ខេត្ដត្បូងឃ្មុំ ៖ ស្ត្រីម្នាក់ឈ្មោះ ឈុន គន្ធា អាយុ២៦ឆ្នាំ មានជីវភាពក្រីក្រ រស់នៅភូមិត្រពាំងស្នោ ឃុំមង់រៀវ ស្រុកត្បូងឃ្មុំ បានសម្រាលកូនដំបូង តែជាអកុសលក្រោយពេលឆ្លងទន្លេទើបតែបាន២៨ថ្ងៃក៏ស្លាប់ដោយសារជំងឺ គាំងបេះដូង បន្សល់ទុកកូនឲ្យរស់នៅកណ្តោចកណ្តែងជាមួយជាឪពុកដែលធ្វើការសំណងរក លុយទិញទឹកដោះគោឲ្យកូនបៅ ។
លោក ទួន សំអាត មេភូមិត្រពាំងស្នោ និយាយថា នាងគន្ធាបានរៀបការជាមួយនឹងឈ្មោះ ស៊ាង សុវណ្ណ អាយុ៣១ឆ្នាំ កាលពីឆ្នាំ២០១៥ ដោយប្តីប្រកបរបរធ្វើជាងសំណង់ រកថវិកាមកផ្គត់ផ្គង់ក្រុមគ្រួសារបាន១ថ្ងៃរស់១ថ្ងៃ គឺរស់នៅជាមួយនឹងឪពុកម្តាយតែប៉ុណ្ណោះ ។
លោកមេភូមិត្រពាំង ស្នោបន្តថា នាងគន្ធាមានជំងឺបេះដូង ហើយការស្លាប់របស់នាងពិតជាគួរឲ្យសង្វេគណាស់ ។ ក្នុងពេលមានផ្ទៃពោះគ្រប់ខែ នាងបានទៅឆ្លងទន្លេនៅមន្ទីរពេទ្យខេត្តកំពង់ចាម ហើយគ្រូពេទ្យបានធ្វើការវះកាត់ប្រសូតបានទារកមួយ ។ ក្រោយពេលចេញពីពេទ្យត្រឡប់ទៅផ្ទះវិញ នាងចេះថប់ដង្ហើម គ្រូពេទ្យក៏ប្រាប់ឲ្យទៅមន្ទីរពេទ្យម្តងទៀតដើម្បីព្យាបាលជំងឺ បេះដូង តែដោយសារក្រីក្រគ្មានលុយក៏មិនបានទៅមន្ទីរពេទ្យទេ លុះនៅវេលាម៉ោង១២និង៣០នាទីយប់ថ្ងៃទី២២ ខែមេសា ក៏បានស្លាប់ចោលកូនដែលទើបតែមានអាយុ២៨ថ្ងៃ ។
លោកមេ ភូមិរៀបរាប់ទៀតថា ដោយមើលឃើញភាពគួរឲ្យសង្វេគនេះ រូបលោកបានសរសេរលិខិតមួយបញ្ជូនទៅលោក កេង ប៊ុណ្ណា អភិបាលស្រុកត្បូងឃ្មុំ ដើម្បីសុំកិច្ចអន្តរាគមន៍ជួយដល់គ្រួសារខាងលើ ។ លុះនៅថ្ងៃទី១៣ ខែឧសភា កន្លងទៅថ្មីៗនេះ លោកអភិបាលស្រុក បាននាំយកទឹកប្រាក់ចំនួន២០០ដុល្លារឧបត្ថម្ភដល់ឪពុករបស់ទារក សម្រាប់ទិញទឹកដោះគោឲ្យកូនបៅ ។ ជាមួយនេះ លោកអភិបាលស្រុក បានណែដល់ឪពុករបស់ទារក ត្រូវតែប្រឹងប្រែងធ្វើយ៉ាងណាចិញ្ចឹមកកូនឲ្យបានធំធាត់មានសុខភាព ល្អផងដែរ ។
លោកមេភូមិត្រពាំងស្នោ បញ្ជាក់ថា គ្រូពេទ្យបានប្រាប់ឲ្យទៅមើលព្យាបាលជំងឺបេះដូងនៅឯរាជធានីភ្នំពេញ ដែរ តែដោយសារជីវភាពក្រីក្រទើបនាង ឈុន គន្ធា សុខចិត្តសម្ងំនៅផ្ទះរហូតដល់ជំងឺយាយីខ្លាំងស្លាប់ចោលកូននិងប្តី ។ រាល់ថ្ងៃនេះ ឪពុករបស់ទារកបានប្រឹងធ្វើការសំណង់យកប្រាក់មកទិញទឹកដោះគោឲ្យកូន បៅ ហើយការថែទាំត្រូវបានរ៉ាប់រងដោយជីដូន ៕
ចែករំលែកព័តមាននេះ