ប្រទេសថៃ ៖ តម្លៃអង្កររបស់ថៃបានកើនឡើងខ្ពស់ក្នុងរយៈពេល២ឆ្នាំ ដែលបណ្តាលមកពីមានការផ្គត់ផ្គង់ទាបជាងមុន ដោយសារតែគ្រោះរាំងស្ងួតបានអូសបន្លាយ ។
យោងតាមប្រសាសន៍លោក Chookiat Ophaswongse ប្រធានសមាគមអ្នកនាំអង្ករចេញរបស់ថៃ បានឲ្យដឹងថា ៖ « អង្ករគ្រប់ប្រភេទត្រូវបានឡើងថ្លៃ ។ តម្លៃអង្ករសបានកើនឡើង៥% ស្មើនឹង៤២៤ដុល្លារក្នុង១តោន ដែលកើនឡើងពី៣៩៧ដុល្លារក្នុង១តោនកាលពីខែមេសា ។ ចំណែកអង្ករក្រអូបមានតម្លៃ៩០០ដុល្លារក្នុង១តោន កើនឡើងពី៨៦៧ដុល្លារក្នុង១តោនកាលពីខែមុន » ។
លោក Chookiat Ophaswongse បានបន្តទៀតថា ៖ « តម្លៃអង្ករក្រអូបកើនឡើងនេះ ដោយសារតែការផលិតនៅក្នុងស្រុកធ្លាក់ចុះ ខណៈដែលកសិករថៃបានផ្លាស់ប្តូរមកដាំដុះស្រូវ Hom Mali ដោយសារតែមានតម្រូវការខ្ពស់ពីប្រទេសចិន ក៏ដូចជាឥណ្ឌូណេស៊ី និងម៉ាឡេស៊ីផងដែរ » ។
អគ្គលេខាធិការពាណិជ្ជកម្មអចិន្ត្រៃយ៍ លោកស្រី Chutima Bunyapraphasara បានមានប្រសាសន៍ថា ៖ « តម្លៃអង្ករកំពុងតែកើនឡើងគឺដោយសារតែការផ្គត់ផ្គង់សកលធ្លាក់ចុះទាប និងមានគ្រោះរាំងស្ងួត ដែលត្រូវបានគេរំពឹងថា នឹងធ្វើឲ្យប៉ះពាល់ដល់ប្រទេសផលិតស្រូវធំពីរ គឺប្រទេសឥណ្ឌា និងវៀតណាម » ។
លោកស្រីបន្ថែមថា ៖ « ការកើនឡើងថ្លៃនេះ គឺយោងទៅលើផលប៉ះពាល់ពីគ្រោះរាំងស្ងួតនៅក្នុងប្រទេសទាំងនោះ » ។
អង្ករដែលបានដាក់ដេញថ្លៃចុងក្រោយ គឺជាផ្នែកមួយនៃអង្ករចំនួន១១,៤លានតោននៅក្នុងស្ដុករបស់រដ្ឋ ។ គណៈកម្មាធិការគោលនយោបាយអង្ករជាតិ ដឹកនាំដោយនាយករដ្ឋមន្ត្រី Prayut Chan-o-cha បានដាក់ដេញថ្លៃអង្ករកាលពីខែមុន ដែលជាការសើ្នសុំពីក្រសួងពាណិជ្ជកម្ម ។ គម្រោងនេះនឹងត្រូវការទឹកប្រាក់យ៉ាងតិច១០០ប៊ីលានបាត ៕
ចែករំលែកព័តមាននេះ