រាជធានីភ្នំពេញ ៖ លោកឧកញ៉ា លឹម ហុងឈាង ជាវិនិយោគិនមួយរូបក្នុងចំណោមវិនិយោគិនដទៃទៀតដែលបានកៀរគរឱ្យមានការវិនិយោគនៅតាមច្រកព្រំដែន ជាពិសេស វិនិយោគលើវិស័យដីធ្លីនៅតំបន់ច្រកទ្វារព្រំដែនត្រពាំងផ្លុង ប៉ុន្តែក្នុងជំហានដំបូងត្រូវធ្វើយ៉ាងណា ឱ្យតំបន់នោះក្លាយទៅជាតំបន់ដែលមានការចាប់អារម្មណ៍ពីសំណាក់ប្រជាពលរដ្ឋ ។
តាមប្រភពមួយឱ្យដឹងថា បច្ចុប្បន្ននេះ លោកឧកញ៉ាបានបង្កើតផ្សារនៅច្រកព្រំដែនត្រពាំងផ្លុង ហើយផ្សារនោះលក់ទំនិញយកតែថ្លៃដើមប៉ុណ្ណោះ គឺមិនយកប្រាក់ចំណេញទេ ហើយបើមានបុគ្គលិកណានៅក្នុងផ្សារ លក់លើសពីតម្លៃដែលបានកំណត់ នឹងត្រូវទទួលពិន័យពីលោកផ្ទាល់ផងដែរ ឬក៏អាចបញ្ឈប់ពីការងារតែម្ដង ។ នេះជាយុទ្ធសាស្ត្រមួយដើម្បីស្រូបយកប្រជាពលរដ្ឋទៅរស់នៅទីនោះឱ្យកាន់តែច្រើនឡើង ។
លោកឧកញ៉ា លឹម ហុងឈាង អគ្គនាយកក្រុមហ៊ុនលឹម ហុងឈាង អីុមផតអិុចផត បានមានប្រសាសន៍ថា ៖ « ការរកស៊ីនៅតាមតំបន់ព្រំដែន ប្រៀបបាននឹងឧបករណ៍នេសាទម្យ៉ាងឈ្មោះថា «លប» ដែលមានប្រឹសពីរអីចឹងដែរ មានន័យថា រាល់ទំនិញចេញចូលឆ្លងប្រទេស គឺត្រូវឆ្លងកាត់ច្រកព្រំដែនទាំងអស់។ ម្យ៉ាងទៀត ព្រំដែនកម្ពុជាយើងមានប្រវែងប្រមាណជាង២ពាន់គីឡូម៉ែត្រ ក្នុងនោះមានច្រកព្រំដែនទ្វារ ព្រំដែនអន្តរជាតិ ច្រកទ្វារតំបន់ និងច្រកទ្វារទ្វេភាគី តែមិនមានច្រើននោះទេ » ។
ទាក់ទងនឹងគម្រោងប្រកាសលក់ដីឡូត៍នៅតំបន់ច្រកព្រំដែនត្រពាំងផ្លុងរបស់លោក លឹម ហុងឈាង ត្រូវបានវាយតម្លៃដោយក្រុមហ៊ុនវាយតម្លៃអចលនទ្រព្យចំនួន៩ ដើម្បីឱ្យប្រាកដក្នុងតម្លៃដ៏ត្រឹមត្រូវ ។ លោកឧកញ៉ាមានប្រសាសន៍ថា ៖ « តម្លៃដែលយើងបានដាក់លក់ គឺជាតម្លៃអប្បបរមា ហើយធាតុពិតចំពោះតម្លៃដីធ្លីថ្លៃឬមិនថ្លៃនោះ គឺវាអាស្រ័យទៅលើហេដ្ឋារចនាសម្ព័ន្ធនៃតំបន់នោះមានអ្វីខ្លះ ដូចជាផ្លូវធំទូលាយ ជាដើម ព្រោះថា នៅតាមព្រំដែន ការធ្វើពាណិជ្ជកម្មមិនមែនសម្រាប់តែក្នុងប្រទេសនោះទេ តែវាជាការធ្វើពាណិជ្ជកម្មជាលក្ខណៈអន្តរជាតិ » ។
