុកទៅដោយសមាធាតុគីមីកើតពីធម្មជាតិដែលហៅថា glucosinolates ក្នុងកម្រិតមួយយ៉ាងខ្ពស់ ។ តាមការសិក្សាទាំងឡាយសុទ្ធតែបានលើកឡើងថា សមាធាតុគីមីកើតពីធម្មជាតិ glucosinolates អាចកាត់បន្ថយអត្រាគ្រោះថ្នាក់ដោយជំងឺមហារីកក្រពេញប្រូស្តាត មហារីកដោះ មហារីកសួត និងមហារីកពោះវៀន ។
តាមការពិសោធរបស់ក្រុមអ្នកស្រាវជ្រាវសាកលវិទ្យាល័យ Oregon State University បានរកឃើញថា នៅពេលដែលត្រូវបានទទួលទានក្នុងនាមជាអាហារដែលចម្អិន១ត្រឡប់ឬក៏នៅឆៅ អង់ហ្ស៊ីមនៅក្នុងផ្កាខាត់ណាខៀវបានជួយបំបែក glucosinolates ទៅជាសមាសធាតុពីយ៉ាងប្រកបដោយតម្លៃសុខភាពគឺសមាសធាតុឈ្មោះ sulforaphane និង erucin ។
ក្រុមអ្នកស្រាវជ្រាវបានចង្អុលបង្ហាញថា sulforaphane អាចជួយជាពិសេសលើការបន្សាបជាតិពុលនៃសារធាតុដែលបង្កឲ្យទៅជាជំងឺមហារីក ហើយក៏អាចជួយធ្វើឲ្យហ្សែនទប់ទល់មហារីកមានសកម្មភាពឡើងអាចប្រតិបត្តិតាមមុខងារពិតប្រាកដរបស់វាបាន ។
យោងតាមលោកស្រីសាស្ត្រាចារ្យ Emily Ho បានឲ្យដឹងថា បន្លែគួរតែចម្អិនក្នុងរយៈពេលតែ២ទៅ៣នាទីបានហើយ ឬក៏គ្រាន់តែចំហុយឲ្យវាផុយបន្តិច។ ធ្វើយ៉ាងនេះទើបអាចរក្សាបានអង់ហ្ស៊ីមដ៏ចាំបាច់របស់វា ។ ប៉ុន្តែលោកស្រីបញ្ជាក់ថា ផលិតផលសុខភាពពីធម្មជាតិមានដូចជាវីតាមីន D និងប្រេងអូមេហ្គា3 វាមានការពិបាកក្នុងការស្រូបយកតាមរយៈរបបអាហារតែមួយមុខនោះ ៕
ចែករំលែកព័តមាននេះ