រាជធានីភ្នំពេញ ៖ មានការភ្ញាក់ផ្អើលមិនតិចទេ បន្ទាប់ពីគណៈកម្មាធិការអូឡាំពិកអន្តរជាតិបានសម្រេចចុងក្រោយឱ្យកីឡាការិនី ចូវ សុធារ៉ា មកពីផ្នែកចំបាប់បានទៅចូលរួមក្នុងព្រឹត្តិការណ៍នេះថែមមួយទៀតនៅក្នុងប្រទេសប្រេស៊ីល ទោះបីនាងចេញទៅប្រកួតជម្រុះហើយមិនទទួលជោគជ័យ ។ លទ្ធផលផ្លូវការក៏ជួយឱ្យកម្ពុជាមានបេក្ខភាពដល់ទៅ៦រូបនៅក្នុងព្រឹត្តិការណ៍អូឡាំពិកជាប្រវត្តិសាស្ត្រលើកដំបូងផងដែរ ។
ក្រោយការប្រកួតធ្លាក់របស់កីឡាការិនី ចូវ សុធារ៉ា និងលោក ងួន មករា លើវិញ្ញាសាចំបាប់ មន្ត្រីជាន់ខ្ពស់របស់គណៈកមា្មធិការជាតិអូឡាំពិកកម្ពុជាបានអះអាងថា កម្ពុជានៅតែរក្សាបេក្ខភាព៥រូបដដែលទេដោយសារតែ៤រូបទទួលបានដោយសិទ្ធិអនុគ្រោះក្នុងនាមជាសមាជិក និងម្នាក់ទៀតគឺ ស៊ន សៀវម៉ី ទទួលបានសិទ្ធិដោយស្វ័យប្រវត្តិតំណាងទ្វីបអាស៊ី។ ប៉ុន្តែក្រោយការប្រកាសតែប៉ុន្មានថ្ងៃប៉ុណ្ណោះ មន្ត្រីគណៈកមា្មធិការអូឡាំពិកអន្តរជាតិ បានសម្រេចផ្ដល់សិទ្ធិដល់កីឡាការិនី ចូវ សុធារ៉ា ថែមម្នាក់ទៀតឱ្យចេញទៅប្រកួតនៅអូឡាំពិកក្នុងប្រទេសប្រេស៊ីលនាខែសីហាខាងមុខនេះ។ ហេតុផលដែលនាំឱ្យមានការសម្រេចនោះ គឺបន្ទាប់ពីកត់សម្គាល់ឃើញថា ចូវ សុធារ៉ា ថ្វីដ្បិតថាមិនបានប្រកួតជម្រុះឈ្នះ ប៉ុន្តែថ្វីដៃរបស់នាងគឺត្រូវបានទទួលស្គាល់ដោយគណៈកម្មាធិការអូឡាំពិកអន្តរជាតិ និងចង់ឱ្យកម្ពុជាបានសាកល្បងចេញទៅប្រកួតលើវិញ្ញាសាចំបាប់នៅក្នុងព្រឹត្តិការណ៍នោះផង ទើបសិទ្ធិអនុគ្រោះមួយថ្មីត្រូវបានសម្រេចឡើងធ្វើឱ្យមន្ត្រីកម្ពុជាភ្ញាក់ផ្អើល ។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាបានអះអាងថានេះជាប្រវត្តិសាស្ត្រលើកដំបូងដែលកម្ពុជាមានកីឡាករកីឡាការិនីរហូតដល់៦នាក់នៅក្នុងព្រឹត្តិការណ៍អូឡាំពិក ។ លោកថា កន្លងមកស្ថាប័នកីឡាអន្តរជាតិដ៏ធំមួយនេះ ផ្ដល់សិទ្ធិអនុគ្រោះឱ្យតែបេក្ខភាពមកពីកីឡាហែលទឹក២រូប និងមកពីកីឡារត់ប្រណាំង២រូបប៉ុណ្ណោះ។ ប៉ុន្តែអាចមកពី ស៊ន សៀវម៉ី ដណ្ដើមបានសិទ្ធិចេញប្រកួតលើកដំបូង ហើយបណ្ដាលមកពីគេកត់សម្គាល់ឃើញ ចូវ សុធារ៉ា ក៏ប្រឹងអស់ពីសមត្ថភាពក្នុងការប្រកួតជម្រុះដណ្ដើមសិទ្ធិមុននោះ ទើបនាំឱ្យមានការផ្ដល់សិទ្ធិអនុគ្រោះបន្ថែមឱ្យនាងម្នាក់ទៀត ។ លោកថា លទ្ធផលចុងក្រោយគឺកម្ពុជាមានបេក្ខភាព៦រូបទៅកាន់ព្រឹត្តិការណ៍អូឡាំពិកនៅប្រេស៊ីលក្នុងឆ្នាំ២០១៦នេះ ដោយរួមមានកីឡាការិនីតេក្វាន់ដូ ស៊ន សៀវម៉ី, កីឡាការិនីចំបាប់ ចូវ សុធារ៉ា, កីឡាការិនីហែលទឹក ហែមថុន វិទិនី, កីឡាករ ពូ សុវិជ្ជា ផ្នែកហែលទឹក, កីឡាការិនីអត្តពលកម្មផ្នែកម៉ារ៉ាតុន លី ណារី និងកីឡាករជនជាតិជប៉ុនសញ្ជាតិខ្មែរ លោក NEKO ផ្នែករត់ប្រណាំដូចគ្នា។ លោក វ៉ាត់ ចំរើន បញ្ជាក់ថា កីឡាករ-កីឡាការិនីទាំង៦នាក់សុទ្ធតែត្រូវបានបញ្ជូនឱ្យទៅហ្វឹកហាត់ជាមួយគ្រូជំនាញនៅបរទេសរៀងខ្លួន ដើម្បីត្រៀមដណ្ដើមមេដាយលើវិញ្ញាសាទាំង៤នៅក្នុងព្រឹត្តិការណ៍អូឡាំពិក៕
ចែករំលែកព័តមាននេះ