រាជធានីភ្នំពេញ ៖ មិនរាប់បញ្ចូលការប្រកួតអន្តរជាតិ២គូនៅពេលរាត្រីលើសង្វៀនទូរទស្សន៍អាស៊ីអាគ្នេយ៍ នៅវេលាពេលព្រឹក និងពេលរសៀលថ្ងៃអាទិត្យទី២២ ឧសភា ក៏មានការប្រកួតអន្តរជាតិ៤គូផ្សេងទៀតផងដែរ។
រាជធានីភ្នំពេញ ៖ មិនរាប់បញ្ចូលការប្រកួតអន្តរជាតិ២គូនៅពេលរាត្រីលើសង្វៀនទូរទស្សន៍អាស៊ីអាគ្នេយ៍ នៅវេលាពេលព្រឹក និងពេលរសៀលថ្ងៃអាទិត្យទី២២ ឧសភា ក៏មានការប្រកួតអន្តរជាតិ៤គូផ្សេងទៀតផងដែរ។ ការប្រកួតរបស់ពួកគេ គឺ២គូត្រូវការចាញ់ឈ្នះធម្មតា និង២គូទៀតស្ថិតក្នុងសមាសភាព៨នាក់ត្រូវដណ្ដើមពានអន្តរជាតិ ។
សម្រាប់ព្រឹត្តិការណ៍«Ganzburg Top Fighter» ដែលចាប់ផ្ដើមពីម៉ោង៨ព្រឹក កីឡាករ អាំង សំអាត មកពីក្លិបតាព្រហ្មមានជ័យ ប្រកួតជាមួយកីឡាករថៃឈ្មោះ គៀវ បា និងកីឡាករ ឃីម បូរ៉ា មកពីក្លិបរស្មីភូមិគាបខេត្តបន្ទាយមានជ័យ ប្រកួតជាមួយកីឡាករថៃឈ្មោះ យ៉ត ភិត ។ សំអាងលើប្រវត្តិប្រកួតបាន៧៥លើក ឈ្នះ៦២លើក ចាញ់១២លើក និងស្មើ១លើក កីឡាករ អាំង សំអាត ហាក់មានក្ដីសង្ឃឹមខ្ពស់ក្នុងការយកឈ្នះលើគូប្រកួតជាកីឡាករថៃដែលឆ្លងកាត់ការប្រកួតបានតែ៥១លើក ឈ្នះ៤៣លើក ចាញ់៧លើក និងស្មើ១លើក ។ ទោះបីយ៉ាងណា មន្ត្រីជាអ្នកដឹកនាំកីឡាករថៃឲ្យមកប្រកួតក៏មានជំនឿចិត្តទៅលើកីឡាករថៃ គៀរ បា ដូចគ្នាផងដែរ ដោយអះអាងថា គេប្រកួតបានតិចជាងមែន ប៉ុន្តែសមត្ថភាពគេខ្លាំង ។ មិនខុសគ្នាដែរកីឡាករ ឃីម បូរ៉ា ដែលធ្លាប់ប្រកួតបាន៨៦លើក ឈ្នះ៧២លើក ចាញ់១២លើក និងស្មើ២លើក ក៏មានជំនឿចិត្តថាឈ្នះផងដែរ បើទោះជាកីឡាករថៃជាគូប្រកួតធ្លាប់ប្រកួតបាន៨០លើក ឈ្នះ៦៥លើក និងចាញ់១៥លើក ។ គូនេះមានអ្នកឃ្លាំមើលច្រើន ដោយសារតែកីឡាករថៃក៏ខ្លាំង ហើយកីឡាករកម្ពុជាក៏ល្អមិនធម្មតា ។
សម្រាប់សមាសភាព៤រូបផ្សេងទៀត គឺកីឡាករ ជា សំនៀង មកពីក្លិបកងទ័ពឆត្រយោង៩១១ ត្រូវប្រកួតជាមួយកីឡាករអង់គ្លេស រ៉ៃ អន និងកីឡាករកម្ពុជាឈ្មោះ មឿន សុខហ៊ុច មកពីក្លិបពុទ្ធសេរីវង្សកីឡា ប្រកួតជាមួយកីឡាករថៃឈ្មោះ ផ្លាយ ណយ។ ការប្រកួតរបស់អ្នកទាំង៤មិនគ្រាន់តែជាការប្រកួតចាញ់ឈ្នះដើម្បីស្ទាបស្ទង់សមត្ថភាពនោះទេ ប៉ុន្តែក៏ជាការប្រកួតដណ្ដើមពិន្ទុសម្រាប់បោះជំហានទៅរកការដណ្ដើមចំណាត់ថ្នាក់ជើងឯកផងដែរ ។
អ្នកទាំង៤នឹងប៉ះគ្នានៅក្នុងព្រឹត្តិការណ៍ប្រដាល់ជើងឯកអន្តរជាតិស្រាបៀរកម្ពុជាលើកទី២ចាប់ពីម៉ោង២រសៀលតទៅ បន្ទាប់ពីព្រឹត្តិការណ៍នេះក៏ដំណើរការបានមួយសប្ដាហ៍រួចហើយ ។ កីឡាករជា សំនៀង គឺជាជើងខ្លាំងម្នាក់ក្នុងព្រឹត្តិការណ៍ប្រដាល់នាពេលកន្លងមក ខណៈដែលកីឡាករជាគូប្រកួតក៏មិនមែនជាជើងខ្លាំងដែលគួរឱ្យខ្លាចដូចសមាសភាពមកពីកីឡាករថៃ ។ ឆ្លងកាត់ការប្រកួតបាន៧០លើក ឈ្នះ៥៧លើក ចាញ់១០លើក និងស្មើ៣លើក កីឡាករជា សំនៀង សង្ឃឹមខ្ពស់ដាច់ឆ្ងាយក្នុងពេលដែលកីឡាករអង់គ្លេសទើបតែប្រកួតបាន៣៦លើក ឈ្នះ២២លើក និងចាញ់៩លើក ដែលមានន័យថា មិនមានបទពិសោធន៍ច្រើនណាស់ណា ។ កីឡាករ មឿន សុខហ៊ុច ធ្លាប់ប្រកួតបាន១១៣លើក ឈ្នះ៨៨លើក ចាញ់២១លើក និងស្មើ៤លើក ក្នុងពេលដែលកីឡាករថៃប្រកួតបាន១០០លើក ឈ្នះ៧៩លើក ចាញ់១៧លើក និងស្មើ៤លើក ទើបអ្នកគាំទ្រហាក់មិនមានទំនុកចិត្តលើកីឡាករកម្ពុជាច្រើនពេកទេ បើទោះជាគេខ្លាំងនៅក្នុងពិភពប្រដាល់ក្ដី ៕
ចែករំលែកព័តមាននេះ