លោកឧកញ៉ាបន្ថែមថា ៖ « សព្វថ្ងៃនេះ ដីឡូត៍នៅតំបន់ច្រកទ្វារត្រពាំងផ្លុង មានអ្នកវិនិយោគចាប់អារម្មណ៍ទៅដាក់ទុនបណ្ដើរៗហើយ ហើយនឹងមានការអភិវឌ្ឍជាជំហានៗតាមការវិនិយោគរបស់អតិថិជនផ្ទាល់ ។ យើងចង់មានការវិនិយោគភ្លាមៗ ក្នុងករណីវិនិយោគិនទិញដីហើយចង់សាងសង់ ឬធ្វើអ្វីមួយភ្លាម តែយើងមិនអាចទៅបង្ខំពួកគាត់បានទេ គឺត្រូវទុកពេលឱ្យពួកគាត់ធ្វើអ្វីទៅតាមជំហានៗរបស់ពួកគាត់ ។ តែបើតាមយុទ្ធសាស្ត្ររបស់យើង វានឹងទៅជាលំដាប់ ដោយរំពឹងថា ទីតាំងដែលយើងកំពុងអភិវឌ្ឍន៍នោះនឹងក្លាយជាទីតាំងល្អ ជាច្រកទ្វារព្រំដែន ដែលនឹងជាប់លេខ៣ បន្ទាប់ពីប៉ោយប៉ែត និងច្រកទ្វារព្រំដែនបាវិត » ។
លោក ស៊ា ឆៃលីន អគ្គនាយកក្រុមហ៊ុនអចលនទ្រព្យឆៃលីនស៊ា រៀលធី បានថ្លែងថា ៖ « បើនិយាយអំពីសក្ដានុពលនៃតំបន់នោះ វាជាតំបន់ដែលត្រូវដឹកទំនិញចេញចូល និងការធ្វើចរាចរផ្នែកទេសចរណ៍ផងដែរ បន្ទាប់ពីសមាហរណកម្មអាស៊ានចាប់ផ្ដើមកាលពីចុងឆ្នាំ២០១៥ កន្លងមក » ។
លោកអគ្គនាយកក្រុមហ៊ុនបន្តថា ៖ « កន្លងមក បើតាមទស្សនៈយល់ឃើញរបស់ប្រជាពលរដ្ឋ និងអ្នកវិនិយោគមួយចំនួន គឺមិនដែលចាប់អារម្មណ៍ទៅលើតំបន់ខ្សែបន្ទាត់ព្រំដែននោះទេ ។ ប៉ុន្តែសម្រាប់លោកឧកញ៉ា លឹម ហុងឈាង គឺមានទស្សនៈប្លែកពីគេ ដោយគិតថា តំបន់ព្រំដែនអាចធ្វើឱ្យអ្នករស់នៅក្នុងតំបន់នោះ ក៏ដូចជាអ្នករកស៊ីផ្សេងទៀតអាចស្រូបយកផលប្រយោជន៍បានច្រើន ។ តែទោះជាយ៉ាងណា ដើម្បីឱ្យតំបន់នោះក្លាយជាតំបន់មានប្រយោជន៍ ចាំបាច់ត្រូវតែធ្វើសកម្មភាពអ្វីមួយ ហើយជាក់ស្ដែង គម្រោងព្រំដែនត្រពាំងផ្លុងបានធ្វើសកម្មភាពទាក់ទាញរួចជាស្រេចហើយ » ។
លោកអគ្គនាយកក្រុមហ៊ុនបញ្ជាក់ថា ៖ « សព្វថ្ងៃនេះ តំបន់ច្រកព្រំដែនត្រពាំងផ្លុងមានសកម្មភាពអាជីវកម្មមួយចំនួនរួចទៅហើយដូចជា មានផ្សារ កាស៊ីណូ សណ្ឋាគារ និងសេវាកម្មមួយចំនួនទៀត ។ នៅក្នុងព្រឹត្តិការណ៍អាស៊ានដែលកំពុងកើតឡើងនេះ វាក៏ជាកត្តាមួយជួយជំរុញឱ្យសកម្មភាពវិនិយោគក្នុងតំបន់នោះកាន់តែមានភាពរស់រវើកបន្តទៀត » ៕
ចែករំលែកព័តមាននេះ