រាជធានីភ្នំពេញ ៖ របាយការណ៍ស្តីពីជំងឺរបេងឆ្នាំ២០១០របស់ក្រសួងសុខាភិបាលបានឱ្យដឹងថា កម្ពុជាគឺជាប្រទេសមួយដែលស្ថិតនៅក្នុងចំណោមប្រទេសចំនួន២២ដែលមានជំងឺរបេងធ្ងន់ធ្ងរក្នុងពិភពលោក។ ចំនួនករណីរបេងបានកើនដល់៤១.៦២៨នាក់ ក្នុងឆ្នាំ២០១០ ហើយជំងឺរបេង អេដស៍ក៏នៅតែជាកង្វល់ដ៏ធំធេងសំរាប់ប្រទេសកម្ពុជា។ ទិសដៅជារួមរបស់កម្មវិធីជាតិសំរាប់ឆ្នាំ២០១១-២០១៥ គឺធានានូវសមធម៌ និងការទទួលយកបាននូវសេវារបេងជាសាកលប្រកបដោយគុណភាពរក្សាអត្រាជាសះស្បើយជំងឺរបេងសួតវិជ្ជមានបេកាឱ្យលើសពី៨៥ភាគរយ និងកាត់បន្ថយពាក់កណ្តាលនូវអត្រាប្រេវ៉ាឡង់ និងស្លាប់ដោយសារជំងឺរបេងគ្រប់សណ្ឋានទាំងអស់ដើម្បីចូលរួមចំណែកក្នុងការសំរេចគោលដៅអភិវឌ្ឍន៍សហស្សវត្សនៅឆ្នាំ២០១៥។
របាយការណ៍នោះត្រូវបានគេផ្សព្វផ្សាយនៅក្នុងសន្និបាតស្តីពីការងារកំចាត់រោគរបេងប្រចាំឆ្នាំលើកទី១៦ដែលធ្វើឡើងនៅមជ្ឈមណ្ឌលវប្បធម៌ភ្នំពេញកាលពីថ្ងៃទី១៧ និង១៨ មីនា ក្រោមអធិបតីភាពលោកសាស្ត្រាចារ្យអេង ហួត រដ្ឋលេខាធិការក្រសួងសុខាភិបាល។
លោកអេង ហួត បានថ្លែងថា ឆ្នាំ២០១០ កម្មវិធីជាតិកំចាត់រោគរបេងសំរេចបាននូវសមិទ្ធផលថ្មីៗ គួរឱ្យកត់សំគាល់ថែមទៀតដែលមានជាអាទិ៍ ការរក្សាបាននូវអត្រាជាសះស្បើយលើសពី៨៥% អត្រាស្រាវជ្រាវករណីជំងឺរបេងសួតវិជ្ជមានបេកាបាន៦៦% អត្រាគ្របដណ្តប់សេវាដូតស៍១០០%នៅថ្នាក់មណ្ឌលសុខភាព និងពង្រីកដូតស៍សហគមន៍បានដល់៨៧%នៅចុងឆ្នាំ២០១០ ។ ជាលទ្ធផលនាំឱ្យអត្រាឈឺ និងអត្រាស្លាប់ដោយសារជំងឺរបេងមានការចុះថយយ៉ាងខ្លាំងគួរឱ្យកត់សំគាល់។
ទន្ទឹមនឹងសមិទ្ធផលដែលទទួលបានគួរជាទីមោទនៈនេះក៏នៅមានការលំបាកមួយចំនួនដែលកម្មវិធីជាតិត្រូវពុះពារដើម្បីមានលទ្ធភាពសំរេចបានទិសដៅឆ្នាំ២០១០ និងឆ្នាំបន្តក៏ដូចជាតម្រង់ទិសសំដៅសំរេចបានគោលដៅអភិវឌ្ឍន៍សហស្សវត្សនៅដំណាច់ឆ្នាំ២០១៥។ ការលំបាកទាំងនោះមានជាអាទិ៍ ការដែលអត្រាប្រេវ៉ាឡង់ និងអាំងស៊ីដង់នៃជំងឺរបេងនៅខ្ពស់នៅឡើយ ធនធានដើម្បីធានាដំណើរការនៃសេវាដូតស៍ដែលមានស្រាប់ដ៏ច្រើនកន្លែង បញ្ហាធានាគុណភាព ធនធានដើម្បីពង្រីកអន្តរាគមន៍ថ្មីៗ ដូចជាការព្យាបាលករណីជំងឺរបេងស៊ាំនឹងថ្នាំ ការថែទាំព្យាបាលជំងឺរបេងកុមារ ការពង្រឹងការងារមន្ទីរពិសោធន៍ ព្រមទាំងការកសាងសមត្ថភាព និងការលើកទឹកចិត្តបុគ្គលិកជាដើម។ ដើម្បីសំរេចបានទិសដៅនេះចាំបាច់យើងទាំងអស់គ្នាត្រូវសហការជំនះដោះស្រាយឱ្យបានដើម្បីឆ្លើយតបទៅនឹងទំហំដ៏ធំនៃតម្រូវការរបស់ប្រជារាស្ត្រពាក់ព័ន្ធនឹងការប្រយុទ្ធនឹងជំងឺរបេង។
លោកអេង ហួត ផ្តាំដល់មន្ត្រីសុខាភិបាលទាំងអស់ពេលត្រឡប់ទៅកាន់មូលដ្ឋានរៀងៗខ្លួនវិញនាំគ្នាបំពេញការខ្វះខាតដែលនៅសេសសល់ និងបន្តជំរុញការងារថ្មីឆ្នាំ២០១១ និងបណ្តាឆ្នាំខាងមុខឱ្យកាន់តែមានប្រសិទ្ធភាព និងទទួលបានជោគជ័យជាបន្តបន្ទាប់ថែមទៀត។
លោករដ្ឋលេខាធិការលើកឡើងថា សំរាប់ឆ្នាំ២០១១ចូរខិតខំធ្វើយ៉ាងណារក្សាឱ្យបាននូវអត្រាជាសះស្បើយលើសពី៨៥% និងពិសេសសំរេចការស្រាវជ្រាវករណីជំងឺរបេងគ្រប់សណ្ឋានឱ្យបានយ៉ាងតិច៤០.០០០ករណីស្របតាមទិសដៅថ្មីរបស់កម្មវិធីជាតិ និងអន្តរជាតិ ពោលគឺការទទួលបានសេវាជំងឺរបេងជាសកល។ ការងារនេះទាមទារឱ្យមានការចូលរួមយ៉ាងជិតស្និទ្ធបន្ថែមទៀតពីអាជ្ញាធរ និងសហគមន៍មូលដ្ឋាន ស្ថាប័នសុខាភិបាលពាក់ព័ន្ធផ្សេងទៀត ព្រមទាំងស្ថាប័នមិនមែនសុខាភិបាលផ្សេងទៀតផងដែរ។ ត្រូវជំរុញកសម្មភាពចលនាកៀងគរធនធានបន្ថែមឱ្យបានខ្លាំងក្លាដើម្បីអនុវត្តផែនការយុទ្ធសាស្ត្រប្រយុទ្ធនឹងជំងឺរបេងឆ្នាំ២០១១-២០១៥ឱ្យបានជោគជ័យ ៕
ចែករំលែកព័តមាននេះ