រាជធានីភ្នំពេញ ៖ នៅថ្ងៃសុក្រ ទី១៣ ឧសភា ២០១៦ ណាហ្គាវើលបេះដូងសប្បុរស ដែលផ្នែកទទួលបន្ទុកការងារសង្គមរបស់ណាហ្គាវើល បានរៀបចំពិធីអបអរ និងពិសាអាហារជាពិសេសមួយសម្រាប់អ្នកម្តាយជាស្ត្រីមេម៉ាយ
រាជធានីភ្នំពេញ ៖ នៅថ្ងៃសុក្រ ទី១៣ ឧសភា ២០១៦ ណាហ្គាវើលបេះដូងសប្បុរស ដែលផ្នែកទទួលបន្ទុកការងារសង្គមរបស់ណាហ្គាវើល បានរៀបចំពិធីអបអរ និងពិសាអាហារជាពិសេសមួយសម្រាប់អ្នកម្តាយជាស្ត្រីមេម៉ាយដែលមានជីវភាពក្រលំបាកចំនួន២០០នាក់ ដែលក្នុងចំណោមពួកគាត់មានខ្លះជាអ្នកផ្ទុកមេរោគអេដស៍ផងដែរ។ លោក James Ma នាយកផ្នែកទំនាក់ទំនងបុគ្គលិក និងការងារសង្គមរបស់ណាហ្កាវើល បានមានប្រសាសន៍ថា ពិធីដែលរៀបចំឡើងដោយចេញពីដួងចិត្តនេះ ត្រូវបានប្រារព្ធធ្វើឡើងនៅក្នុងសប្តាហ៍នៃទិវាបុណ្យម្តាយ គឺដើម្បីរំឭកដល់គុណ និងការលះបង់របស់អ្នកម្តាយ ដើម្បីសេចក្តីសុខរបស់យើង។
ពិធីនាពេលព្រឹកនោះ បានចាប់ផ្តើមដោយមានការសម្តែងរបាំជូនពរជូនដល់ភ្ញៀវកិត្តិយសទាំងអស់ ដែលរួមមានដូចជាលោកស្រី លី រ៉ូហ្សាមី អភិបាលរងខណ្ឌឫស្សីកែវ និងមន្ត្រីតំណាងរដ្ឋាភិបាលជាច្រើនរូបទៀត លោកស្រី កុយ ផល្លាន្នី នាយិកាប្រតិបត្តិអង្គការខេមរា ដែលជាអង្គការមិនមែនរដ្ឋាភិបាលមួយដែលបានផ្តល់កិត្តិយសចូលរួមជាមួយនឹងវត្តមានរបស់អ្នកម្តាយទាំងចាស់ ទាំងក្មេងចំនួន២០០នាក់ ដែលមកពីអង្គការខេមរា។
ណាហ្គាវើល សម្តែងនូវការកោតសរសើរចំពោះការលះបង់របស់អ្នកម្តាយគ្រប់រូបថ្លែងក្នុងសុន្ទរកថាស្វាគមន៍លោក James Ma បានមានប្រសាសន៍ថា «យើងសូមគោរពកោតសរសើរដល់អ្នកម្តាយដែលជាស្ត្រីមេម៉ាយទាំងអស់ ហើយមានមោទភាពចំពោះពួកគាត់ដែលបានចិញ្ចឹមបីបាច់ថែរក្សាបុត្រធីតារបស់ពួកគាត់ បើទោះជាពួកគាត់ជួបប្រទះនឹងឧបសគ្គការលំបាកយ៉ាងណាក៏ដោយ ពេលខ្លះពួកគាត់ថែមទាំងមានសុខភាពទ្រុឌទ្រោមថែមទៀតផង។ អ្វីដែលយើងធ្វើនៅថ្ងៃនេះ គឺជាការទទួលស្គាល់ស្ត្រីដ៏សំខាន់ទាំងនេះ និងកោតសរសើរចំពោះការប្រឹងប្រែងរបស់ពួកគាត់ក្នុងការចិញ្ចឹមបីបាច់ថែរក្សាគ្រួសាររបស់ពួកគាត់ មិនត្រឹមតែប៉ុណ្ណោះថែមទាំងជាការជួយដល់ប្រទេសកម្ពុជាឲ្យកាន់តែរីកចម្រើនទៀតផង។ យើងសង្ឃឹមថា អំណោយទាំងនេះ នឹងជាការជួយលើកទឹកចិត្តអ្នកម្តាយ ក៏ដូចជាកូនៗ និងជួយសម្រាលការលំបាករបស់ពួកគាត់បានមួយកម្រិត»។
ចាប់តាំងពីបង្កើតឡើងក្នុងឆ្នាំ១៩៩១ មក អង្គការខេមរា បានដើរតួនាទីយ៉ាងសំខាន់ក្នុងការជួយអភិវឌ្ឍស្ត្រី និងកុមារក្នុងប្រទេសកម្ពុជា ដោយធ្វើការងារដោយផ្ទាល់ជាមួយសហគមន៍នៅក្នុងមូលដ្ឋាន។ អង្គការខេមរាមានគម្រោងដែលផ្តោតលើការការពារ និងលើកកម្ពស់សិទ្ធិនារី និងកុមារ មានដូចជាសិទ្ធិទទួលការអប់រំ សេវាកម្មសុខាភិបាល ការការពារពីអំពើហិង្សាក្នុងគ្រួសារ និងការបង្ការវីរុសហ៊ីវ/អេដស៍។ ចាប់តាំងពីឆ្នាំ២០១៥ មក ណាហ្គាវើលបាននិងកំពុងធ្វើការជាមួយអង្គខេមរា ដោយឧបត្ថម្ភអង្ករជារៀងរាល់ខែដល់អង្គការខេមរា ព្រមទាំងសម្ភារសិក្សា កាបូបសិក្សា និងអំណោយបុណ្យណូអែលទៅដល់កុមារៗដែលអង្គការមិនមែនរដ្ឋាភិបាលនេះទ្រទ្រង់ផងដែរ។
បេះដូងបរិសុទ្ធ បេះដូងសប្បុរស លោកស្រី លី រ៉ូហ្សាមី អភិបាលរងខណ្ឌឫស្សីកែវ បានថ្លែងបញ្ជាក់នៅក្នុងសុន្ទរកថាអំពីមោទនភាពរបស់លោកស្រីចំពោះអ្នកម្តាយទាំងអស់ និងទឹកចិត្តនិងអ្វីដែលណាហ្គាវើលបេះដូងសប្បុរសបានធ្វើ។ «ខ្ញុំបានទទួលដំណឹងពីអង្គការខេមរាទាក់ទងនឹងបេះដូងបរិសុទ្ធ សប្បុរស និងការឧបត្ថម្ភជាបន្តបន្ទាប់របស់ក្រុមហ៊ុនណាហ្គាវើលដល់សហគមន៍ និងប្រជាជនក្រលំបាក ជាពិសេសស្ត្រីមេម៉ាយ និងអ្នកម្តាយដែលផ្ទុកមេរោគអេដស៍។ តាងនាមឲ្យអាជ្ញាធរ និងអ្នកម្តាយនៅសង្កាត់ឫស្សីកែវ និងជ្រោយចង្វារ ខ្ញុំសូមថ្លែងអំណរគុណយ៉ាងជ្រាលជ្រៅចំពោះណាហ្គាវើលដែលបានជួយដល់អ្នកម្តាយរបស់យើង មិនត្រឹមតែអ្នកម្តាយ២០០នាក់ដែលកំពុងមានវត្តមាននៅទីនេះប៉ុណ្ណោះទេ គឺអ្នកម្តាយទាំងអស់ក្នុងប្រទេសកម្ពុជា ក៏ដូចជាអ្នកម្តាយទូទាំងពិភពលោកផងដែរ។ ខ្ញុំសូមជូនពរឲ្យណាហ្គាវើលទទួលបាននិរន្តភាពក្នុងអាជីវកម្មបស់ខ្លួន»។
លោកស្រី កុយ ផល្លាន្នី នាយិកាអង្គការខេមរា បានមានប្រសាសន៍ថា «ណាហ្គាវើល បាននិងកំពុងផ្តល់ការយកចិត្តទុកដាក់ និងក្តីស្រឡាញ់ជាប្រចាំដល់កុមារនៅក្នុងសង្កាត់ទាំងពីរចាប់តាំងពីខែឧសភា ២០១៥ មកម្ល៉េះ ។ ខ្ញុំអាចនិយាយដោយមោទនភាពថា នៅក្នុងបន្ទប់នេះ គឺពោរពេញដោយអ្នកម្តាយដែលមានការតស៊ូមិនថា យប់ ឬថ្ងៃឡើយ ដើម្បីសេចក្តីសុខរបស់គ្រួសារ និងបុត្រធីតារបស់ខ្លួន។ អ្នកម្តាយតែងតែលាក់ទឹកភ្នែកមិនដែលឲ្យយើងដឹងពីទុក្ខសោករបស់គាត់ឡើយ។ ជីវិតរបស់បុត្រធីតា គឺជាជីវិតរបស់អ្នកម្តាយ ។ គាត់គឺជាមនុស្សសំខាន់ជាងគេបំផុតនៅក្នុងគ្រួសារ និងនៅក្នុងពិភពលោក។
គណៈគ្រប់គ្រងជាន់ខ្ពស់ និងបុគ្គលិកស្ម័គ្រចិត្តណាហ្គាវើលបេះដូងសប្បុរស មានកិត្តិយសដែលបានចូលរួមចែកអំណោយដល់អ្នកម្តាយទាំង២០០នាក់។ អំណោយទាំងនោះមានដូចជាចានស្រាក់ បំពង់ទឹកក្តៅ ភួយ មុង និងកន្សែងពោះគោ ដើម្បីជួយសម្រួលដល់ការរស់នៅរបស់អ្នកម្តាយ និងគ្រួសាររបស់គាត់បានប្រសើរមួយកម្រិត។
ជាព្រឹកមួយដែលពោរពេញដោយអារម្មណ៍រំភើប និងក្តីស្រឡាញ់ សមាជិកណាហ្គាវើលបេះដូងសប្បុរសទាំងអស់ពិតជាមានអារម្មណ៍លើកទឹកចិត្តខ្លាំងណាស់ ដោយស្ត្រី និងម្តាយដ៏រឹងមាំទាំងអស់ដែលមកពីអង្គការខេមរា។
ប្រជាជនកម្ពុជាជាង៨០.០០០នាក់បានទទួលការឧបត្ថម្ភពីណាហ្គាវើលបេះដូងសប្បុរសចាប់តាំងពីចាប់កំណើតតាំងពីជាង២១ឆ្នាំមុនមកដល់ពេលនេះ ណាហ្គាវើលបាននិងកំពុងចូលរួមចំណែកជាវិជ្ជមានដល់ការរីកចម្រើន និងការអភិវឌ្ឍសេដ្ឋកិច្ច និងសង្គមនៅកម្ពុជាតាមរយៈសកម្មភាពសង្គម និងការឧបត្ថម្ភជាច្រើន។ នៅក្នុងខែមីនា ឆ្នាំ២០១៤ ណាហ្គាវើលបេះដូងសប្បុរស ត្រូវបានបង្កើតឡើងដើម្បីតបស្នងដល់ប្រទេសកម្ពុជាវិញ តាមរយៈការឧបត្ថម្ភគាំទ្រជាច្រើនដល់ជីវភាពរស់នៅប្រចាំថ្ងៃរបស់ប្រជាជនកម្ពុជា។ គំនិតផ្តួចផ្តើមនេះ ដែលជាសកម្មភាពមួយក្នុងចំណោមសកម្មភាពផ្សេងៗទៀត បានជួយទ្រទ្រង់ដល់បុព្វហេតុសហគមន៍តបស្នងជូនដល់សហគមន៍វិញ មានដូចជា គំនិតផ្តួចផ្តើមលើកកម្ពស់ការយល់ដឹងអំពីបរិស្ថានដែលធ្វើឲ្យបរិស្ថានរស់នៅមានភាពប្រសើរ មានសុវត្ថិភាព និងមាននិរន្តរភាពជាងមុន ការអប់រំតាមរយៈកម្មវិធីសិល្បៈ និងវិទ្យាសាស្ត្រ និងកីឡាដែលផ្តល់អត្ថប្រយោជន៍ដល់កុមារ សិស្សានុសិស្ស និងអត្តពលិក។ រហូតដល់ពេលបច្ចុប្បន្ននេះ មានប្រជាជនច្រើនជាង៨០.០០០នាក់គ្រប់មជ្ឈដ្ឋានបានទទួលអត្ថប្រយោជន៍ពីណាហ្គាវើលបេះដូងសប្បុរស។
ចែករំលែកព័តមាននេះ